រាជធានីភ្នំពេញ ៖ ក្រោយពីព័ត៌មានក្នុងស្រុកចុះផ្សាយពីរឿងពលការិនី១រូបរត់ពីប្រទេសម៉ាឡេស៊ី ហើយបានរៀបរាប់ពីទុក្ខសោកដ៏រន្ធត់ធ្វើឱ្យមានការភ្ញាក់ផ្អើលដល់មជ្ឈដ្ឋាននានានោះ នៅព្រឹកថ្ងៃទី២៧ មីនា ២០១៤ នាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃ ដោយមានការសហការជាមួយស្នងការដ្ឋាននគរបាលខេត្តបាត់ដំបងបានអញ្ជើញនាង និងឪពុករបស់នាងមកសាកសួរដើម្បីបញ្ជាក់ពីការពិត។
នៅចំពោះមុខសមត្ថកិច្ចនាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃ ពលការិនីឈ្មោះពែក ម៉ៅ ហៅហម កែវ អាយុ២១ឆ្នាំ និងឪពុក ដែលមានទីលំនៅភូមិចំនៀង ឃុំគោកឃ្មុំ ស្រុកថ្មគោល ខេត្តបាត់ដំបង បានប្រាប់ឱ្យដឹងថា នាងពិតជាបានចេញពីប្រទេសកម្ពុជាទៅធ្វើការងារតាមផ្ទះនៅប្រទេសម៉ាឡេស៊ីអស់រយៈពេល៣ឆ្នាំពិតមែន តែអ្វីដែលនាងបានរៀបរាប់ប្រាប់អ្នកសារព័ត៌មានកន្លងមកថា មានការកាត់ក្បាលពលការីខ្មែរម្នាក់ច្រកថង់បោះចោលធុងសំរាម និងព័ត៌មានជាច្រើនទៀតពាក់ព័ន្ធពលការិនីខ្មែរត្រូវគេវាយធ្វើបាបនោះមិនមែនជាការពិតទេ វាជារឿងដែលនាងប្រឌិតឡើងដើម្បីឱ្យមានអន្តរាគមន៍ជួយនាងបានវិលមកស្រុកវិញ និងចង់បានបើកប្រាក់ខែពីក្រុមហ៊ុនដែលនាំនាងទៅធ្វើការនៅប្រទេសម៉ាឡេស៊ី៣ឆ្នាំមកហើយមិនទាន់បានសោះ។
ក្រោយពីមានការបំភ្លឺជាផ្លូវការរួចរាល់ នាងពែក ម៉ៅ និងឪពុក បានវិលត្រឡប់ទៅផ្ទះវិញ ហើយនាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃ លោកឧត្តមសេនីយ៍ទោ ប៉ុល ភិធេយ្យ ប្រធាននាយកដ្ឋានខាងលើបាននិងកំពុងយករឿងនេះទៅធ្វើការសិក្សាដើម្បីសហការជាមួយនាយកដ្ឋានកុងស៊ុល និងច្បាប់របស់ក្រសួងការបរទេសដើម្បីចាត់ការតាមនីតិវិធីជៀសវាងល្អក់កករ និងធ្វើឱ្យប៉ះពាល់ដល់មិត្តភាពរវាងប្រទេសទាំង២ កម្ពុជា-ម៉ាឡេស៊ី។
ចែករំលែកព័តមាននេះ