ខេត្តកណ្តាល ៖ ការសម្រេចចេញដីកាដាក់ពន្ធនាគារជនជាប់ចោទលួចស្វាយនេះ ក៏ស្របពេលគ្នាទៅ
នឹងសំណុំរឿងមិនប្រក្រតីមួយចំនួន កំពុងធ្វើឱ្យមជ្ឈដ្ឋានជាច្រើន កំពុងដាក់ចម្ងល់ពីបញ្ហាគ្រោះថ្នាក់ចរាចរណ៍ នៅស្រុកកៀនស្វាយ២ករណីផ្សេងគ្នា ។ គ្រោះថ្នាក់ចរាចរណ៍មួយផ្តើមឡើងពីការចតរថយន្តនៅលើចិញ្ចើមផ្លូវដោយមិនដាក់ផ្លាកសញ្ញាសម្គាល់ ត្រូវម៉ូតូបើកបុកពីក្រោយស្លាប់ម្នាក់ ក៏ត្រូវបានលោកស្រី ស៊ុន យឺត ព្រះរាជអាជ្ញារងសាលាដំបូងខេត្តកណ្តាល សម្រេចដោះលែង អ្នកបើកបររថយន្តឱ្យមានសេរីភាព កាលពីថ្ងៃទី១៣ កញ្ញា ។
ក្រឡេកមកមើល ជនជាប់ចោទជាចោរលួចស្វាយដែលបានស្តីបន្ទោសថា មិនរាងចាល ក៏ត្រូវបាននគរបាលស្រុកកៀនស្វាយឃាត់ខ្លួនបញ្ជូនទៅសាលាដំបូងខេត្ត ហើយចៅក្រមសម្រេចឃុំខ្លួនដាក់ពន្ធនាគារបណ្តោះអាសន្ន ។ លោកវរសេនីយ៍ ព្រុំ សំណាង បានប្រាប់ឱ្យដឹងថា ជនសង្ស័យពាក់ព័ន្ធករណីលួចស្វាយនេះ លោកសម្រេចធ្វើការឃាត់ខ្លួនបញ្ជូនសំណុំរឿងទៅតុលាការ ដែលតាមចម្លើយរបស់ជនសង្ស័យសារភាពថា រូបគេធ្លាប់លួច២០ដងរួចមកហើយ និងតាមសំណូមពររបស់អ្នកភូមិ ។
លោក ទិន សុចិត្រា ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តកណ្តាលបានប្រាប់ឱ្យដឹងថា ជនសង្ស័យពាក់ព័ន្ធករណីលួចស្វាយ ត្រូវបានលោកស្រី ឈួន សុធា ព្រះរាជអាជ្ញាររងសម្រេចធ្វើការចោទប្រកាន់ពីបទ អំពើលួចតាមមាត្រា៣៥៣,៣៥៦ នៃក្រមព្រហ្មទណ្ឌ ដែលប្រព្រឹត្តនៅភូមិកោះតេជោ ឃុំគគីរធំ ស្រុកកៀនស្វាយ ខេត្តកណ្ដាល កាលពីថ្ងៃទី១៤ កញ្ញា វេលាម៉ោង២១និង៣០នាទី ។
លោក ហេង ផល្លារ ចៅក្រមស៊ើបសួរសម្រេចចេញដីការឃុំខ្លួនដាក់ពន្ធនាគារបណ្តោះអាសន្ន ។ ឯម្ចាស់ស្វាយឈ្មោះ ស៊ុន សុខណា ភេទប្រុស អាយុ៣៣ឆ្នាំ ជាកសិករមានទីលំនៅភូមិ-ឃុំជាមួយគ្នា ។
ជនត្រូវចោទឈ្មោះ ទន់ វី ភេទប្រុស អាយុ២៧ឆ្នាំ មិនពិតប្រាកដ មានទីលំនៅភូមិ-ឃុំកើតហេតុ ។ បើតាមរបាយការណ៍របស់ស្នងការដ្ឋាននគរបាលខេត្តកណ្តាល ជនរងគ្រោះបានទៅចាំឃ្លាំមើលចោរលួចបេះផ្លែស្វាយ ។ ពេលនោះបានឃើញជនសង្ស័យជិះទូកដោយមានពាក់ពិលនៅក្បាលសំដៅមកចំការស្វាយរបស់ខ្លួន រួចធ្វើសកម្មភាពបេះផ្លែស្វាយយកទៅដាក់លើទូក ។ ពេលនោះម្ចាស់ស្វាយបានស្ទុះទៅចាប់យកផ្លែស្វាយដែលដាក់លើទូក រួចអុំទូកមកផ្ទះនិងបានទៅប្រាប់ឪពុកជនសង្ស័យថា កូនគាត់លួចបេះស្វាយ បន្ទាប់មកក៏បានទៅរាយការណ៍ប្រាប់លោកមេភូមិ ។
លុះដល់ថ្ងៃទី១៥ កញ្ញា វេលាម៉ោង៧ព្រឹក ម្ចាស់ស្វាយបានមកប្តឹងកម្លាំងប៉ុស្តិ៍នគរបាលរដ្ឋបាលគគីរធំ ។ ក្រោយទទួលបានពាក្យបណ្តឹងកម្លាំងប៉ុស្តិ៍បានចុះ ដល់កន្លែងកើតហេតុ ឃាត់ខ្លួនជនសង្ស័យរួមនឹងវត្ថុតាងមកប៉ុស្តិ៍ដើម្បីសួរនាំ ។ នៅចំពោះមុខសមត្ថកិច្ចជនសង្ស័យបានឆ្លើយសារភាពពីការលួចស្វាយ ក្នុងចម្ការអ្នកភូមិប្រាកដមែននិងធ្លាប់ធ្វើសកម្មភាពលួចបេះផ្លែស្វាយប្រហែលជាង២០ លើកមកហើយ។ តាមប៉ូលិសថាជនជាប់ចោទធ្លាប់ប្រើប្រាស់គ្រឿងញៀនផងដែរ ។
ចំណែកករណីគ្រោះថ្នាក់ចរាចរណ៍មួយទៀត ផ្តើមឡើងពីបុរសម្នាក់បើករថយន្តបុកម៉ូតូសណ្តោងរ៉ឺម៉កពីក្រោយរងរបួសស្រាល២នាក់ ត្រូវបានលោក គឹម រ័ត្នណារិន ចៅក្រមសាលាដំបូងខេត្តកណ្តាល សម្រេចចេញដីកាឃុំខ្លួនដាក់ពន្ធនាគារបណ្តោះអាសន្ន ។ មជ្ឈដ្ឋានដែលតាមដានសំណុំរឿងនេះ ហាក់មិនយល់អំពីការអនុវត្តច្បាប់បែបស្តង់ដានៃការសម្រេចលើករណីគ្រោះថ្នាក់ចរាចរណ៍ទាំង២នេះ ។
ករណីខាងលើលោក ទិន សុចិត្រា ព្រះរាជអាជ្ញារងនិងជាអ្នកនាំពាក្យអយ្យការសាលាដំបូងខេត្តកណ្តាល បានប្រាប់ឱ្យដឹងថា លោកស្រី ស៊ុន យឺត ព្រះរាជអាជ្ញារងសាលាដំបូងខេត្តកណ្តាល បានសម្រេចដោះលែងអ្នកបើកបររថយន្តឱ្យវិលត្រឡប់ទៅផ្ទះវិញ ដោយពិនិត្យសំណុំរឿង គឺអ្នកបើកបររថយន្តគ្មានកំហុស ។
ប្រភពព័ត៌មានច្បាស់ការណ៍មួយបង្ហេីបឱ្យដឹងថា ករណីគ្រោះថ្នាក់ចរាចរណ៍នេះកើតឡេីងដោយសាររថយន្តចតគ្មានដាក់សញ្ញាសម្គាល់ពេលយប់ ទើបម៉ូតូបេីកបុកពីក្រោយបណ្តាលឱ្យជនរងគ្រោះស្លាប់ ។
ក្រោយកេីតហេតុ ម្ចាស់រថយន្តបានបេីកគេច រហូតបែកកង់រថយន្តទេីបសមត្ថកិច្ចតាមចាប់បានមកវិញ ។
អ្នកបើកបររថយន្តឈ្មោះ ណាត បូរី ភេទប្រុស អាយុ៣៣ឆ្នាំ មានទីលំនៅភូមិត្រពាំងស្រែ ឃុំត្រពាំងស្រែ ស្រុកមេសាង ខេត្តព្រៃវែង ។ ជនរងគ្រោះឈ្មោះទេព សុវណ្ណ ភេទប្រុស អាយុ៥៣ឆ្នាំ មានទីលំនៅភូមិស្វាយចេក ឃុំស្វាយធំ ស្រុកស្វាយធំ ខេត្តស្វាយរៀង ។
ដោយឡែក ករណីគ្រោះថ្នាក់ចរាចរណ៍គ្រាន់តែរបួសស្រាលពីរនាក់ តុលាការសម្រេចឃុំខ្លួនដាក់ពន្ធនាគារបណ្តោះអាសន្ននោះ ដែលហេតុការណ៍នេះបានកើតឡើងថ្ងៃទី១០ កញ្ញា វេលាម៉ោង៧និង៣០នាទីព្រឹកនៅលើផ្លូវជាតិលេខ១ ចន្លោះបង្គោលគីឡូម៉ែត្រលេខ២៥ លេខ២៦ ចំណុចភូមិស្តៅកន្លែង២ ឃុំដីឥដ្ឋ ស្រុកកៀនស្វាយ ខេត្តកណ្តាល ។ ប្រភពព័ត៌មានថា រថយន្តម៉ាកហាយឡែនឌ័រ ពណ៌ទឹកប្រាក់ ពាក់ផ្លាកលេខ ភ្នំពេញ 2AZ-9042 បើកបរដោយឈ្មោះ ណាត វ៉ាន់ដារ៉ា ភេទប្រុស អាយុ២៨ឆ្នាំ ជនជាតិខ្មែរ មានទីលំនៅភូមិសួងលិច សង្កាត់សួង ក្រុងសួង ខេត្តត្បូងឃ្មុំ ដោយបើកបរមានទិសដៅពីអ្នកលឿងទៅភ្នំពេញ តាមផ្លូវជាតិលេខ១ ។
ពេលបើកមកដល់កន្លែងកើតហេតុខាងលើបាន បើកបុកពីក្រោយម៉ូតូសណ្តោងរ៉ឺម៉កម៉ាក SANG YANG 125 ពណ៌ខ្មៅ គ្មានផ្លាកលេខ បើកបរដោយឈ្មោះ សេង ម៉ៅ ភេទប្រុស អាយុ៤១ឆ្នាំ មានទីលំនៅ ភូមិក្បាលជ្រោយ ឃុំកំពង់ភ្នំ ស្រុកលើកដែក ខេត្តកណ្តាលដែលបើកបរក្នុងទិសដៅស្របគ្នា ។
ការបុកនោះធ្វើឱ្យម៉ូតូសណ្តោងរ៉ឺម៉កបានខ្ទាតទៅបុកឈ្មោះ ទូច ភេទប្រុស អាយុ៦៨ឆ្នាំ ដែលបម្រុងដើរឆ្លងថ្នល់បណ្តាលឱ្យអ្នកបើកបរម៉ូតូឈ្មោះ សេង ម៉ៅ រងរបួសស្រាល និងរបួសធ្ងន់ឈ្មោះ ទូច (ពកក្បាល)បញ្ជូនទៅព្យាបាលនៅមន្ទីរពេទ្យបង្អែកស្រុកកៀនស្វាយ ។ ចំណែករថយន្តបង្កបាន បើករត់គេចចេញពីកន្លែងកើតហេតុមកដល់ផ្សារគគីរនគរបាលចរាចរណ៍ ចាប់ឃាត់រថយន្តនិងអ្នកបើកបរយកមកអធិការដ្ឋាននគរបាលស្រុក ៕ (សម្រួលដោយ៖ ស្រីណា)
ចែករំលែកព័តមាននេះ