រាជធានីភ្នំពេញ ៖ អ្នកបើកបររ៉ឺម៉កម៉ូតូម្នាក់ឈ្មោះសុខ ចាន់ដែត ភេទប្រុស អាយុ២៦ឆ្នាំ មានទីលំនៅសង្កាត់ច្បារអំពៅទី២ ខណ្ឌមានជ័យ បានរៀបរាប់ថា មានរថយន្តម៉ាកឡិចស៊ីស RX៥៧០ មួយគ្រឿងបើកបុកគាត់ពីក្រោយនៅតាមបណ្តោយផ្លូវម៉ៅសេទុងកែងផ្លូវលេខ១៧៣ ស្ថិតក្នុងសង្កាត់ទំនប់ទឹក ខណ្ឌចំការមន កាលពីវេលាម៉ោង១២ និង៣០នាទីថ្ងៃត្រង់ ថ្ងៃទី២៨ មីនា ២០១៤
រាជធានីភ្នំពេញ ៖ អ្នកបើកបររ៉ឺម៉កម៉ូតូម្នាក់ឈ្មោះសុខ ចាន់ដែត ភេទប្រុស អាយុ២៦ឆ្នាំ មានទីលំនៅសង្កាត់ច្បារអំពៅទី២ ខណ្ឌមានជ័យ បានរៀបរាប់ថា មានរថយន្តម៉ាកឡិចស៊ីស RX៥៧០ មួយគ្រឿងបើកបុកគាត់ពីក្រោយនៅតាមបណ្តោយផ្លូវម៉ៅសេទុងកែងផ្លូវលេខ១៧៣ ស្ថិតក្នុងសង្កាត់ទំនប់ទឹក ខណ្ឌចំការមន កាលពីវេលាម៉ោង១២ និង៣០នាទីថ្ងៃត្រង់ ថ្ងៃទី២៨ មីនា ២០១៤ ហើយបើកគេចបាត់ រួចប្តឹងសមត្ថកិច្ចឱ្យឃាត់យករ៉ឺម៉ករបស់គាត់ទៅកាន់អធិការដ្ឋាននគរបាលខណ្ឌចំការមន វាដូចជាមិនសមហេតុផលសោះ។
ទាក់ទិនហេតុការណ៍គ្រោះថ្នាក់ចរាចរណ៍នេះ ប្រភពព័ត៌មាននៅកន្លែងកើតហេតុបានឱ្យដឹងថា ដំបូងឡើយអ្នកបើករ៉ឺម៉កម៉ូតូខាងលើបានបើកត្រឡប់មកពីដឹកខ្ទឹមសដាក់ឱ្យម៉ូយនៅផ្សារដើមគរក្នុងគោលបំណងត្រឡប់ទៅកន្លែងដេប៉ូលក់ខ្ទឹមនៅផ្សារច្បារអំពៅវិញ ដោយធ្វើដំណើរតាមបណ្តោយផ្លូវម៉ៅសេទុងក្នុងទិសដៅពីជើងទៅត្បូង លុះដល់ចំណុចកើតហេតុខាងលើស្រាប់តែមានរថយន្តមួយគ្រឿងម៉ាកឡិចស៊ីស RX 570 មិនចាំស្លាកលេខដែលបើកបរស្របទិសគ្នាបានបើកមកបុកគាត់ពីក្រោយដោយមិនដឹងខ្លួន ហើយបើករត់គេចទៅបាត់ស្រាប់តែលេចមុខសមត្ថកិច្ច៣ទៅ៤នាក់ចុះមកឃាត់យករ៉ឺម៉កគាត់ទៅរក្សាទុកនៅអធិការដ្ឋាននគរបាលខណ្ឌចំការមនតាមបញ្ជារបស់អ្នកបើករថយន្តទំនើប។
ចំពោះបញ្ហានេះអ្នកឃើញហេតុការណ៍ក៏ដូចជានគរបាលថ្នាក់តូចតាចខ្លះបានលាន់មាត់ថា វាអយុត្តិធម៌ណាស់សម្រាប់ម្ចាស់រ៉ឺម៉កម៉ូតូ ព្រោះថា រថយន្តបង្កបើកបុកពីក្រោយហើយបើកគេចបាត់បែរជាប្តឹងសមត្ថកិច្ចឱ្យឃាត់រ៉ឺម៉កម៉ូតូទៅវិញ ដោយមិនឈប់រថយន្តឱ្យសមត្ថកិច្ចវាស់វែងតាមជំនាញឡើយ។
ជាមួយបញ្ហាខាងលើនេះនគរបាលចរាចរណ៍ខណ្ឌចំការមនដែលចុះវាស់វែងមិនបានបង្ហើបថា ភាគីណាខុស ឬភាគីណាត្រូវឡើយ ទោះបីជាអ្នកកាសែតព្យាយាមសុំសួរអំពីជំនាញយ៉ាងណាក៏ដោយ៕
ចែករំលែកព័តមាននេះ