រាជធានីភ្នំពេញ៖​ សាលារាជធានីភ្នំពេញ​បានអនុញ្ញតឲ្យ​គណបក្សសង្គ្រោះជាតិ​រៀបចំពិធីបែបសាសនា ​( បង្សុកូល ) ​នៅចេតិយ​ខាងមុខ​​អតីតមន្ទីររដ្ឋសភា​ នៅថ្ងៃទី៣០​ មីនា​ ២០១៤ ​ប៉ុន្តែមិនអនុញ្ញាត​ឲ្យគណបក្ស​​សង្គ្រោះជាតិ​ធ្វើសមាជនៅទីលាន​ប្រជាធិបតេយ្យ​នោះទេ ។

នេះបើយោងតាម​អ្នកនំាពាក្យ​សាលារាជធានីភ្នំពេញ ​លោក ឡុង ឌីម៉ង់​ ដែលបា្រប់​កោះសន្តិភាព​តាមទូរស័ព្ទនៅរសៀលថ្ងៃទី២៧​ មីនា​ ២០១៤ ​។ បើតាមលោក ​ឡុង ឌីម៉ង់ ​ការសម្រេចខាងលើនេះ បាន​ធ្វើឡើង​នៅក្នុង​កិច្ចប្រជុំពីរករណីផ្សេងគ្នា​ ជាមួយ​តំណាង​គណបក្ស​សង្គ្រោះជាតិ​ ដែលតំណាង​សាលារាជធានី​ភ្នំពេញ​ដឹកនំាដោយ​ លោក កើត ឆែ ​នាយកទីចាត់កា​ររដ្ឋបាល ​និង​ តំណាងគណបក្ស​សង្គ្រោះ​ជាតិ ​ដឹកនំាដោយ​លោក ហូរ វ៉ាន់ ។

ក្នុងកិច្ចប្រជុំនៅ​សាលារាជធានីភ្នំពេញ​ កាលពីព្រឹកថ្ងៃទី២៧​មីនានេះដែ​រ ក៏មានការចូលរួម​ពីតំណាង​មកពីគ្រប់ស្ថាប័ន​កងកម្លំាង​ប្រដាប់អាវុធ ​និងអាជ្ញាធរដែនដី​ផងដែរ ។ យ៉ាងណាក៏ដោយ​អ្នកនំា​ពាក្យ​សាលារាជធានី​ភ្នំពេញ​បានបញ្ជាក់ឲ្យដឹង​ទៀតថា ​ករណីដែល​គណបក្សសង្គ្រោះជាតិ​សុំរៀបចំពិធី​តាមបែប​សាសនា​នោះ​​ សាលារាជធានីភ្នំពេញ​ក៏បានសុំគោលការណ៏​ពីក្រសួងមហាផ្ទៃ ​ព្រោះតាម​គម្រោង​​ពិធីនេះ ​គណបក្សសង្គ្រោះជាតិ​ក៏មានការអញ្ជើញ​តំណាងអង្គទូត​ប្រទេសមួយចំនួនចូលរួម​ ដូច្នេះសាលាក្រុង​ត្រូវត្រៀមលក្ខណៈ​ការពារសន្តិសុខ​ សុវត្ថិភាព​សម្រាប់មន្រ្តីស្ថានទូត​ទំាងនោះ ។

ដោយឡែក​ទាក់ទងទៅ​នឹងការសុំរៀបចំធ្វើសមាជ​ប្រជាជននៅថ្ងៃទី៣០មីនា​ពីសំណាក់​គណបក្សសង្គ្រោះជាតិ​នោះវិញ ​សាលារាជធានីភ្នំពេញ ​មិនអនុញ្ញាតជាដាច់ខាត ​ព្រោះទីលាន​ប្រជាធិបតេយ្យ​​ត្រូវ​បានបិទជាបណ្តោះអាសន្ន​មិនឲ្យមានការប្រមូលផ្តុំ​តវ៉ានោះទេ ​រហូតដល់បញ្ចប់ការ​ស៊ើបអង្កេតករណី​ហិង្សាកាលពីថ្ងៃទី០២​-០៣ មករា ​២០១៤ ​និងការបង្ខំាងមន្រ្តីរាជការ​សាលារាជធានីភ្នំ​ពេញ ពីព្រោះ​តែអ្នកបង្ខំាងនោះ​ ត្រូវគេរាយការណ៏ថា​ ចេញមកពីក្រុមបាតុករ​នៅទីលានប្រជាធិបតេយ្យ​អំឡុងពេលនោះ ។ 

យ៉ាងណាក៏ដោយ​ បើតាមមន្រ្តី​គណបក្សសង្គ្រោះជាតិ ​ជំហររបស់ខ្លួន ​នៅតែជួបជុំគ្នា​​ធ្វើពិធី​គោរពវិញ្ញាណក្ខន្ឋ​រំលឹកខួបឆ្នាំទី១៧ ​នៃការណ៏ដែលជន​មិនស្គាល់អត្តសញ្ញាណ​បានគប់គ្រាប់បែកដៃ​ចំនួន៤គ្រាប់ចូលទៅក្នុង​ក្រុមបាតុករ​ដឹកនំាដោយគណបក្សជាតិ​ខ្មែរ​របស់លោក សម រង្ស៊ី​ កាលពីថ្ងៃទី៣០​ មីនា​ ១៩៩៧ ​និង ​ការធ្វើសមាជប្រជាជន​នៅពេលរសៀលថ្ងៃ៣០មីនាដដែលនោះ ​ដោយមានមនុស្ស​ចូលរួម​ប្រមាណ៥ពាននាក់ ៕