ខេត្តស្វាយរៀង ៖ ដោយអនុវត្តតាមបទបញ្ជាដ៏ខ្ពង់ខ្ពស់ពីនាយឧត្តមសេនីយ៍ ស ថេត អគ្គស្នងការនគរបាលជាតិ និងលោក ប៉េង ពោធិ៍សា អភិបាល នៃគណៈអភិបាលខេត្តស្វាយរៀង ដឹកនាំបញ្ជាផ្ទាល់ពីលោកឧត្ដមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង ស្តីពីការអនុវត្តយុទ្ធនាការបង្ក្រាបបទល្មើសអនឡាញស្គេមនៅទូទាំងខេត្តស្វាយរៀង កាលថ្ងៃទី០៩ ខែមិថុនា ឆ្នាំ២០២៦ កម្លាំងគណៈបញ្ជាការឯកភាពរដ្ឋបាលស្រុកចន្ទ្រា ដោយមានការសម្របសម្រួលពីលោក ខាំ សុផារី ព្រះរាជអាជ្ញា នៃអយ្យការអមសាលាដំបូងខេត្ត ចុះធ្វើរដ្ឋបាល ស្រាវជ្រាវ និងបង្ក្រាបទីតាំងសង្ស័យលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams) នៅចំណុចផ្ទះជួល ស្ថិតក្នុងភូមិចេក ឃុំសំរោង ស្រុកចន្ទ្រា ដោយឃាត់ខ្លួនមនុស្សក្នុងរង្វង់ប្រតិបត្តិការចំនួន ១៣នាក់ ស្រី០៣នាក់ ជាជនជាតិវៀតណាម ។
ដកហូតសម្ភារពាក់ព័ន្ធនឹងបទល្មើសរួមមាន ៖ កំព្យូទ័រលើតុ All-In-One, កុំព្យូទ័រយួរដៃ, ម៉ូនីទ័រ, ធុង CPU, ទូរសព្ទដៃ និងសម្ភារប្រើប្រាស់មួយចំនួនទៀត ។
បច្ចុប្បន្ន ជនសង្ស័យរួមទាំងវត្ថុតាង ត្រូវបានសមត្ថកិច្ចជំនាញ កំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់ រីឯទីតាំងប្រព្រឹត្តិបទល្មើសបានក្រុមការងារបិទសៀល បិទទីតាំងបណ្ដោះអាសន្ន ។
បើតាមសមត្ថកិច្ចបានបង្ហើបឲ្យដឹងថា រហូតមកដល់ថ្ងៃទី១២ មិថុនា ២០២៦នេះ សមត្ថកិច្ចនៅតែបន្តធ្វើរដ្ឋបាលចំហ ទូទាំងខេត្តស្វាយរៀង ដើម្បីស្រាវជ្រាវរកក្រុមឧក្រិដ្ឋជនឆបោកតាមប្រពន្ធ័បច្ចេកវិទ្យា (Online Scams) ហើយបានរកឃើញ និងបង្ក្រាបបានបន្តបន្ទាប់។ ហើយកាលពីវេលាម៉ោង៨និង១០នាទីព្រឹកថ្ងៃទី១០ មិថុនា ២០២៦ កន្លងទៅ មានករណីជនជាតិវៀតណាម បានបើកការបាញ់ប្រហារគ្នា ស្លាប់ម្នាក់ នៅនឹងកន្លែង និងម្នាក់ទៀតស្លាប់ពេលគូកនដឹកទៅដល់មន្ទីរពេទ្យ ៕
ចែករំលែកព័តមាននេះ