ឡោមព័ទ្ធក្រុមយុវជនឆ្លងខេត្ត៧នាក់ សំងំជួបជុំគ្នាប្រើប្រាស់គ្រឿ.ងញៀ.នក្នុងរីសតមួយនៅក្រុងសែនមនោរម្យ
- មណ្ឌលគិរី
ខេត្តមណ្ឌលគិរី ៖ កម្លាំងនគរបាលក្រុងសែនមនោរម្យ បានបើកប្រតិបត្តិការឡោមព័ទ្ធ និងបង្ក្រាបសំបុកលាក់ខ្លួនប្រើប្រាស់គ្រឿងញៀនមួយកន្លែង ដោយឃាត់ខ្លួនជនសង្ស័យបានចំនួន៧នាក់ (ស្រី៣នាក់) កាលពីវេលាម៉ោង១១ និង១០នាទីយប់ថ្ងៃទី១១ ខែមិថុនា ឆ្នាំ២០២៦ នៅចំណុចរីសតហៃឡេន (Highland Resort) ក្នុងភូមិពូតាំង សង្កាត់រមនា ក្រុងសែនមនោរម្យ ។ ក្រុមជនសង្ស័យទាំងនេះ ត្រូវបានដឹងថា ជាអ្នកធ្វើដំណើរមកពីបណ្តាខេត្ត-រាជធានីផ្សេងៗគ្នាមកជួបជុំគ្នានៅទីនោះ។
លោកវរសេនីយ៍ឯក កាន់ ពេញ អធិការក្រុងសែនមនោរម្យបានឱ្យដឹងថា ប្រតិបត្តិការខាងលើនេះ ធ្វើឡើងក្រោមការចង្អុលបង្ហាញពីលោកវរសេនីយ៍ឯក ជា ចិត្រា ស្នងការនគរបាលខេត្តមណ្ឌលគិរី និងមានការសម្របសម្រួលនីតិវិធីពីលោក ស៊ាវ ងីឈាន់ ព្រះរាជអាជ្ញារងអមសាលាដំបូងខេត្តមណ្ឌលគិរី ក្រោយពីទទួលបានសេចក្តីរាយការណ៍ច្បាស់ការណ៍ពីប្រជាពលរដ្ឋមូលដ្ឋាន ។
នៅក្នុងរង្វង់ប្រតិបត្តិការឆែកឆេរទីតាំងកើតហេតុ កម្លាំងជំនាញបានរកឃើញ និងដកហូតវត្ថុតាងខុសច្បាប់ រួមមាន ម្សៅក្រាមពណ៌ស សង្ស័យជាគ្រឿងញៀនប្រភេទកេតាមីន (Ketamine) ចំនួន ១កញ្ចប់តូច ។រថយន្ត ១គ្រឿង និងទូរសព្ទដៃ ៦គ្រឿង។ កុំព្យូទ័រយួរដៃ ១គ្រឿង និងបាស JBL ១គ្រឿង។ ឧបករណ៍កែច្នៃសម្រាប់ជួបជុំ (អំពូលភ្លើងវិល ៣គ្រឿង, ក្តារដាក់តែ ១, បារីអេឡិចត្រូនិក ២គ្រឿង) ព្រមទាំងចិញ្ចៀនលោហៈធាតុពណ៌លឿង៣វង់ ។
សមត្ថកិច្ចបានបញ្ជាក់បន្ថែមថា ក្រុមជនសង្ស័យទាំង៧នាក់នេះ មិនមែនជាអ្នកស្រុកក្នុងតំបន់នោះទេ ពោលគឺពួកគេបានណាត់គ្នាធ្វើដំណើរមកលេងខេត្តមណ្ឌលគិរី ដោយខ្លះមានស្រុកកំណើតនៅរាជធានីភ្នំពេញ ខេត្តបាត់ដំបង ព្រះវិហារ កណ្តាល និងខេត្តសៀមរាប។
បច្ចុប្បន្ន ជនសង្ស័យរួមនឹងវត្ថុតាងទាំងអស់ ត្រូវបានសមត្ថកិច្ចជំនាញឃាត់ខ្លួនជាបណ្តោះអាសន្ន ដើម្បីបន្តការកសាងសំណុំរឿង បញ្ជូនទៅកាន់សាលាដំបូងខេត្ត ចាត់ការទៅតាមនីតិវិធីច្បាប់ជាធរមាន៕
ចែករំលែកព័តមាននេះ