រាជធានីភ្នំពេញ ៖ ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ នាព្រឹកថ្ងៃទី១៨កញ្ញានេះ លោក ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណ:បញ្ជាការឯកភាព រាជធានីភ្នំពេញបានលើកឡើងថា អាជ្ញាធរភ្នំពេញនឹងមិនលើកលែងដល់អ្នកបើកល្បែងស៊ីសង រួមទាំងអ្នកលេងផង ដែលជ្រកក្រោមស្លាកកាហ្វេ ឬណេតអនឡាញឡើយ ។
ចំពោះអ្នកប្រកបរបរអាជីវកម្មណេតកាហ្វេ Online ដោយមានបង្កប់ល្បែងស៊ីសង គឺមានទោសទាំងអ្នកលេង និងម្ចាស់ទីតាំងដែលអាជ្ញាធរមានសមត្ថកិច្ចក៏ដូចអាជ្ញាធរដែនដីត្រូវត្រួតពិនិត្យឲ្យបានម៉ត់ចត់បំផុត ។
លោកឃួង ស្រេង បានអោយដឹងទៀតថា សម្រាប់ខែនេះ គឺជាខែដែលបងប្អូនប្រជាពលរដ្ឋបាន និងកំពុងប្រារព្ធនូវពិធីកាន់បិណ្ឌ ភ្ជុំបិណ្ឌ ដូច្នេះទេកងកម្លាំងប្រដាប់អាវុធទាំង២ភេទ អាជ្ញាធរដែនដី កម្លាំងពាក់ព័ន្ធទាំងអស់ត្រូវតែពង្រឹងបន្ថែមនូវកិច្ចការពារសុវត្ថិភាពជូនប្រជាពលរដ្ឋ ដោយប្រជាពលរដ្ឋត្រូវធ្វើដំណើរទៅវត្តអារាមក៏ដូចជា ចាកចេញពីផ្ទះទៅកាន់បណ្ដាខេត្តនានា និងចាកចេញពីរាជធានីភ្នំពេញទៅស្រុកកំណើតរបស់ពួកគាត់ ។
ដូច្នេះយើងត្រូវការពារភូមិឋានលំនៅឋានរបស់ពួកគាត់ ពិសេសលើបទល្មើសចោលកម្ម លួច ឆក់ ប្លន់ជាដើម ។ លោកអភិបាលបានបញ្ជាក់ថា កន្លងមកនេះឃើញថា ការអនុវត្តការងារ ពិសេសការទប់ស្កាត់នូវបទល្មើសផ្សេងៗ ឃើញថា មានលក្ខណៈល្អប្រសើរហើយ តែយើងមិនត្រូវបន្ធូដៃទេ គឺត្រូវខិតខំប្រឹងប្រែងបន្ថែមទៀត ។
ពាក់ព័ន្ធនឹងពិធីបុណ្យកាន់បិណ្ឌ និងភ្ជុំបិណ្ឌសូមឲ្យមានការពង្រឹងសន្តិសុខសណ្តាប់ធ្នាប់តាមទីអារាមទាំងអស់ក្នុងរាជធានីភ្នំពេញការសំរួលចរាចរណ៍ជូនប្រជាពលរដ្ឋធ្វើដំណើរឲ្យបានស្រួល ជាពិសេសក្នុងរយៈពេល៣ថ្ងៃនៃថ្ងៃឈប់សម្រាកបុណ្យភ្ជុំ៣ថ្ងៃ សុំឲ្យសមត្ថកិច្ចជួយមើលផ្ទះសំបែងប្រជាពលរដ្ឋ និងដាក់វេនប្រចាំការឲ្យបានជាប់ជាប្រចាំ និងផ្សព្វផ្សាយពីការទប់ស្កាត់គ្រោះអគ្គិភ័យផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ