រាជធានីភ្នំពេញ ៖ នគរការិយាល័យព្រហ្មទណ្ឌកម្រិតស្រាល នៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ កាលពីវេលាម៉ោងប្រមាណ៦និង៤៥នាទីល្ងាចថ្ងៃទី២៥ មីនា បានចាប់ចោរឆក់បានម្នាក់ និងឃាត់ខ្លួនអ្នករើសអេតចាយម្នាក់ ដែលស្រវឹងលែងដឹងខុសត្រូវទៅឆក់កាំភ្លើងខ្លីពីមន្ត្រីនគរបាល ក្នុងរង្វង់ប្រតិបត្តិការនោះ បណ្តាលឱ្យមានការវាយដំរហូតរបួសយ៉ាងដំណំផងដែរ ។ ជនដែលសមត្ថកិច្ចអះអាងថា ជាមុខសញ្ញាឆក់នោះឈ្មោះសុខ ហួរ អាយុ២១ឆ្នាំ ជាសិស្ស តែបានបោះបង់ការសិក្សា និងចាកចោលផ្ទះសម្បែង ។
ទាក់ទិននឹងការឃាត់ខ្លួនជនសង្ស័យខាងលើនេះ ត្រូវបានលោកវរសេនីយ៍ទោ ផាន សុខជា នាយការិយាល័យនគរបាលព្រហ្មទណ្ឌកម្រិតស្រាលក្រសួងមហាផ្ទៃ ឱ្យដឹងថា នៅវេលាម៉ោងជាង៦ល្ងាចថ្ងៃនោះ កម្លាំងល្បាតការិយាល័យរបស់លោក ដែលដឹកនាំដោយលោកអនុសេនីយ៍ឯក វ៉ា គារិន្ទ អនុប្រធានផ្នែក បានប្រទះឃើញមុខសញ្ញាឆក់២នាក់ បម្រុងធ្វើសកម្មភាពឆក់កាបូបអ្នកដំណើរនៅតាមបណ្តោយផ្លូវលេខ៦៣(ផ្លូវត្រសក់ផ្អែម)សង្កាត់ផ្សារថ្មីទី៣ ខណ្ឌដូនពេញ ។ លោក ផាន សុខជា បន្តថា ពេលកម្លាំងលោក វ៉ា គារិន្ទ បានជួបមុខសញ្ញាជាជនសង្ស័យ២នាក់នោះ ពួកគេក៏បានជិះម៉ូតូគេចខ្លួន ខណៈឃើញដូច្នេះ ក៏ដេញតាមពីក្រោយនិងស្រែកថាចោរៗ ។ លុះទៅដល់កែងផ្លូវលេខ១៨២និងផ្លូវលេខ១៤១ ក្នុងសង្កាត់អូរឫស្សីទី២ ក៏ត្រូវនគរបាលខណ្ឌ៧មករា ជួយស្ទាក់ចាប់បានម្នាក់ដូចមានឈ្មោះខាងលើ និងម៉ូតូ១គ្រឿង ចំណែកម្នាក់ទៀតរត់គេចខ្លួនបាត់ ។ ខណៈពេលនគរបាលខណ្ឌ៧មករា ឃាត់ខ្លួនជនសង្ស័យបានម្នាក់នោះ កម្លាំងលោក វ៉ា គារិន្ទ ទៅដល់ល្មមទើបនគរបាលខណ្ឌ៧មករា ប្រគល់ជនសង្ស័យឱ្យទៅកម្លាំងលោក វ៉ា គារិន្ទ។
ពេលសមត្ថកិច្ចកំពុងសហការបង្ក្រាបបទល្មើស ស្រាប់តែមានជនប្រមឹកជាអ្នករើសអេតចាយម្នាក់មិនដឹងផឹកស្រវឹងដាបមកពីណាទេ និយាយលែងដឹងខុសត្រូវស្ទុះចូលក្នុងចំណោមសមត្ថកិច្ច រួចឆក់កាំភ្លើងនគរបាលហើយបម្រុងគេចខ្លួន តែពេលនោះមន្ត្រីនគរបាលដែលជាម្ចាស់កាំភ្លើងបានប្រវាយប្រតប់ដណ្តើមយកកាំភ្លើងវិញ ។ ដោយស្ថិតក្នុងស្ថានភាពប្រវាយប្រតប់នេះ ក៏ធ្វើឱ្យបុរសប្រមឹកនោះ ត្រូវវាយយ៉ាងដំណំផងដែរ និងត្រូវនាំខ្លួនទៅជាមួយមុខសញ្ញាចោរឆក់ ទៅកាន់ក្រសួងមហាផ្ទៃ
ដើម្បីសាកសួរ ។
ចែករំលែកព័តមាននេះ