ខេត្តបាត់ដំបង ៖ កម្លាំងរបស់ការិយាល័យព្រហ្មទណ្ឌកម្រិតស្រាលនៃស្នងការដ្ឋានខេត្តបានឆ្មក់ចូលទៅបង្ក្រាបល្បែងស៊ីសងដុះស្លែមួយកន្លែងដែលនៅមិនឆ្ងាយប៉ុន្មានពីបញ្ជាការមូលដ្ឋានកងរាជអាវុធហត្ថ និងអធិការនគរបាលស្រុកសង្កែ ស្ថិតក្នុងភូមិអន្លង់វិល ឃុំអន្លង់វិល ស្រុកសង្កែ កាលពីរសៀលថ្ងៃទី២៦ មីនា ២០១៤ ខណៈសមត្ថកិច្ចស្រុកនេះដេកលក់មិនអើពើ ។
ខេត្តបាត់ដំបង ៖ កម្លាំងរបស់ការិយាល័យព្រហ្មទណ្ឌកម្រិតស្រាលនៃស្នងការដ្ឋានខេត្តបានឆ្មក់ចូលទៅបង្ក្រាបល្បែងស៊ីសងដុះស្លែមួយកន្លែងដែលនៅមិនឆ្ងាយប៉ុន្មានពីបញ្ជាការមូលដ្ឋានកងរាជអាវុធហត្ថ និងអធិការនគរបាលស្រុកសង្កែ ស្ថិតក្នុងភូមិអន្លង់វិល ឃុំអន្លង់វិល ស្រុកសង្កែ កាលពីរសៀលថ្ងៃទី២៦ មីនា ២០១៤ ខណៈសមត្ថកិច្ចស្រុកនេះដេកលក់មិនអើពើ ។
លោកម៉េង លៀង នាយរងការិយាល័យព្រហ្មទណ្ឌកម្រិតស្រាលបាននិយាយថា តាមសេចក្តីរាយការណ៍កន្លងមកវង់ល្បែងនេះបានដំណើរការអស់រយៈពេលជាយូរមកហើយរហូតដល់អ្នករស់នៅតំបន់នោះ ឬអ្នកចេញចូលលេងល្បែងហៅឈ្មោះភូមិនោះថា ជាភូមិល្បែង។
លោកបានបន្តថា អ្នកភូមិមួយចំនួនដែលមិនសប្បាយចិត្តនឹងវង់ល្បែងដ៏វក់វីនៅក្នុងមូលដ្ឋាននេះតែងតែទូរស័ព្ទប្តឹងមកសមត្ថកិច្ចស្នងការជារឿយៗស្នើឱ្យជួយចុះបង្ក្រាប ខណៈពួកគេមិនអាចពឹងពាក់សមត្ថកិច្ចស្រុកសង្កែឱ្យជួយអន្តរាគមន៍បាន។ ដូច្នេះហើយទើបលោកស្នងការខេត្តបញ្ជាឱ្យកម្លាំងរបស់លោកចុះបង្ក្រាបតែម្តង។
ជាមួយនឹងប្រតិបត្តិការបង្ក្រាបនេះ សមត្ថកិច្ចបានឃាត់ខ្លួនក្រុមអ្នកញៀនល្បែងប្រុស ស្រីចំនួន៧នាក់ ខណៈរាប់សិបនាក់ទៀតបានរត់រួច។ អ្នកញៀនល្បែងទាំង៧នាក់ ១-ឈ្មោះសាំង សាវៀង ភេទប្រុស អាយុ៣០ឆ្នាំ ជាមេខ្លោង, ២-ឈ្មោះយឿន ធួក ភេទស្រី អាយុ៤៥ឆ្នាំ, ៣-ឈ្មោះដន មុំ ភេទស្រី អាយុ២៩ឆ្នាំ, ៤-ឈ្មោះតាំង ប៊ុនហៀង ភេទប្រុស អាយុ៥២ឆ្នាំ, ៥-ឈ្មោះហូត សាមឿន ភេទប្រុស អាយុ៣៥ឆ្នាំ, ៦-ឈ្មោះឆាម ស៊មុត ភេទប្រុស អាយុ៤៧ឆ្នាំ និង៧-ឈ្មោះប៉ាង សាភឿត ភេទប្រុស អាយុ៥២ឆ្នាំ។
សមត្ថកិច្ចបញ្ជាក់ថា បនល្បែងនៅទីនោះមានច្រើនវង់ ក្នុងនោះមានអាប៉ោង និងបៀរ ហើយមានមេខ្លោង៣នាក់ ឃាត់ខ្លួនបានម្នាក់ និង២នាក់បានរត់រួច គឺឈ្មោះហឹង វន អាយុ៣៥ឆ្នាំ និងឈ្មោះហ៊ាប អាយុ៤១ឆ្នាំ។ ក្រៅពីឃាត់ខ្លួនក្រុមអ្នកលេងខាងលើ សមត្ថកិច្ចបានដកហូតម៉ូតូ៤គ្រឿង ចានបាញ់អាប៉ោង១ និងបៀរជាច្រើនបញ្ជូនមកកាន់ស្នងការដ្ឋានខេត្ត៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ