រាជធានីភ្នំពេញ ៖ ក្រោយពីសារព័ត៌មានបានផ្សព្វផ្សាយ ពីពលការិនី១រូបរត់ពីប្រទេសម៉ាទ្បេស៊ី មកដល់ប្រទេសវិញ ហើយរៀបរាប់ពីទុក្ខសោកដ៏រន្ធត់ធ្វើឱ្យមានការភ្ញាក់ផ្អើលដល់មជ្ឈដ្ឋាននានាមក នៅព្រឹកថ្ងៃទី២៧ មីនា នាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃ ដោយមានការសហការជាមួយស្នងការដ្ឋាននគរបាលខេត្តបាត់ដំបង បានអញ្ជើញឪពុក និងកូនស្រីជាពលការិនីនោះមកសាកសួរ ។ ការអញ្ជើញមកសាកសួរនេះ គឺដើម្បីបញ្ជាក់ពីការពិតកុំឱ្យមានភាពស្រពេចស្រពឹល ហើយក៏អាចជាការប៉ះពាល់ទៅដល់មុខមាត់ប្រទេសម៉ាទ្បេស៊ីផងដែរ ដោយសារតែព័ត៌មានអវិជ្ជមានទាំងនេះ ។ អ្វីដែលមានការទទួលស្គាល់នោះ គឺការធ្វើបាបពលការិនី តែក៏មានពលការិនីជួបថៅកែល្អច្រើនដែរ ។
នៅចំពោះមុខមន្ត្រីនគរបាលនាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃ ពលការិនីឈ្មោះ ពែក ម៉ៅ ហៅហម កែវ អាយុ២១ឆ្នាំ និងឪពុកដែលមានទីលំនៅក្នុងភូមិច្រនៀង ឃុំគោកឃ្មុំ ស្រុកថ្មគោល ខេត្តបាត់ដំបង បានរៀបរាប់ថា នាងបានចេញពីប្រទេសកម្ពុជាទៅធ្វើការងារតាមផ្ទះនៅប្រទេសម៉ាទ្បេស៊ី៣ឆ្នាំកន្លងមកនោះមែន ។ ដោយទ្រាំទ្រនឹងការលំបាកគ្រប់បែបយ៉ាងនោះ នាងបានទូរស័ព្ទប្រាប់មកក្រុមគ្រួសារដោយប្រឌិតរឿង ដើម្បីឱ្យមានអន្តរាគមន៍ជួយនាងបានវិលមកស្រុកវិញ ។ អ្វីដែលនាងបានរៀបរាប់ប្រាប់អ្នកសារព័ត៌មាននោះ មិនមែនជាការពិតទេ ក្នុងករណីមានការកាត់ក្បាលពលការិនីខ្មែរម្នាក់ឈ្មោះ នីសា ជាកង់ៗច្រកថង់ផ្សេងគ្នា បោះចូលធុងសំរាម និងព័ត៌មានជាច្រើនទៀត ដែលពាក់ព័ន្ធនឹងពលការិនីខ្មែរ ត្រូវគេវាយធ្វើបាប។នាងពែក ម៉ៅ ហៅហម កែវ បន្តថា ព័ត៌មានទាំងអស់នោះ មិនមែនជាការពិតទ្បើយ ពោលគឺនាងចង់មកផ្ទះ និងចង់បានបើកប្រាក់ខែពីក្រុមហ៊ុន ដែលនាំនាងទៅធ្វើការនៅប្រទេសម៉ាទ្បេស៊ី៣ឆ្នាំមកហើយ អត់ទាន់បាន១សេនសោះ ។
ក្រោយពីមានការបំភ្លឺជាផ្លូវការ លោកឧត្តមសេនីយ៍ទោ ប៉ុល ភិធេយ្យ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃ បាននិងកំពុងយករឿងនេះទៅធ្វើការសិក្សា ដើម្បីសហការជាមួយនាយកដ្ឋានកុងស៊ុល និងច្បាប់របស់ក្រសួងការបរទេស ដើម្បីចាត់ការតាមនីតិវិធីជៀសវាងនូវភាពល្អក់កករ និងប៉ះពាល់ដល់មិត្តភាពរវាងប្រទេសទាំង២កម្ពុជា-ម៉ាទ្បេស៊ី ។ បន្ទាប់ពីបានស្រាយបំភ្លឺប្រាប់សមត្ថកិច្ចរួចរាល់ ឪពុកនិងកូនស្រី ត្រូវបានអនុញ្ញាតវិលត្រទ្បប់ទៅផ្ទះសម្បែងរបស់ពួកគាត់វិញ ៕
ចែករំលែកព័តមាននេះ