រាជធានីភ្នំពេញ៖ នៅប៉ុន្មានឆ្នាំចុងក្រោយនេះវិនិយោគិនជនជាតិចិនបានចូលមកបណ្តាក់ទុនវិនិយោគនៅកម្ពុជាឈានមុខគេ ហើយនៅឆ្នាំ២០១៩នេះកម្ពុជានិងចិនបានបង្កើតនូវឱកាសឱ្យវិនិយោគិនរបស់ខ្លួនស្វែងរកកាលនុវត្តភាពនានាបន្ថែមទៀត ខណៈទំហំពាណិជ្ជកម្មរួមកើនដល់ជាង៦ពាន់លានដុល្លារអាមេរិកកាលពីឆ្នាំ២០១៨។
លោក សំ សិរីរតន៍ រដ្ឋលេខាធិការក្រសួងពាណិជ្ជកម្មថ្លែងក្នុងពិធីបើកវេទិកាជំរុញវិនិយោគ កម្ពុជា-ចិន (សានស៊ី) កាលពីថ្ងៃទី១៦ ខែកញ្ញា ឆ្នាំ២០១៩ ថា តាមស្ថិតិគយ និង
រដ្ឋាករកម្ពុជា បានស្តែងឱ្យឃើញថាទំនាក់ទំនងទ្វេភាគីកម្ពុជា-ចិនកាន់តែរីកចម្រើន ដោយទំហំពាណិជ្ជកម្មទ្វេភាគីសរុបបានបន្តកើនឡើងជាបន្តបន្ទាប់ ។ ជាក់ស្តែងសម្រាប់ឆ្នាំ ២០១៨ យើងសម្រេចបាន ៦,៤៥៧ លានដុល្លារ កើនឡើង ១៥% បើធៀបនឹងឆ្នាំ២០១៧ ត្រឹមតែ ៥,៥៧៧ លានដុល្លារ និងបើ ធៀបទៅ ៤ឆ្នាំមុន គឺកាលពីឆ្នាំ២០១៥ ត្រឹមតែ ៤,៣៣៣ លានដុល្លារ កើនឡើង ៤៩%។
លោកបានបញ្ជាក់ថា « អ្នកវិនិយោគចិនជាច្រើន ដែលមានការជឿទុកចំពោះរាជ
រដ្ឋាភិបាលកម្ពុជា ហើយសម្រេចចិត្តដាក់ទុនវិនិយោគច្រើនជាងគេនៅកម្ពុជា។ ជាក់ស្តែង នៅក្នុងតំបន់សេដ្ឋកិច្ចពិសេសខេត្តព្រះសីហនុ ដែលមានផ្ទៃដីសរុប ១,១១៤ហិចតា មានក្រុមហ៊ុនកំពុងវិនិយោគសរុបចំនួន១៣១ក្រុមហ៊ុន ទំហំទុនសរុបប្រមាណ ៤៦១ លានដុល្លារ ក្នុងនោះក្រុមហ៊ុនចិន មានចំនួនដល់ទៅ ១២១ក្រុមហ៊ុន ស្នើនឹង ៩២.៣៦%។ សូចនករទាំងនេះ ជាលទ្ធផលនិងជាកត្តាលិករ នៃការសិក្សាស្វែងយល់អំពីសក្តានុពល និងឱកាសវិនិយោគនៅកម្ពុជា»។
លោករដ្ឋលេខាធិការក្រសួងពាណិជ្ជកម្ម បានបន្តទៀតថា កម្ពុជាបានបន្តធ្វើកិច្ចសហប្រតិបត្តិការជាមួយប្រទេសចិនលើវិស័យនានាទាក់ទងនឹងពាណិជ្ជកម្មជាច្រើនមានដូចជា ការបង្កើតមជ្ឈមណ្ឌលពាណិជ្ជកម្មកម្ពុជា នៅក្នុងទីក្រុងធំៗមួយចំនួននៃប្រទេសចិន ការចុះហត្ថលេខាលើលិខិតប្តូរសារដែលបានផ្តល់ឱ្យកម្ពុជានូវប្រព្រឹត្តិកម្មមិនជាប់ពន្ធគយដែលគ្របដណ្តប់លើ ៩៧% នៃបន្ទាត់ពន្ធគយសរុប, ការចុះហត្ថលេខាលើកិច្ចព្រមព្រៀងស្តីពីការជៀសវាងការយកពន្ធត្រួតគ្នា, ការចុះហត្ថលេខាលើអនុស្សរណៈយោគយល់ស្តីពីពាណិជ្ជកម្មអេឡិចត្រូនិច និងការចុះហត្ថលេខាលើអនុស្សរណៈយោគយល់ស្តីពីកិច្ចសហប្រតិបត្តិការលើកកម្ពស់គុណភាព។
លោកបានបន្ថែមថា កិច្ចសហប្រតិបត្តិការកម្ពុជា-ចិន លើវិស័យនានាទាក់ទងនឹងពាណិជ្ជកម្ម បានសម្រេចនូវលទ្ធផលដ៏ល្អគួរជាទីពេញចិត្ត ដែលលទ្ធផលសំខាន់ៗ រួមមាន៖ ១-) បានចុះហត្ថលេខាលើកិច្ចព្រមព្រៀង ស្តីពីការជៀសវាងការយកពន្ធត្រួតគ្នា, ចុះហត្ថលេខាលើពិធីសារស្តីពី ការនាំចេញអង្ករ ដំឡូងមី ពោត និងផ្លែចេកកម្ពុជាទៅប្រទេសចិន, ការចុះហត្ថលេខាលើលិខិតប្តូរសារ (Exchange of Notes) ដែលបានផ្តល់ជូនកម្ពុជា នូវប្រព្រឹត្តិកម្មមិនជាប់ពន្ធគយគ្របដណ្តប់លើ ៩៧% នៃបន្ទាត់ពន្ធគយសរុប, បានរៀបចំវេទិការធុរកិច្ចជំរុញពាណិជ្ជកម្ម និងវិនិយោគ សហការគ្នារៀបចំពិព័រណ៍ជាតិ និងអន្តរជាតិនានា, និងបានបង្កើតមជ្ឈមណ្ឌលពាណិជ្ជកម្មកម្ពុជានៅក្នុងទីក្រុងចំនួន ០៥ នៅប្រទេសចិន។
២-) ចំពោះក្របខ័ណ្ឌនៃការវិនិយោគផ្ទាល់ពីបរទេសវិញ ផ្អែកតាមការកត់ត្រារបស់ក្រុមប្រឹក្សាអភិវឌ្ឍន៍កម្ពុជា (CDC) ក្នុងរយៈពេល ០៥ ឆ្នាំជាប់ៗគ្នា ពីឆ្នាំ ២០១៤ ដល់ឆ្នាំ ២០១៨ ប្រទេសចិន គឺជាប្រភពទុនវិនិយោគធំជាងគេនៅកម្ពុជាក្នុងបរិមាណសរុប ៨,១ ពាន់លានដុល្លារអាមេរិក ដែលបានបោះទុនវិនិយោគលើគ្រប់វិស័យ ដែលរួមមាន៖ ការវិនិយោគផ្នែកតំបន់សេដ្ឋកិច្ចពិសេស រោងចក្រឧស្សាហកម្ម សហគ្រាស កសិកម្ម សំណង់ និងអចលនទ្រព្យជាដើម។ ៣-) បន្ថែមពីនេះ ដោយកម្ពុជារក្សាបាននូវកំណើនទេសចរណ៍ជារៀងរាល់ឆ្នាំ ក្នុងឆ្នាំ២០១៨ មានអ្នកទេសចរចំនួនប្រមាណ ៦,២ លាននាក់ កើនឡើង ១១% ដែលធ្វើឱ្យវិស័យទេសចរណ៍បានចូលរួមចំណែកប្រមាណជាង ១២.៧% នៃផលិតផលក្នុងស្រុកសរុប។ ក្នុងនោះភ្ញៀវទេសចរណ៍ចិនឈរនៅលំដាប់នាំមុខគេ ដែលមានចំនួនប្រមាណ ១,៩លាននាក់ កើនឡើងជាង ៧០% ហើយធ្វើឱ្យមានជើងហោះហើរត្រង់កម្ពុជា-ចិន កាន់តែច្រើនឡើង៕
ចែករំលែកព័តមាននេះ