បើតាមការកត់សម្គាល់ឃើញថា ព្រោះតែយល់ខុសចាកគន្លងធម៌នាំឱ្យអ្នកខ្លះលែងស្គាល់បុណ្យបាបអស់ហើយ គេកំពុងប្រមាទហ៊ានសេពគ្រឿងស្រវឹងយ៉ាងសប្បាយអឺងកងក្នុងរដូវបុណ្យកាន់បិណ្ឌ ភ្លេចអស់បុណ្យបាប មិនខ្លាចអបាយភូមិឡើយ ។
អំពើប្រមាទនេះប្រហែលជាពួកគេយល់ថា នឹងធ្វើឲ្យខ្លួនគេទៅជាមនុស្សទាន់សម័យ មនុស្សទំនើប មនុស្សឡូយឆាយបានការសរសើរពីអ្នកស្រុកហើយមើលទៅ ។
ប៉ុន្តែបើពិចារណាឲ្យជ្រៅបន្តិចនឹងឃើញថា ទង្វើបែបនេះមិនមែនជាសកម្មភាពនៃ អ្នកកាន់ព្រះពុទ្ធសាសនាឬអ្នកទាន់សម័យទេ ព្រោះអ្នកទាំងនោះគ្មានបានទទួលផលប្រយោជន៍អ្វី សូម្បីតែបន្តិចបន្តួចពីទង្វើទាំងនោះក៏គ្មានឡើយ។ ពួកគេបានត្រឹមតែងងុយដេក ស្រវឹងអួទីនួនាំឱ្យរង្កៀសចិត្តនៃអ្នកផងទាំងពួង នាំឱ្យខាតពេលវេលា ខាតការងារ បង់ទាំងទ្រព្យសម្បត្តិ បាត់ទាំងឱកាសបំពេញបុណ្យកុសលទៀតផង។ ឯអ្នកដែលចំណេញពីទង្វើទាំងអស់នេះ គឺម្ចាស់អាជីវកម្មអ្នកលក់ដូរឯណោះទៅវិញទេ ។
ចំណែកអ្នកវិទ្យាសាស្ត្រ ដែលជាអ្នកផលិតនូវគ្រឿងស្រវឹងផ្សេងៗនោះ ខ្លួនគេផ្ទាល់មិនបានងប់ងល់វង្វេងដោយទឹកស្រវឹងទាំងនេះឡើយ គឺគេខិតខំធ្វើយ៉ាងណាដើម្បីបង្កើនរស់ជាតិបែបថ្មីៗទៀត ដើម្បីយកលុយពីក្រុមមនុស្សដែលកំពុងវង្វេងនឹងសុរាទាំងនោះឲ្យបានច្រើន ។ (ដោយសាន សារិន)
ចែករំលែកព័តមាននេះ