ខេត្តប៉ៃលិន ៖ រហូតមកដល់ថ្ងៃទី១៣ ខែកុម្ភៈ ឆ្នាំ២០២៦ កម្លាំងសមត្ថកិច្ចចម្រុះនៃគណៈបញ្ជាការឯកភាពខេត្តប៉ៃលិន ដោយមានការចូលរួមសហការពីលោកព្រះរាជអាជ្ញារងអមសាលាដំបូងខេត្តប៉ៃលិន បានចុះប្រតិបត្តិការណ៍ធ្វើការឆែកឆេរ ហើយបង្ក្រាបទីតាំងដែលគេសង្ស័យថា មានបទល្មើស…
ខេត្តប៉ៃលិន ៖ រហូតមកដល់ថ្ងៃទី១៣ ខែកុម្ភៈ ឆ្នាំ២០២៦ កម្លាំងសមត្ថកិច្ចចម្រុះនៃគណៈបញ្ជាការឯកភាពខេត្តប៉ៃលិន ដោយមានការចូលរួមសហការពីលោកព្រះរាជអាជ្ញារងអមសាលាដំបូងខេត្តប៉ៃលិន បានចុះប្រតិបត្តិការណ៍ធ្វើការឆែកឆេរ ហើយបង្ក្រាបទីតាំងដែលគេសង្ស័យថា មានបទល្មើស និងបានបិទទីតាំងដែលសង្ស័យមានល្បែងបោកប្រាស់អនឡាញ (Scam online) ចំនួន០៣ទីតាំង ដែលស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
ប្រភពព័ត៌មានពីមន្ត្រីនគរបាលបានបង្ហើបឱ្យដឹងថា ៖ អស់រយៈពេលជាយូរថ្ងៃខែមកហើយ ដែលអគារមួយចំនួន រួមទាំងអគារ៣ទីតាំងខាងលើ នៅក្បែរច្រកទ្វារអន្តរជាតិព្រំ ត្រូវបានជនជាតិចិនចូលទៅស្នាក់នៅជាច្រើននាក់ ដោយម្ចាស់បានជួលឱ្យពួកគេ ។ ការស្នាក់នៅរបស់ពួកគេទាំងនោះ គ្មាននរណាម្នាក់អាចចូលទៅជិត ពិនិត្យរកមើលកន្លែងពួកគេបានឡើយ ព្រោះបិទទ្វាបង្អួចជិតឈឹង ដោយសូម្បីតែម្ចាស់ផ្ទះក៏ពួកគេមិនអនុញ្ញាតឱ្យចូលទៅក្បែរកន្លែងដែលពួកគេស្នាក់នៅនោះឡើយ ។
តែទោះបីជាយ៉ាងណា ដោយទទួលបានបទបញ្ជាពីថ្នាក់លើ នគរបាលក៏សុំគោលការណ៍ចុះឆែកឆេរ ដោយសហការជាមួយនឹងខាងអយ្យការអមសាលាដំបូងខេត្ត ព្រោះពួកគេមួយចំនួនក៏ចូលមកក្នុងខេត្តប៉ៃលិន ដោយអត់មានលិខិតឆ្លងដែនត្រឹមត្រូវនោះទេ គឺលួចលាក់ចូលមកស្នាក់នៅ ខណៈដែលមានមេខ្យល់នាំចូលមកតែម្តង។
ទោះបីជាយ៉ាងណាក៏ដោយ នគរបាលក៏បានបង្ក្រាបកន្លែង៣ទីតាំង ដើម្បីបង្ការទប់ស្កាត់ និងការលេងល្បែងអនឡាញ ហើយថែមទាំងទប់ស្កាត់ការចាប់ជំរិត ការបង្ខាំងមនុស្សដោយខុសច្បាប់ និងការជួញដូរមនុស្ស ដោយក្រុមជនជាតិចិនទាំងនោះផងដែរ។
សូមបញ្ជាក់ផងដែរថា ការចុះបិទទ្វារអគារទាំង៣ទីតាំងខាងលើ ដែលគេសង្ស័យថា ជនជាតិចិនបាននាំគ្នាលេងល្បែងអនឡាញប្រភេទខុសច្បាប់នេះ មិនមានការឃាត់ខ្លួនជនសង្ស័យណាម្នាក់នោះទេ ពោលគឺបិទតែទ្វារកន្លែងផ្ទះជួលប៉ុណ្ណោះ ៕
ចែករំលែកព័តមាននេះ