ក្រោយពីជួបហេតុការណ៍នៃការបាត់ជើងហោះហើរ MH 370 មក ក្រុមហ៊ុនអាកាសចរណ៍ម៉ាឡេស៊ី Malaysia Airline System (MAS) ទំនងជាខាតបង់សាច់ប្រាក់ច្រើនបំផុតដែលចាំបាច់ត្រូវមានជំនួយសង្គ្រោះពីរដ្ឋាភិបាល។ តាមពិត សូម្បីតែមុនការបាត់ស្រមោលជើងហោះហើរ MH 370 នេះ ក្រុមហ៊ុនអាកាសចរណ៍ម៉ាឡស៊ីបានខាតបង់ប្រាក់យ៉ាងច្រើនសន្ធឹកសន្ធាប់ទៅហើយ រហូតជំរុញឱ្យខ្លួនចាំបាច់ត្រូវការការសង្គ្រោះផ្នែកហិរញ្ញវត្ថុពីក្រុមហ៊ុនវិនិយោគរដ្ឋ Khazanah Nasional Bhd ដែលជាក្រុមហ៊ុនកាន់កាប់ភាគហ៊ុនធំបំផុតរបស់ខ្លួន ។
MAS ដែលជាក្រុមហ៊ុនអាកាសចរណ៍ធំបំផុតទី៤ នៅអាស៊ីអាគ្នេយ៍ បើគិតពីតម្លៃទីផ្សារបានជួបនឹងលំហូរសាច់ប្រាក់ប្រតិបត្តិការអវិជ្ជមានអស់រយៈពេល៣ឆ្នាំ ដែលមានន័យថា ក្រុមហ៊ុនមិនបានបង្កើតសាច់ប្រាក់ឱ្យបានគ្រប់គ្រាន់ដើម្បីបំពេញថ្លៃចំណាយប្រតិបត្តិការពីមួយថ្ងៃទៅមួយថ្ងៃរបស់ខ្លួនទេ ។ មិនតែប៉ុណ្ណោះ ក៏មានលំហូរសាច់ប្រាក់សេរីអវិជ្ជមាន ឬលំហូរសាច់ប្រាក់ប្រតិបត្តិការដកការចំណាយមូលធនចេញអស់រយៈពេល៦ឆ្នាំ ។
គិតត្រឹមដំណាច់ខែធ្នូ ឆ្នាំ២០១៣ ការវិនិយោគរយៈពេលខ្លី និងសាច់ប្រាក់របស់ក្រុមហ៊ុនបិទបញ្ចប់ត្រឹម១,២ពាន់លានដុល្លារអាមេរិក ពោលគឺតិចជាងតម្លៃប្រតិបត្តិការមធ្យមកាលពីពីរត្រីមាសមុនរបស់ខ្លួន ហើយជាសញ្ញាមួយបង្ហាញថា ក្រុមហ៊ុនទំនងជាត្រូវការមូលនិធិថ្មី ឬកម្ចីធនាគារឆាប់ៗ ។ មកទល់ពេលនេះ នៅមិនទាន់មានអ្នកណាម្នាក់សន្និដ្ឋានថា ការបាត់បង់យន្តហោះនេះខាតបង់ប្រាក់អស់ប៉ុន្មាននៅឡើយទេ ។
អ្នកវិភាគ និងធនាគារិកបាននិយាយថា បច្ចុប្បន្ន MAS បានដាក់ចេញយុទ្ធសាស្ត្រថ្មីរបស់ខ្លួនតាមរយៈការកាត់បន្ថយតម្លៃសំបុត្រ នៅគ្រាដែលខ្លួនប្រកួតប្រជែងជាមួយដៃគូដូចជាក្រុមហ៊ុន Air Asia និងក្រុមហ៊ុន Lion Air របស់ឥណ្ឌូណេស៊ី ដែលបានកំពុងបង្កើនសមត្ថភាព ។ ការបាត់ខ្លួនជើងហោះហើរ MH 370 បានធ្វើឱ្យការកក់សំបុត្រធ្លាក់ចុះ ហើយទំនងជាត្រូវបង្កើនមូលធនថ្មីបន្ថែមទៀត ។
គួរបញ្ជាក់ថា យន្តហោះ MH 370 ត្រូវបានគេសន្និដ្ឋានថា បានធ្លាក់ទៅក្នុងមហាសមុទ្រឥណ្ឌា ដោយមានអ្នកដំណើរ២៣៩នាក់ រួមជាមួយអាកាសយានិក៕
ចែករំលែកព័តមាននេះ