រាជធានីភ្នំពេញ ៖ ទីបំផុត មេដឹកនាំគណបក្សសង្គ្រោះជាតិ បានសម្រេចនាំគ្នាហែក្បួនចេញពីមុខវត្តបទុមវតី ឆ្ពោះទៅកាន់ទីស្នាក់ការបក្សរបស់ខ្លួន នៅក្នុងសង្កាត់ចាក់អង្រែលើ បន្ទាប់ពីសមត្ថកិច្ចដាក់ពង្រាយកម្លាំងចម្រុះ មិនឱ្យមានការបន្តធ្វើសមាជមហាជននៅទីលានប្រជាធិបតេយ្យ ឬបន្តធ្វើនៅមុខវត្តបទុមវតី ក្រោយពេលបញ្ចប់ការប្រារព្ធពិធីបង្សុកូលរំលឹកដល់វិញ្ញាណក្ខន្ធអ្នករងគ្រោះក្នុងព្រឹត្តិការណ៍គប់គ្រាប់បែកដៃចូលហ្វូងបាតុករកាលពី១៧ឆ្នាំមុន ។
ការហែក្បួនឆ្ពោះទៅកាន់ទីស្នាក់ការរបស់ខ្លួននៅចាក់អង្រែលើនោះ បានធ្វើឱ្យមានការកកស្ទះចរាចរណ៍ផងដែរ ពិសេសនោះគឺនៅចំណុចមុខស្នាក់ការគណបក្សសង្គ្រោះជាតិ ដែលមានទីតាំងជាប់ផ្លូវជាតិលេខ២ ស្ថិតក្នុងសង្កាត់ចាក់អង្រែលើ ខណ្ឌមានជ័យ ។ សមាជិក-សមាជិកា គណបក្សសង្គ្រោះជាតិ ប្រមាណ៧០០នាក់ បានមកជួបជុំគ្នាដូចការគ្រោងទុកនៅព្រឹកថ្ងៃទី៣០ មីនា ដើម្បីប្រារព្ធពិធីបង្សុកូលនៅចេតិយមុខរដ្ឋសភាចាស់ ជាការរំលឹកខួបនៃការវាយប្រហារដោយគ្រាប់បែកចំនួន៤គ្រាប់ ដោយជនមិនស្គាល់មុខ បានគប់ចូលហ្វូងបាតុករ កាលពី១៧ឆ្នាំមុន (ថ្ងៃទី៣០ មីនា ឆ្នាំ១៩៩៧) បណ្តាលឱ្យមានមនុស្សស្លាប់ និងរងរបួសជិត២០០នាក់ ។ ការធ្វើពិធីនេះ ដឹកនាំដោយលោក សម រង្សុី និងលោក កឹម សុខា ព្រមទាំងសមាជិកជាន់ខ្ពស់ជាច្រើនរូបទៀត ។
មានការកត់សម្គាល់ថា នៅវេលាម៉ោងប្រមាណ១០ និង១០នាទីព្រឹក ថ្ងៃទី៣០ មីនា លោក សម រង្សុី ប្រធានគណបក្សសង្គ្រោះជាតិ និងលោក កឹម សុខា ជាអនុប្រធាន បានអញ្ជើញដល់ចេតិយតម្កល់ធាតុជនរងគ្រោះក្នុងហេតុការណ៍គប់គ្រាប់បែកកាលពី១៧ឆ្នាំមុន ដើម្បីដឹកនាំក្រុមអ្នកគាំទ្រ និងក្រុមគ្រួសារជនរងគ្រោះប្រារព្ធពិធីបង្សុកូលឧទ្ទិសកុសលជូនជនរង គ្រោះ ។ ជាមួយការអញ្ជើញដល់របស់ប្រធាន និងអនុប្រធានគណបក្សសង្គ្រោះជាតិនេះ ក៏មានការទះដៃស្វាគមន៍យ៉ាងកងរំពងពីក្រុមអ្នកគាំទ្រផងដែរ ។ លោក កឹម សុខា បានថ្លែងទៅកាន់សាច់ញាតិជនរងគ្រោះ និងអ្នកគាំទ្រថា ទោះបីជាករណីនេះបានកន្លងផុតទៅ១៧ឆ្នាំហើយក្តី តែក្តីនឹករលឹក និងភាពសោកស្តាយរបស់ប្រជាពលរដ្ឋខ្មែរ មិនត្រូវបានបំភ្លេចឡើយចំពោះវីរបាតុករ ដែលបានបាត់បង់ជីវិតដោយសារការវាយប្រហារដោយគ្រាប់បែក ខណៈពួកគាត់ទាមទារកំណែទម្រង់ប្រព័ន្ធតុលាការ ។ គណបក្សសង្គ្រោះជាតិ នឹងបន្តទាមទារស្វែងរកការពិតឱ្យទាល់តែបាន ដើម្បីចាប់ជនល្មើសយកមកផ្តន្ទាទោសតាមច្បាប់។
មន្ត្រីនគរបាលមួយរូបនិយាយថា មុនពេលលោក សម រង្សុី និងលោក កឹម សុខា មកដល់កន្លែងប្រារព្ធពិធីនោះ ប្រជាពលរដ្ឋដែលចូលរួម បានប្រទះឃើញរ៉ុក្កែតវាយសី រុំព័ទ្ធដោយស្កុតនៅនឹងដង ដែលអ្នកវាយសីយកទៅទុកចោលនៅក្រោមដើមពោធិ៍ លើសួនច្បារវត្តបទុមវតី ក្បែរវេទិកាគណបក្សសង្គ្រោះជាតិ ។ ការប្រទះឃើញនេះ ធ្វើឱ្យអ្នកចូលរួមក្នុងពិធីបង្សុកូលភ្ញាក់ផ្អើលទាំងព្រឹក ដោយសង្ស័យថា នោះជាគ្រាប់បែកច្នៃ ក៏ប៉ុន្តែក្រោយមក សមត្ថកិច្ចជំនាញបានត្រួតពិនិត្យឃើញថា មិនមែនគ្រាប់បែកច្នៃនោះទេ ទើបបាត់សភ្នែក ។ មន្ត្រីសាលាខណ្ឌដូនពេញ ឱ្យដឹងថា គណបក្សសង្គ្រោះជាតិ តែងតែរៀបចំពិធីសាសនាបែបនេះជារៀងរាល់ឆ្នាំ ហើយអាជ្ញាធររាជធានីភ្នំពេញ ក៏តែងតែអនុញ្ញាតឱ្យមានការរៀបចំជារៀងរហូតមកផងដែរ ។ យ៉ាងណាក៏ដោយ ចាប់តាំងពីព្រឹក កម្លាំងសមត្ថកិច្ចរាជធានីភ្នំពេញ ទាំងនគរបាល ទាំងកងរាជអាវុធហត្ថ និងកម្លាំងសណ្តាប់ធ្នាប់ខណ្ឌដូនពេញ ជាច្រើនសិបនាក់ ត្រូវបានដាក់ពង្រាយការពារសន្តិសុខ និងសណ្តាប់ធ្នាប់នៅជុំវិញទីនោះ និងនៅទីលានប្រជាធិបតេយ្យ ដើម្បីរារាំងការជួបជុំណាមួយរបស់គណបក្សសង្គ្រោះជាតិ ដែលធ្វើផ្ទុយពីការអនុញ្ញាតរបស់សាលារាជធានីភ្នំពេញ និងក្រសួងមហាផ្ទៃ ដែលអនុញ្ញាតឱ្យគណបក្សសង្គ្រោះជាតិ រៀបចំពិធីសាសនានៅចេតិយមុខរដ្ឋសភាសចាស់ ប៉ុន្តែមិនអនុញ្ញាតឱ្យមានការជួបជុំបន្ត ដើម្បីធ្វើសមាជប្រជាជននៅទីលានប្រជាធិបតេយ្យឡើយ ។
បន្ទាប់ពីបញ្ចប់ពិធីបង្សុកូលដល់វិញ្ញាណក្ខន្ធជនរងគ្រោះរួចមក លោក សម រង្សុី និងលោក កឹម សុខា ព្រមទាំងថ្នាក់ដឹកនាំសមាជិក-សមាជិកាគណបក្សសង្គ្រោះជាតិ រួមទាំងអ្នកគាំទ្រផងនោះ នៅវេលាម៉ោង១១ព្រឹក ថ្ងៃដដែល បាននាំគ្នាចាកចេញពីសួនច្បារមុខវត្តបទុមវតី ដើរដង្ហែក្បួនឆ្ពោះទៅទីស្នាក់ការគណបក្សសង្គ្រោះជាតិ ដែលមានទីតាំងនៅផ្លូវជាតិលេខ២ ស្ថិតក្នុងសង្កាត់ចាក់អង្រែលើ ខណ្ឌមានជ័យ ដើម្បីជួបជុំធ្វើសមាជមហាជននៅទីនោះ ។ សមាជមហាជននេះ ធ្វើឡើងដើម្បីបញ្ជាក់ពីគោលជំហរ និងលទ្ធផលនៃកិច្ចចរចារវាងគណបក្សសង្គ្រោះជាតិ និងគណបក្សប្រជាជនកម្ពុជា ព្រមទាំងសុំមតិយោបល់ពីប្រជាពលរដ្ឋ ដើម្បីឱ្យគណបក្សសង្គ្រោះជាតិ អនុវត្តការងារបន្តទៀត។ នេះជាការអះអាងរបស់មន្ត្រីជាន់ខ្ពស់គណបក្សសង្គ្រោះជាតិ ដែលបានឱ្យកោះសន្តិភាពដឹងនាព្រឹកថ្ងៃទី៣០ មីនា ។
មន្ត្រីដដែលបានបញ្ជាក់ថា សមាជមហាជនធ្វើឡើងក្នុងគោលបំណងបូកសរុបលទ្ធផលនៃការអនុវត្តសេចក្តីសម្រេចសមាជមហាជនលើកដំបូងកាលពីថ្ងៃទី៦ ខែតុលា ឆ្នាំ២០១៣ កន្លងទៅ នៅទីលានប្រជាធិបតេយ្យ ។ បោះទីតាំងការពារទីលានប្រជាធិបតេយ្យនៅទីលានប្រជាធិបតេយ្យ កម្លាំងសមត្ថកិច្ចចម្រុះប្រដាប់ដោយខែល ដំបង រួមទាំងរថយន្តបាញ់ទឹក និងរថពាសដែកសម្រាប់រុញមនុស្សជាច្រើនគ្រឿង បានដាក់តាមច្រកចេញចូលទីលាន និងដាក់បារ៉ាស់ផងដែរ ហើយនៅព្រឹកថ្ងៃទី៣០ មីនា គេសង្កេតឃើញថា មិនមានការមកជួបជុំគ្នានៅទីនោះឡើយ ខុសពីការអះអាងរបស់គណបក្សសង្គ្រោះជាតិ ដែលលើកឡើងថា នឹងរៀបចំធ្វើសមាជមហាជន ចាប់ពីម៉ោង១២ថ្ងៃត្រង់ រហូតដល់ម៉ោង៧យប់ ។ ប៉ុន្តែ ទីបំផុតប្រធានគណបក្សសង្គ្រោះជាតិ បានសម្រេចនាំគ្នាធ្វើសមាជមហាជនរបស់ខ្លួននៅទីស្នាក់ការកណ្តាលគណបក្សរបស់ខ្លួន ស្ថិតក្នុងសង្កាត់ចាក់អង្រែលើ ខណ្ឌមានជ័យវិញ ដោយសារមិនអាចធ្វើនៅកន្លែងណាមួយបាន ទាំងនៅទីលានប្រជាធិបតេយ្យ និងសួនច្បារមុខវត្តបទុមវតី តាមការចង់បានរបស់ខ្លួននោះ ។
ការរារាំងមិនឱ្យគណបក្សសង្គ្រោះជាតិ ធ្វើសមាជរបស់ខ្លួនលើទីលានប្រជាធិបតេយ្យនេះ ត្រូវបានមន្ត្រីមួយរូប និយាយថា របាយការណ៍ថ្មីៗនេះរបស់ក្រសួងមហាផ្ទៃ បានកត់សម្គាល់ថា បាតុកម្មដឹកនាំដោយលោក សម រង្សុី និងលោក កឹម សុខា ដោយមានការចូលរួមពីសហជីព សមាគម និងអង្គការក្រៅរដ្ឋាភិបាលខ្លះ បានបញ្ចុះបញ្ចូល និងអំពាវនាវដល់មន្ត្រីរាជការ កម្មករ កងកម្លាំងប្រដាប់អាវុធនានា មកចូលរួមធ្វើបាតុកម្មជាមួយខ្លួន ដើម្បីប្រឆាំងរាជរដ្ឋាភិបាលស្របច្បាប់ ទាមទារឱ្យមានការបោះឆ្នោតឡើងវិញ ឱ្យសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ស្របច្បាប់ចុះចេញពីតំណែង និងទាមទារដំឡើងប្រាក់ឈ្នួលគោលអប្បបរមា១៦០ដុល្លារ ជាដើម ។ ក្រសួងមហាផ្ទៃ ក៏បានចោទផងដែរថា ការខូចខាតបណ្តាលមកពីបាតុកម្មខុសច្បាប់ ដឹកនាំដោយគណបក្សសង្គ្រោះជាតិនោះ បានប៉ះពាល់ដល់ធនធានមនុស្ស ប៉ះទង្គិចដោយហិង្សាក្នុងព្រឹត្តិការណ៍កាលពីថ្ងៃទី២ និងទី៣ ខែមករា ឆ្នាំ២០១៤ កន្លងទៅ នៅតំបន់រោងចក្រតាមបណ្តោយផ្លូវវ៉េងស្រេង បណ្តាលឱ្យមនុស្ស៤នាក់ស្លាប់ រងរបួស៣៥នាក់ (ស្រី៤នាក់) កងកម្លាំងប្រដាប់អាវុធរងរបួសស្រាល២៩នាក់ កងកម្លាំងនគរបាលជាតិ រងរបួសធ្ងន់-ស្រាល១៦នាក់ ឃាត់ខ្លួនមនុស្ស២៣នាក់ បញ្ជូនទៅសាលាដំបូង ។ ការធ្វើបាតុកម្មខុសច្បាប់នេះ មិនត្រឹមតែធ្វើឱ្យប៉ះពាល់ដល់ធនធានមនុស្សទេ ថែមទាំងធ្វើឱ្យខូចខាតដល់ទ្រព្យសម្បត្តិរដ្ឋ និងឯកជន ជាច្រើនទៀត ។
របាយការណ៍ដដែលបានចាត់ទុកថា បាតុកម្មខុសច្បាប់ដឹកនាំដោយគណបក្សសង្គ្រោះជាតិ គឺជាសកម្មភាពបង្កហេតុ មានផែនការគ្រោងទុក និងមានចេតនាផ្តួលរំលំរាជរដ្ឋាភិបាលស្របច្បាប់ ដោយញុះញង់បង្កឱ្យកើតមានអំពើហិង្សាយ៉ាងអនាធិបតេយ្យ ពេលប៉ះទង្គិចជាមួយកម្លាំងសមត្ថកិច្ច រហូតដល់បង្កឱ្យមានការបាត់បង់អាយុជីវិតមនុស្ស របួសកងកម្លាំងសមត្ថកិច្ច ប្រជាពលរដ្ឋ និងមានការឃាត់ខ្លួនមនុស្សជាដើម ។ របាយការណ៍ចែងថា បាតុកម្មនេះ បានបង្កឱ្យប៉ះពាល់ដល់សិទ្ធិសេរីភាព សុវត្ថិភាព សណ្តាប់ធ្នាប់សាធារណៈ ផលប្រយោជន៍របស់ប្រជាពលរដ្ឋ និងវិនិយោគិនដទៃទៀតយ៉ាងធ្ងន់ធ្ងរ ដែលជាសកម្មភាពរំលោភសិទ្ធិមនុស្ស វិច្ឆេទកម្មសេដ្ឋកិច្ច វិទ្ធង្សនានយោបាយ និងបង្កគ្រោះមហន្តរាយដល់សន្តិសុខជាតិ បម្រើឱ្យឧបាយកល និងមហិច្ឆតានយោបាយរបស់គណបក្សសង្គ្រោះជាតិ ។ របាយការណ៍ដដែលសង្កត់ពាក្យថា បាតុកម្មខុសច្បាប់ដឹកនាំដោយគណបក្សសង្គ្រោះជាតិ ក៏បង្កឱ្យមានការរើសអើងពូជសាសន៍ បំបែកបំបាក់សាមគ្គីជាតិ បង្កអនាធិបតេយ្យ មិនមានការទទួលខុសត្រូវ និងមិនគោរពច្បាប់ ដែលនៅជាធរមាន ៕
ចែករំលែកព័តមាននេះ