រាជធានីភ្នំពេញ ៖ បុរសជនជាតិចិនម្នាក់បើករថយន្តលឿនចៀសរ៉ឺមកកង់បីមួយគ្រឿង ស្រាប់តែរេចង្កូតបុករះចូលផ្ទះលក់ហ្គាស និងចាប់ហួយ បណ្តាលឱ្យរងការខូចខាតយ៉ាងធ្ងន់ធ្ងរ និងបង្កអោយមានការភ្ញាក់ផ្អើលកាលពីវេលាម៉ោង៧និង៣០នាទីយប់ថ្ងៃទី១៧ ខែកញ្ញា ២០១៩ តាមបណ្ដោយផ្លូវបេតុលេខ៦៨K…
រាជធានីភ្នំពេញ ៖ បុរសជនជាតិចិនម្នាក់បើករថយន្តលឿនចៀសរ៉ឺមកកង់បីមួយគ្រឿង ស្រាប់តែរេចង្កូតបុករះចូលផ្ទះលក់ហ្គាស និងចាប់ហួយ បណ្តាលឱ្យរងការខូចខាតយ៉ាងធ្ងន់ធ្ងរ និងបង្កអោយមានការភ្ញាក់ផ្អើលកាលពីវេលាម៉ោង៧និង៣០នាទីយប់ថ្ងៃទី១៧ ខែកញ្ញា ២០១៩ តាមបណ្ដោយផ្លូវបេតុលេខ៦៨K ភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ ។
រថយន្តបង្កម៉ាកតាកូម៉ា ពណ៌ទឹកប្រាក់ ពាក់ស្លាកលេខ ភ្នំពេញ ២AK-១០៧៣ បើកបរដោយបុរសជនជាតិចិនម្នាក់ មិនស្គាល់អត្តសញ្ញាណ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញរថយន្តម៉ាកតាកូម៉ាមួយគ្រឿងបើកបរដោយបុរសជនជាតិចិនម្នាក់ធ្វើដំណើរក្នុងទិសដៅពីលិចទៅកើតក្នុងល្បឿនយ៉ាងលឿន លុះមកដល់ចំណុចកើតហេតុខាងលើ ដោយមានរ៉ឺមកកង់បីមួយគ្រឿងដែលឈប់នៅខាងមុខ ស្រាប់តែរថយន្តបានបើកចៀសធ្វើឱ្យរេចង្កូតទៅផ្នែកខាងឆ្វេងឡើងខឿនចិញ្ចើមផ្លូវបុកចូលផ្ទះលក់ហ្គាស និងចាប់ហួយ ។
តាមប្រភពដដែលបានបន្តទៀតថា ក្នុងហេតុការណ៍ខាងលើ រថយន្ដបង្កប៊ិះនឹងបុកធុងហ្គាសដែលដាក់លក់ក្នុងផ្ទះលក់ចាប់ហួយដែរ តែសំណាងល្អគ្រាន់តែបុកអីវ៉ាន់ចាប់ហួយ បណ្តាលឱ្យរងការខូចខាតយ៉ាងធ្ងន់ធ្ងរផងដែរ ។
តាមប្រភពព័ត៌មានពីសមត្ថកិច្ចដែលបានសាកសួរនៅកន្លែងកើតហេតុបានបញ្ជាក់ថា ខណៈពេលកំពុងបើកបរក្នុងល្បឿនលឿនបានអកហ្សឺនឹងរ៉ឺមកកង់បីមួយគ្រឿងកំពុងចតចោល ហើយអ្នកបើកបរដែលជាជនជាតិចិនបានជាន់ហ្គាបន្ថែមល្បឿនបណ្តាលឱ្យបុកចូលផ្ទះលក់ចាប់ហួយតែម្តង និងបើករុលទៅមុខមិនក៏រួច ថយក្រោយក៏មិនរួច ត្រូវបានម្ចាស់ផ្ទះ ព្រមទាំងប្រជាពលរដ្ឋឃាត់អ្នកបើកបររថយន្តបង្កបានភ្លាមៗ ។ ប្រភពព័ត៌មានបានបន្តទៀតថាខណៈពេលភ្លាមៗនោះដោយមានតំណាងខាងរថយន្តបង្កមកសំរបសំរួល ជាមួយម្ចាស់ផ្ទះ តែដោះស្រាយមិនចេញ ទើបកំលាំងនគរបាលប៉ុស្តិ៍បានទាក់ទងទៅផ្នែកជំនាញមកភ្លាមៗផងដែរដើម្បីសំរបសំរួលបន្ថែម។
ក្រោយពេលកើតហេតុ ជំនាញចរាចរណ៍ខណ្ឌពោធិ៍សែនសែនជ័យបានប្រគល់ទៅឱ្យផ្នែកជំនាញការិយាល័យចរាចរណ៍ផ្លូវគោករាជធានីភ្នំពេញដើម្បីយករថយន្ត ព្រមទាំងអ្នកបើកបរខាងលើយកទៅផ្នែកជំនាញរង់ចាំធ្វើការដោះស្រាយនៅពេលក្រោយ ៕ (កែសម្រួលដោយ ៖ ធីតា)
ចែករំលែកព័តមាននេះ