រាជធានីភ្នំពេញ ៖ កម្មករ-កម្មការិនីសិប្បកម្មកាត់ដេរមួយយីហោ Sooapperel co. Ltd ចំនួនជិត៨០នាក់ បានបញ្ចេញប្រតិកម្មតបតជាមួយនឹងថៅកែជនជាតិកូរ៉េម្នាក់ ដែលបានភូតកុហកពួកគេជាបន្តបន្ទាប់ម្តងហើយម្តងទៀត ពីរឿងពេលវេលាបើកប្រាក់ឈ្នួល ដែលពួកគេធ្វើការរយៈពេល៣ខែចុងក្រោយនេះ មិនទាន់បានទទួលប្រាក់ឈ្នួលសូម្បីតែ១កាក់១សេននៅទ្បើយទេ ។
រាជធានីភ្នំពេញ ៖ កម្មករ-កម្មការិនីសិប្បកម្មកាត់ដេរមួយយីហោ Sooapperel co. Ltd ចំនួនជិត៨០នាក់ បានបញ្ចេញប្រតិកម្មតបតជាមួយនឹងថៅកែជនជាតិកូរ៉េម្នាក់ ដែលបានភូតកុហកពួកគេជាបន្តបន្ទាប់ម្តងហើយម្តងទៀត ពីរឿងពេលវេលាបើកប្រាក់ឈ្នួល ដែលពួកគេធ្វើការរយៈពេល៣ខែចុងក្រោយនេះ មិនទាន់បានទទួលប្រាក់ឈ្នួលសូម្បីតែ១កាក់១សេននៅទ្បើយទេ ។
ក្រុមកម្មករនិយាយថា បើកលុយឱ្យម្តង ថ្ងៃនេះ ម្តងថាថ្ងៃនោះ រហូតមកទល់នឹងពេលនេះ ក្រុមកម្មករទាំងនោះអត់ទ្រាំលែងបានតទៅទៀត ក៏បាននាំគ្នាសែងម៉ាស៊ីនដេរ និងរបស់របរជាច្រើនទៀតចេញពីក្នុងទីតាំងសិប្បកម្មនោះ ក្នុងបំណងយកទៅលក់កាត់យកលុយប្រាក់ឈ្នួល ។ ប៉ុន្តែសកម្មភាពនេះ ត្រូវបានកម្លាំងសមត្ថកិច្ចប៉ូលិសប៉ុស្តិ៍ចោមចៅ ណែនាំឱ្យពួកគេមានការស្ងប់ស្ងាត់ និងអត់ធ្មត់រង់ចាំអាជ្ញាធរខណ្ឌដោះស្រាយឱ្យ ទើបពួកគេនាំគ្នាសែងរបស់របរទាំងនោះ ចូលទៅក្នុងសិប្បកម្មវិញ ។
ហេតុការណ៍នោះ បានបង្កឱ្យមានការភ្ញាក់ផ្អើលកាលពីវេលាម៉ោង១១និង៣០នាទីព្រឹកថ្ងៃទី៣០ មីនា ដែលសិប្បកម្មខាងលើនោះ មានទីតាំងស្ថិតនៅក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។ ក្រុមកម្មករទាំងប្រុសទាំងស្រី បានឱ្យដឹងថា ពួកគេម្នាក់ៗបានតស៊ូធ្វើការងារ នៅក្នុងសិប្បកម្មខាងលើនេះ យូរខែកន្លងមកហើយ និងមានថៅកែជាជនជាតិកូរ៉េជាអ្នកគ្រប់គ្រង ហើយនៅក្នុងខែដំបូងៗ ថៅកែបានបើកប្រាក់ឈ្នួលឱ្យជាធម្មតា ។ ប៉ុន្តែនៅរយៈពេល៣ខែចុងក្រោយនេះ ស្រាប់តែលែងបើកឱ្យ និងបានកុហករហូតម្តងថាបើកឱ្យថ្ងៃនេះ និងម្តងថាបើកឱ្យថ្ងៃនោះ មិនមានភាពប្រាកដប្រជាសោះ ។
ពួកគេបន្តថា ពេលនេះពួកគេបានជំពាក់ថ្លៃជួលផ្ទះគេស្នាក់នៅ ថ្លៃការហូបចុកផ្សេងៗគ្រប់ៗគ្នា គ្មានប្រាក់សងគេនោះទេ ម្នាក់ៗស្ទើរដាច់ខ្យល់ហើយ ។ ម៉្យាងទៀត អ្វីដែលសំខាន់ថែមទៀតនោះ គឺនៅក្នុងឱកាសចូលឆ្នាំថ្មីប្រពៃណីជាតិខ្មែរខាងមុខនេះ ។ ពួកគេនិយាយត្អូញត្អែរថា អ្វីៗត្រូវបានខកបំណងអស់ ព្រោះតែថៅកែមិនបើកប្រាក់ឈ្នួលឱ្យ ។ ថៅកែសិប្បកម្មខាងលើនេះ ក្រទ្បិចក្រទ្បុចខ្លាំងណាស់ និយាយកុហករហូត ។ នៅពេលដែលពួកគេគំរាមប្តឹងសមត្ថកិច្ច ថៅកែនេះបានប្រាប់ថា ខ្លួនគ្មានប្រាក់បើកឱ្យពួកគេទេ គឺសុខចិត្តជាប់គុក ។
ការនិយាយក្នុងភាពមិនទទួលខុសត្រូវបែបនេះ បានធ្វើឱ្យពួកគេមានការក្តៅក្រហាយគ្រប់ៗគ្នា ទើបនៅវេលាព្រឹកថ្ងៃទី៣០ មីនា ពួកគេបាននាំគ្នាជញ្ជូនម៉ាស៊ីនដេរ និងរបស់របរនៅក្នុងសិប្បកម្មខាងលើចេញក្រៅ ក្នុងបំណងយកទៅលក់ ដើម្បីជាការកាត់កងគ្នា ។ ប៉ុន្តែនៅពេលនោះ ត្រូវបានសមត្ថកិច្ចរារាំង និងណែនាំឱ្យជញ្ជូនរបស់របរនោះ ចូលទៅក្នុងសិប្បកម្មវិញរង់ចាំអាជ្ញាធរដោះស្រាយឱ្យ ។
មិនអាចស្វែងរកការបំភ្លឺណាមួយពីថៅកែជនជាតិកូរ៉េ ដែលជាប់ចោទនោះបានទេ ហើយមិនទាន់ដឹងថា ពេលនេះលោកថៅកែ ស្ថិតនៅទីណានៅទ្បើយ ។ សង្ស័យទៅសម្ងំដេកនៅកាស៊ីណូណាមួយក៏មិនដឹងដែរ ព្រោះមិនអាចទាក់ទងបានតាមទូរស័ព្ទ ៕
ចែករំលែកព័តមាននេះ