ដើមឆ្នាំ ២០២៦ នេះ ក្រសួងការងារ ជំរុញឱ្យយុវជន ប្រជាពលរដ្ឋ និងអតីតពលករមកពីប្រទេសថៃ សិក្សាជំនាញខ្លី ដើម្បីទទួលបានចំណូល
រាជធានីភ្នំពេញ ៖ ដើមឆ្នាំ ២០២៦ នេះ លោក ស៊ុន មេសា អ្នកនាំពាក្យនៃក្រសួងការងារ និងបណ្តុះបណ្តាលវិជ្ជាជីវៈ…
រាជធានីភ្នំពេញ ៖ ដើមឆ្នាំ ២០២៦ នេះ លោក ស៊ុន មេសា អ្នកនាំពាក្យនៃក្រសួងការងារ និងបណ្តុះបណ្តាលវិជ្ជាជីវៈ បានអំពាវនាវដល់យុវជន ប្រជាពលរដ្ឋ និងបងប្អូនអតីតពលករដែលត្រឡប់មកពីប្រទេសថៃ ឱ្យមកចុះឈ្មោះចូលរៀនវគ្គបណ្ដុះបណ្ដាលជំនាញខ្លីរយៈពេលត្រឹម ៤ខែ ដើម្បីទទួលបានជំនាញបច្ចេកទេសជាក់ស្តែង និងបង្កើនឱកាសរកចំណូលកាន់តែប្រសើរ ។ លោក ស៊ុន មេសា បញ្ជាក់ថា វគ្គសិក្សារយៈពេលខ្លី ៤ខែ គឺជាជម្រើសសមស្របសម្រាប់យុវជន និងអតីតពលករ ដែលចង់មានជំនាញសមស្របនឹងតម្រូវការទីផ្សារក្នុងស្រុក ដោយមិនចាំបាច់ចំណាយពេលយូរ ប៉ុន្តែអាចទទួលបានជំនាញជាក់ស្តែង និងឱកាសការងារបានឆាប់រហ័ស ។
សូមរំលឹកថា កម្មវិធី TVET 1.5M ផ្តល់ការបណ្ដុះបណ្ដាលលើវិស័យចំនួន ១០ ជាមួយ ៤៥ ជំនាញ រួមមាន វិស័យសំណង់, អគ្គិសនី និងថាមពល, អេឡិចត្រូនិក, កម្មន្ដសាល, មេកានិចទូទៅ/មេកានិចរថយន្ដ, ធុរកិច្ច និងព័ត៌មានវិទ្យា, សេវាកម្ម, បរិក្ខារត្រជាក់ និងកម្ដៅ, ទេសចរណ៍ និងវិស័យកសិកម្ម និងកសិ-ឧស្សាហកម្ម ដែលរៀបចំឡើងឆ្លើយតបទៅនឹងតម្រូវការទីផ្សារការងារជាក់ស្តែង និងទិសដៅអភិវឌ្ឍសេដ្ឋកិច្ចជាតិ ។
គិតត្រឹមខែមករា ឆ្នាំ ២០២៦ មានសិស្សស្នើចុះឈ្មោះសរុប ១៥៦,៤៧០ នាក់ ក្នុងនោះអ្នកមានបណ្ណសមធម៌ចំនួន ៦៦,៨៣០ នាក់។ សិស្សដែលកំពុងរៀន និងបានបញ្ចប់ការសិក្សាសរុបមាន ៩៤,៥១៣ នាក់ ក្នុងនោះ ៤៥,៩២៦ នាក់ជាអ្នកមានបណ្ណសមធម៌។ ក្នុងចំណោមអ្នកបញ្ចប់ការសិក្សាមានចំនួន ៥៤,៣៣០ នាក់ ទទួលបានការងារធ្វើរួចហើយដែលក្នុងនោះមានសិស្សចំនួន ២៨,៣៨៣ នាក់ជាមានបណ្ណសមធម៌ ។
អ្នកនាំពាក្យរូបនេះក៏បានបន្តអំពាវនាវឱ្យយុវជន និងប្រជាពលរដ្ឋដែលមិនទាន់មានជំនាញបច្ចេកទេស ឬចង់បង្កើនជំនាញបន្ថែម រួសរាន់ចុះឈ្មោះសិក្សា ដើម្បីបង្កើនសមត្ថភាព និងធានាបាននូវចំណូលប្រកបដោយស្ថិរភាពក្នុងអនាគត ។
គួររម្លឹកថា កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ដល់យុវជនក្រុមគោលដៅមកពីគ្រួសារក្រីក្រ និងគ្រួសារងាយរងហានិភ័យ នៅទូទាំងប្រទេសចំនួនប្រមាណ១,៥លាននាក់ ក្នុងកម្រិតសញ្ញាបត្របច្ចេកទេស និងវិជ្ជាជីវៈត្រូវបានផ្ដួចផ្ដើមឡើងដោយសម្តេចអគ្គមហាសេនាបតីតេជោ ហ៊ុន សែន ក្នុងឆ្នាំ២០២៣ និងប្រកាសដាក់ឱ្យអនុវត្តដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី ១៤ ខែវិច្ឆិកា ឆ្នាំ ២០២៣ ៕ អត្ថបទសហការ
ចែករំលែកព័តមាននេះ