ខេត្តប៉ៃលិន ៖ លោកយាយចំណាស់ម្នាក់យំលើកដៃសំពះអង្វរឱ្យអាជ្ញាធរគ្រប់លំដាប់ថ្នាក់ ជាពិសេសអភិបាលខេត្តប៉ៃលិនមេត្តាជួយអន្តរាគមន៍ដោះលែងលោកតាជរាជាប្តី អាយុជិត៨០ឆ្នាំ ឱ្យចេញពីពន្ធនាគារវិញ ក្រោយពីនគរបាលចោទថា រកស៊ីជួញដូរឈើខុសច្បាប់ បន្ទាប់ពីទិញឈើបេង២ដើម ប្រហោងក្នុងពីចម្ការ១កន្លែងយកទៅធ្វើគ្រែដេក ស្រាប់តែត្រូវនគរបាលឃាត់ខ្លួន បញ្ជូនទៅតុលាការខេត្តតែម្តង ។
ចំណែកអ្នកភូមិក៏មានការហួសចិត្តយ៉ាងខ្លាំង បន្ទាប់ពីឃើញនគរបាលចាប់លោកតាជរា ដោយចោទពីបទរកស៊ីឈើខុសច្បាប់ ហើយម្នាក់ៗនិយាយទាំងគក់ទ្រូង និងគ្រវីក្បាល ។ ហេតុការណ៍នគរបាលចុះទៅចាប់ឃាត់ខ្លួនបុរសជរានេះបានកើតឡើង កាលពីវេលាម៉ោង១០និង៣០នាទីព្រឹក ថ្ងៃទី១៥ ខែកញ្ញា ឆ្នាំ២០១៩ ស្ថិតនៅក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានឱ្យដឹងថា លោកតាចំណាស់ជរាដែលត្រូវនគរបាលឃាត់ខ្លួនបញ្ជូនទៅតុលាការ ឈ្មោះ មឿង សែម អាយុ៧៦ឆ្នាំ ពិការដៃឆ្វេង១ចំហៀង មានប្រពន្ធឈ្មោះ ហាង ចាន់ អាយុ៧៣ឆ្នាំ រស់នៅក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ។
បើតាមស្ត្រីវ័យចំណាស់ត្រចៀកធ្ងន់បន្តិចស្តាប់មិនសូវឮជាប្រពន្ធ បាននិយាយរៀបរាប់ទាំងទឹកភ្នែកហូរថា នៅព្រឹកថ្ងៃកើតហេតុមានប៉ូលិស១ក្រុមបានចុះទៅដល់ផ្ទះរបស់គាត់ ហើយចោទប្រកាន់ថា ពួកគាត់អារឈើស្តុកទុកខុសច្បាប់ តែគាត់ប្រាប់ថា ពួកគាត់មិនធ្លាប់រកស៊ីអារឈើលក់អ្វីនោះទេដោយធ្វើតែចម្ការ ដាំម្ទេស ដាំត្រប់ បេះលក់រាល់ថ្ងៃ និងដាំស្រូវ បន្តិចបន្តួច ដើម្បីលក់ផ្គត់ផ្គង់ជីវិតប៉ុណ្ណោះ ។ ប៉ុន្តែគាត់បានបញ្ជូនកូនស្រីម្នាក់ឱ្យទៅធ្វើការនៅប្រទេសកូរ៉េក៏បានផ្ញើប្រាក់ឱ្យទិញឈើទាំងអស់នេះ ដើម្បីធ្វើគ្រែដេក មុនពេលពួកគាត់អស់ជីវិតលាចាកពីផែនដី លុះមួយសន្ទុះក្រោយមកក៏ត្រូវនគរបាលឃាត់ខ្លួនប្តីខ្លួនបញ្ចូលក្នុងរថយន្តឆ្ពោះទៅកាន់អធិការនគរបាលស្រុកសាលាក្រៅ ។
គាត់បន្តទៀតថា បន្ទាប់ពីដឹងថា ប្តីពិការរបស់ខ្លួនមានជំងឺរាគរុសថែមទៀតត្រូវគេចាប់វាយខ្នោះ គាត់មិនដឹងជាគិតយ៉ាងណានោះទេ មានតែអង្គុយស្រក់ទឹកភ្នែកដោយអាណិតអាសូរដល់ប្តីជរាពន់ពេក ខណ:ត្រូវគេចោទពីបទរកស៊ីបទល្មើសព្រៃឈើ ។ គាត់ក៏សូមលើកដៃអង្វរដល់អាជ្ញាធរគ្រប់លំដាប់ថ្នាក់ មេត្តាជួយអន្តរាគមន៍ដោះលែងប្តីគាត់ផងព្រោះពួកគាត់មិនមែនជាមនុស្សរកស៊ីជួញដូរឈើដូចការចោទប្រកាន់នោះឡើយ ជាពិសេសសុំឱ្យឯកឧត្តម ផាន់ ចាន់ធុល អភិបាលខេត្តប៉ៃលិន មេត្តាចាត់មន្ត្រីក្រោមឱវាទឱ្យចុះទៅស៊ើបអង្កេតករណីប្តីរបស់គាត់ឱ្យបានច្បាស់លាស់ផង មុននឹងធ្វើការចាប់ឃាត់ខ្លួនបញ្ជូនទៅតុលាការ ។
បើតាមបុរសម្នាក់ឈ្មោះ យឹម វឿន អាយុ៦៥ឆ្នាំ រស់នៅក្បែរផ្ទះបុរសខាងលើបានឱ្យដឹងថា ពួកគាត់បានទិញឈើពីបុរសម្នាក់ឈ្មោះ សរ ចំណាន នៅឯចម្ការក្នុងភូមិអន្លង់រក្សា ឃុំស្ទឹងត្រង់ ស្រុកសាលាក្រៅ ដោយទិញអស់រយ:ពេល៦ថ្ងៃមកហើយក្នុងតម្លៃ៦៥០ដុល្លារ បម្រុងនឹងយកទៅធ្វើគ្រែដេក ស្រាប់តែនៅព្រឹកថ្ងៃកើតហេតុក៏ត្រូវនគរបាលចាប់ឃាត់ខ្លួនតែម្តង ដោយចោទពីបទរកស៊ីកាប់ឈើខុសច្បាប់ ។
ចំណែកបុរសម្នាក់ឈ្មោះ សរ ចំណាន អាយុ២៥ឆ្នាំ ជាគ្រូបង្រៀន និងជាម្ចាស់ឈើខាងលើ បានឱ្យដឹងថា លោកបានលក់ឈើចំនួន២ដុំ ជាប្រភេទឈើបេង ក្នុងតម្លៃ៦៥០ដុល្លារ មានប្រហោងក្នុងទៅឱ្យបុរសខាងលើព្រោះគាត់សុំទិញ ដើម្បីដឹកយកទៅឱ្យជាងច្នៃធ្វើគ្រែដេក ហើយគាត់ក៏ជួលគេទៅកាត់ក្នុងចម្ការ នៅភូមិអន្លង់រក្សា ឃុំស្ទឹងត្រង់ ស្រុកសាលាក្រៅ អស់រយ:ពេល២ទៅ៣ថ្ងៃ ទើបជួលគោយន្តកន្ត្រៃដឹកយកទៅទុកក្នុងផ្ទះ ។ លោកបន្តទៀតថា ឈើទាំង២ដុំខាងលើនេះពិតជាដុះនៅលើដីចម្ការរបស់ខ្លួនប្រាកដមែន ដោយពួកគាត់ មិនបានលួចពីនរណានោះឡើយ ឬរកស៊ីជួញដូរអ្វីនោះដែរ ហើយលោកលក់ឈើបេងទាំង២ដើមនេះ គឺក្នុងគោលបំណងឱ្យស្រឡះដី រួចភ្ជួរដាំពោតតែម្តង ។
ចំណែកអ្នករស់នៅក្នុងភូមិខាងលើជាច្រើននាក់បានលើកឡើងថា ពួកគាត់ទាំងពីរនាក់ប្តីប្រពន្ធជាមនុស្សល្អទេនៅក្នុងភូមិ ដោយធ្លាប់តែរកស៊ីដាំបន្លែលក់ចិញ្ចឹមជីវិត និងធ្វើស្រែបន្តិចបន្តួច ហើយរាល់ថ្ងៃគាត់រស់ដោយសារមានកូនទៅធ្វើការនៅប្រទេសកូរ៉េ រួចផ្ញើប្រាក់ចាយវាយប្រចាំថ្ងៃ និងទិញថ្នាំលេប ហើយពួកគាត់មិនធ្លាប់រកស៊ីបទល្មើសព្រៃឈើអ្វីដូចការចោទរបស់នគរបាលនោះឡើយ ហើយឈើកំណាត់តូចៗ និងឈើបេងប្រហោងក្នុងទាំងអស់នោះ គឺគាត់ទិញផ្សំគ្នានៅតាមចម្ការក្នុងគោលបំណងយកទៅធ្វើគ្រែដេក តែប៉ុណ្ណោះ ។
ពាក់ព័ន្ធនឹងបញ្ហានេះលោក រី ដារ៉ា អធិការនគរបាលស្រុកសាលាក្រៅបានឱ្យដឹងថា ខាងលោកចាប់ឃាត់ខ្លួនបុរសខាងលើ គឺពាក់ព័ន្ធទៅនឹងបទល្មើសកាប់បំផ្លាញព្រៃឈើខុសច្បាប់ ហើយសំនុំរឿងនេះខាងលោកក៏បានរៀបចំ និងបញ្ជូនទៅតុលាការអស់ហើយ ពោល គឺផុតពីដៃរបស់លោក ។ លោកបន្តទៀតថា ពេលនេះខាងលោកកំពុងជាប់រវល់ទទួលទូរស័ព្ទពីខាងអភិបាលស្រុក ហើយក៏បិទទូរស័ព្ទភ្លាមៗតែម្តង ៕ កែសម្រួលដោយ ៖សុឃាក់
ចែករំលែកព័តមាននេះ