ទីក្រុងព្យុងយ៉ាង៖ កូរ៉េខាងជើងប្រកាសថ្កោលទោសអាមេរិកយ៉ាងចាស់ដៃដោយសារការលក់មីស៊ីលតម្លៃរាប់រយលានដុល្លារឱ្យកូរ៉េខាងត្បូង។ ក្រសួងការបរទេសកូរ៉េខាងជើងប្រកាសថ្កោលទោសអាមេរិកដែលអនុម័តលក់មីស៊ីលដ៏ទំនើបបាញ់ពីអាកាសទៅអាកាស និងគ្រឿងបរិក្ខារយោធាជាច្រើនប្រភេទទៀតទៅឱ្យកូរ៉េខាងត្បូង។ ទីក្រុងព្យុងយ៉ាងព្រមានថាភាពតានតឹងដែលមានស្រាប់នៅឧបទ្វីបកូរ៉េនឹងរឹតតែតានតឹងបន្ថែមទៀតដោយសារទង្វើរបស់អាមេរិក។ នេះបើយោងតាមការផ្សាយរបស់ទូរទស្សន៍កូរ៉េខាងជើង ខេស៊ីអឹនអេ (KCNA)។
អគ្គនាយកនៃនាយកដ្ឋានកិច្ចការបរទេសរបស់ក្រសួងការបរទេសកូរ៉េខាងជើងសរសេររៀបរាប់នៅក្នុងសេចក្ដីថ្លែងការណ៍របស់ខ្លួនថាអាមេរិក និងកូរ៉េខាងត្បូងកំពុងពង្រឹងកិច្ចសហប្រតិបត្តិការយោធាជាមួយគ្នាជាខ្សែសង្វាក់ទោះបីសហគមន៍អន្តរជាតិព្រួយបារម្ភអំពីការឡើងកម្ដៅនៅឧបទ្វីបកូរ៉េ និងទីតាំងភូមិសាស្ត្រជុំវិញនោះយ៉ាងណាក្ដី។ មន្ត្រីកូរ៉េខាងជើងខាងលើនេះបាននិយាយយោងទៅលើករណីដែលក្រសួងការបរទេសអាមេរិកអនុម័តលក់មីស៊ីល និងគ្រឿងបរិក្ខារដទៃទៀតទៅឱ្យកូរ៉េត្បូងនៅក្នុងតម្លៃ២៩២លានដុល្លារធ្វើជាឧទាហរណ៍។
មន្ត្រីដដែលនេះសរសេររៀបរាប់បន្តទៀតថាការនាំចេញអាវុធរបស់អាមេរិកប្រៀបបាននឹងការនាំចេញសង្គ្រាមយ៉ាងដូច្នោះដែរ។ កូរ៉េខាងជើងថាខ្លួននឹងបន្តពង្រឹងសមត្ថភាពទប់ទល់របស់ខ្លួនដើម្បីថែរក្សាតុល្យភាពអំណាចនៅក្នុងតំបន់។ តាមពិត ការរិះគន់លើកនេះមិនមែនជារឿងថ្មីទេ។ របបក្រុងព្យុងយ៉ាងតែងតែរិះគន់កិច្ចសហប្រតិបត្តិការយោធារវាងអាមេរិក និងកូរ៉េខាងត្បូងដោយចាត់ទុកថាប្រទេសទាំង២ត្រៀមធ្វើសង្គ្រាមប្រឆាំងនឹងខ្លួន។ ប៉ុន្តែរបបនេះភ្លេចគិតថាខ្លួនក៏ចុះកិច្ចព្រមព្រៀងជាមួយប្រទេសរុស្ស៊ីផងដែរ។ សង្គ្រាមអ៊ុយក្រែនដែលមិនពាក់ព័ន្ធនឹងខ្លួនសោះក៏ខ្លួនបញ្ជូនកងទ័ព និងអាវុធយុទ្ធភ័ណ្ឌទៅឱ្យរុស្ស៊ីដែរ។ បែបនេះគេហៅថាមនុស្សមើលឃើញតែកំហុសអ្នកដទៃ។
គេដឹងថានៅក្នុងចំណោមនោះមានមីស៊ីលម៉ាក 70 AIM-120C-8 AMRAAM សម្រាប់ពង្រឹងសមត្ថភាពការពារខ្លួនរបស់កូរ៉េខាងត្បូង។ ក្រៅពីនេះ មានមីស៊ីល AIM-120C-8 សម្រាប់បាញ់ពីអាកាសទៅអាកាសដូចគ្នា។ មីស៊ីលនេះផលិតឡើងសម្រាប់ផ្សំជាមួយប្រភេទយន្តហោះប្រដេញដ៏ទំនើបម៉ាក F-35។ មីស៊ីលទាំងនេះមានវង់ប្រតិបត្តិការលើសពីកម្រិតធម្មតា ហើយអាចរត់លឿនជាងសំឡេងរហូតដល់៤ដង មានប្រព័ន្ធរ៉ាដាសម្រាប់នាំផ្លូវ។ ក្រៅពីនេះ ក៏មានមីស៊ីល F3R ដែលបំពេញមុខងារដោយឯករាជ្យ ហើយអាចអនុញ្ញាតឱ្យអាកាសយានិកបាញ់ចេញពីយន្តហោះ ហើយបណ្ដោយឱ្យរត់ទៅតាមផ្លូវរបស់វា៕ ប្រភព៖ Reuters និងប្រភពដទៃទៀត
ចែករំលែកព័តមាននេះ