ខេត្តកណ្ដាល ៖ ស្ត្រីម្នាក់ធ្លាប់មានប្ដី២រូចមកហើយ ព្រមទាំងមានកូន២ផងដែរ ដោយសារឆោតល្ងង់សុខចិត្តប្រគល់ខ្លួនឱ្យទៅគ្រូទាយកាត់ប្រជ្រុយធ្វើតាមអំពើចិត្តដោយសារតែចង់បានស្នេហ៍ហ្មដំរី រកគូស្នេហ៍ថ្មីដែលគាប់ប្រសើរ ។ បើកុំបានម្ដាយមកទាន់ប្ដឹងប៉ូលិសឱ្យចាប់ ម្លេ៉ះក្លាយជាចំណីរបស់គ្រូទាយបាត់ទៅហើយ ។
ហេតុការណ៍បានកើតឡើងកាលពីវេលាម៉ោងជាង៦ល្ងាចថ្ងៃទី២៥ មីនា នៅភូមិក្រូច ឃុំរការ ស្រុកកណ្ដាលស្ទឹង ។ លោកអនុសេនីយ៍ឯក ទឹម សេង អធិការរងស្រុកកណ្ដាលស្ទឹងទទួលបន្ទុកព្រហ្មទណ្ឌបានឱ្យដឹងថា ស្ត្រីរងគ្រោះជាកម្មការិនីរោងចក្រ អាយុ៣២ឆ្នាំ មានទីលំនៅក្នុងឃុំរកា ស្រុកកណ្ដាលស្ទឹង ។ រីឯជនសង្ស័យឈ្មោះវ៉ាន់ មាឃ អាយុ៤២ឆ្នាំ ជាគ្រូទស្សន៍ទាយ និងមន្តអាគមមានទីលំនៅភូមិរកា ឃុំរកា ស្រុកកណ្ដាលស្ទឹង ។
បើតាមសាក្សីនិយាយថា នៅវេលាម៉ោងប្រហែល៦ល្ងាចថ្ងៃទី២៥ មីនា កម្មការិនី ដែលជាស្ត្រីមេមា៉យកូន២រូបនេះបានទៅរកគ្រូទាយឈ្មោះវ៉ាន់ មាឃ ឱ្យធ្វើការទស្សន៍ទាយមើលរាសី និងធ្វើស្នេហ៍ឱ្យ នៅមុខផ្ទះឈ្មោះសុទ្ធ សុផា ដែលត្រូវជាមិត្តភក្ដិ ។ ស្រាប់តែមួយសន្ទុះក្រោយមានការឆោឡោឡើងចោទប្រកាន់គ្រូទស្សន៍ទាយឈ្មោះវ៉ាន់ មាឃ ថាបានចាប់រំលោភកម្មការិនីរូបនេះហើយសមត្ថកិច្ចបានធ្វើការឃាត់ខ្លួនឈ្មោះវ៉ាន់ មាឃ តែម្ដង ។
បើតាមសម្ដីស្ត្រីរងគ្រោះបានប្រាប់សមត្ថកិច្ចឱ្យដឹងថា រូបនាងនិងនាងសុទ្ធ សុផា ជាមិត្តភក្ដិនឹងគ្នា ។
ការដែលរូបនាងបានស្គាល់គ្រូទាយឈ្មោះ វ៉ាន់ មាឃ ក៏តាមរយៈនាងសុទ្ធ សុផា ដែរ គឺកាលពីថ្ងៃទី២៤ មីនា ២០១៤ នាងបានទៅផ្ទះឈ្មោះសុទ្ធ សុផា និងបានឱ្យគ្រូឈ្មោះ វ៉ាន់ មាឃ ទស្សន៍ទាយមើលរាសីឱ្យ ព្រោះថា រូបនាងមានប្តី២នាក់ហើយ ចេះតែបែកបាក់ ហើយថ្ងៃនោះត្រូវគ្រូទាយឈ្មោះវ៉ាន់ មាឃ ប្រាប់ថា បើចង់មើលច្បាស់យកលេខទូរស័ព្ទរបស់គាត់ និងណាត់ជួបគ្នាកន្លែងណាម្តងទៀត ចាំគន់គូរមើល ក្រែងមានឧបសគ្គចង្រៃជម្រះវាចោល ទើបមានស្នេហ៍ស័ក្តិសិទ្ធឡើងវិញ ។ នាងបន្តទៀតថា នៅវេលាម៉ោង៥ល្ងាចថ្ងៃទី២៥ មីនា ពេលនាងចេញពីធ្វើការរោងចក្រមកដល់ផ្ទះ នាងក៏ទូរស័ព្ទទៅគ្រូទាយ វ៉ាន់ មាឃ ពេលនោះគាត់បានប្រាប់នាងឱ្យទៅផ្ទះឈ្មោះ សុទ្ធ សុផា មើលទស្សន៍ទាយនៅទីនោះ ។ ពេលទៅដល់ផ្ទះនោះមានរូបនាង និងឈ្មោះសុទ្ធ សុផា ហើយនិងលោកគ្រូ វ៉ាន់ មាឃ ។
ដំបូងគ្រូ វ៉ាន់ មាឃ ទស្សន៍ទាយមើលរាសីឱ្យនាងសុទ្ធ សុផា នៅត្រង់រានហាល (យ៉មុខផ្ទះ) ពេលដែលមើលចប់គឺដល់វេននាងម្តង តែគ្រូទាយនោះប្រាប់ថា ការមើលទស្សន៍ទាយរូបនាងមិនអាចមើលនៅត្រង់យ៉មុខផ្ទះនេះបានទេ ព្រោះត្រូវមើលឱ្យច្បាស់ ដើម្បីរកប្រជ្រុយចង្រៃត្រូវតែដុតចោល និងបញ្ចូលមន្តស្នេហ៍បន្ថែមទៀត ដូច្នេះត្រូវតែស្ងាត់ និងបន្ទប់បិទជិត ទើបស្នេហ៍វាខ្លាំង ។ នាងរៀបរាប់ទៀតថា ខណៈពេលនាងសុទ្ធ សុផា ចុះទៅចម្អិនអាហារ ឯរូបនាងត្រូវគ្រូទាយហៅឱ្យចូលក្នុងបន្ទប់ និងឱ្យអុជធូបទៀន បន្ទាប់មកឱ្យនាងដោះខោអាវចេញ ស្លៀកសារុង និងឱ្យដេកសណ្តូកជើង ។ ពេលនោះនាងមានអារម្មណ៍គិតថា ហេតុអ្វីបានជាធ្វើបែបនេះ ក៏ស្រែកសួរទៅនាងសុទ្ធ សុផា តែត្រូវនាង សុទ្ធ សុផា ឆ្លើយថា «ធ្វើតាមគ្រូទៅ ទើបទទួលបានស្នេហ៍ស័ក្តិសិទ្ធ ហើយបើអ្នកផ្សេងវិញគ្រូយកទ្រនឹប២០ដុល្លារឯណោះ ដូច្នេះឯងតថ្លៃគាត់១០ដុល្លារទៅ ហើយបើអត់លុយ និយាយជាមួយគាត់ទៅ »។
ស្ត្រីរងគ្រោះបន្តថា ពេលនោះ គ្រូវ៉ាន់ មាឃ ឆ្លើយថា «បើអត់លុយអត់ទៅ គ្រូធ្វើស្នេហ៍ឱ្យ »បន្ទាប់មកគាត់ចាប់ផ្តើមសូត្រផ្លុំ ធ្វើមាត់ជិបអូចៗ និងយកដៃរាវអង្អែលប្រដាប់ភេទនាង រកមើលប្រជ្រុយ តែរកមិនឃើញ លោកគ្រូនោះបានបញ្ជាក់ថា ដូច្នេះត្រូវតែយកទឹកកាមទាំង២នាក់ ដាក់ក្នុងថង់ទៅឱ្យគ្រូមើលនៅផ្ទះ ទើបធ្វើស្នេហ៍ស័ក្តិសិទ្ធិ និងមានឥទ្ធិពល មិនអាចសាបសូន្យ នាងក៏យល់ព្រមឱ្យលោកគ្រូនោះពោបនៅពីលើនាង ស្រាប់តែម្តាយមកទាន់តែម្តង ។ សាក្សីនិយាយថា ម្តាយស្ត្រីរងគ្រោះបានមកទាន់ឃើញកូនកំពុងនៅក្នុងបន្ទប់ជាមួយគ្រូទាយនោះ គឺដោយសារតែកូនស្រីគាត់ពេលដែលមកពីធ្វើការដល់ផ្ទះមិនបានដោះដូរសម្លៀកបំពាក់ទេ គឺចេញទៅក្រៅបាត់រយៈពេលប្រហែល១ម៉ោង គាត់មានការងឿងឆ្ងល់ ក៏ដើររក ស្រាប់តែឃើញស្បែកជើងកូនស្រីនៅត្រង់កាំជណ្តើរផ្ទះឈ្មោះ សុទ្ធ សុផា ពេលនោះគាត់ក៏ស្ទុះឡើងតាមកាំជណ្តើរទៅរុញទ្វារបន្ទប់ ក៏ស្រឡាំងកាំងតែម្តង ។
លោកអនុសេនីយ៍ឯក ទឹម សេង បានឱ្យដឹងថា តាមពាក្យបណ្តឹងរបស់ស្ត្រីរងគ្រោះ និងម្តាយ គឺជនឈ្មោះ វ៉ាន់ មាឃ ជាប់ចោទពីបទរំលោភសេពសន្ថវៈ ដោយគ្រូទាយរូបនេះបានប្រើវិធីលួងលោម និងល្បិចកលបោកបញ្ឆោតស្ត្រីរងគ្រោះ ដើម្បីបំពេញបំណងតណ្ហារបស់ខ្លួន ។
គ្រូទាយឈ្មោះ វ៉ាន់ មាឃ បានសារភាពថា រូបគេបានធ្វើសកម្មភាពបែបនេះមែន ដោយឃើញថា នាងជាស្ត្រីមេម៉ាយ ហើយរូបគេលួចស្រឡាញ់នាងជាយូរមកហើយ ក៏រកវិធីបែបនេះទៅ តែមិនទាន់បានដល់ទីជម្រៅផង ស្រាប់តែម្តាយមកទាន់ ក៏ចាប់អាវគេជាប់តែម្ដង ។ ពេលនេះគ្រូទាយឈ្មោះ វ៉ាន់ មាឃ ត្រូវសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់ ៕
ចែករំលែកព័តមាននេះ