ខេត្តព្រៃវែង ៖ យោងតាមរបាយការណ៍របស់អាជ្ញាធរខេត្តព្រៃវែងគិតត្រឹមថ្ងៃទី19 កញ្ញា នេះទឹកជំនន់បានជន់លិច និងបង្កផលប៉ះពាល់ទៅលើស្រុក-ក្រុងចំនួន១០ នៅក្នុងខេត្តព្រៃវែង ដោយបានធ្វើឱ្យប្រជាពលរដ្ឋជិត6ពាន់គ្រួសារ រងផលប៉ះពាល់ ក្នុងនោះជិត200គ្រួសារ ត្រូវបានជម្លៀសទៅកាន់ទីទួលសុវត្ថិភាព ។
លោក ឌុច គន្ធា អភិបាលរងខេត្តព្រៃវែង បានថ្លែងឲ្យដឹងថា ក្រុងស្រុកទាំង១០ ដែលរងផលប៉ះពាល់ដោយទឹកជំនន់នោះរួមមាន ៖ ស្រុកស៊ីធរកណ្តាល, ស្រុកពារាំង, ស្រុកពោធិ៍រៀង, ស្រុកពាមរក៍, ស្រុកស្វាយអន្ទរ, ស្រុកកំពង់ត្របែក, ស្រុកពាមជរ, ស្រុកព្រះស្តេច, ក្រុងព្រៃវែង, និងស្រុកបាភ្នំចំណែកកំពស់ទឹកជំនន់គិតត្រឹមព្រឹកថ្ងៃទី19 កញ្ញា នេះគឺមានកំពស់ 6,92m ទឹកនៅទន្លេខាងមុខសាលាខេត្ត ខណៈកំពស់ទឹកដែលដល់កម្រិតប្រកាសអាសន្ន គឺ7,50m ហើយបើធៀបទៅនឹងឆ្នាំ២០១៨ កម្រិតទឹកកើនខ្ពស់ជាងឆ្នាំមុន ០,១៧m។
ប្រភពដដែលនេះបានបញ្ជាក់ថា ឆ្លើយតបចំពោះបញ្ហាគ្រោះទឹកជំនន់នេះ អាជ្ញាធរខេត្តព្រៃវែង ដឹកនាំដោយបានចុះពិនិត្យស្ថានភាពទឹកជំនន់ នៅតាមបណ្តាស្រុកក្រុងដែលរងផលប៉ះពាល់ ជារៀងរាល់ថ្ងៃ និងបានណែនាំអោយប្រជាពលរដ្ឋ មានការប្រុងប្រយ័ត្នខ្ពស់ក្នុងការរស់នៅ ព្រមទាំងណែនាំឲ្យអាជ្ញាធរមូលដ្ឋានបន្ថែមការប្រុងប្រយ័ត្ន និងត្រៀមលក្ខណៈ ដើម្បីជួយសង្គ្រោះប្រជាពលរដ្ឋ អោយបានទាន់ពេលវេលា បើមានហេតុការណ៍អ្វីមួយកើតឡើង និងស្វែងរកទីទួលសុវត្ថិភាព ជូនពួកគាត់ ដើម្បីធានាបាននូវសុខសុវត្ថិភាព។
ដោយឡែក តំបន់ដែលគ្រោះថ្នាក់ ត្រូវដាក់ស្លាកសញ្ញាសម្គាល់ឲ្យពួកគាត់បានដឹង ហើយអាជ្ញាធរទាំងអស់ ត្រូវដាក់កម្លាំងវេនប្រចាំការនៅតាមកន្លែងដែលប្រឈមនឹងការលិចលង់ខ្លាំង កន្លែងដែលគ្រោះថ្នាក់ខ្លាំង ដើម្បីធានាសុខសុវត្ថិភាពជូនបងប្អូនប្រជាពលរដ្ឋ ជាពិសេសត្រូវត្រៀមចែកស្បៀងជូនប្រជាពលដ្ឋ ដែលខ្វះខាតស្បៀងផងដែរ ៕
កែសម្រួលដោយ ៖ សំណាង
ចែករំលែកព័តមាននេះ