ខេត្តព្រះសីហនុ ៖ ចាប់ពីវេលាម៉ោង១១និង២០នាទីយប់ថ្ងៃទី១៤ កញ្ញា ព្រះពិរុណបានបង្អុរចុះយ៉ាងខ្លាំងលាយឡំដោយខ្យល់កន្ត្រាក់បានវាយលុកគ្របដណ្តប់មកលើខេត្តព្រះសីហនុ រហូតមកដល់វេលាម៉ោង៩និង៣០នាទីព្រឹកថ្ងៃទី១៥ កញ្ញា នៅតែមិនទាន់មានការថយចុះនៅឡើយធ្វើឲ្យវិថីនានានិងទីប្រជុំជន គ្រឹះស្ថានសិក្សានិងលំនៅឋាន ហាងតូចធំទាំងឡាយនៅសង្កាត់លេខ១ សង្កាត់លេខ២ សង្កាត់លេខ៣ និងសង្កាត់លេខ៤ ចំណុចស្ពានL.V កណ្តាលក្រុងព្រះសីហនុ រងការលិចលង់យ៉ាងខ្លាំង លើសពីជំនន់លើកទី១ ដែលបានកើតឡើងនាខែសីហា ឆ្នាំ២០១៩កន្លងមកទៅទៀត ។
ទោះបីជាបែបណាក្តី ជំនន់ទឹកភ្លៀងជាលើកទី២នេះ មិនមានបង្កឲ្យមានគ្រោះថ្នាក់រងរបួសឬប៉ះពាល់ដល់អាយុជីវិតមនុស្សណាម្នាក់ទេ ។យោងតាមប្រព័ន្ធ(whatsapp)លោក សោ លីម ប្រធានអង្គភាពអគ្គិសនីខេត្តព្រះសីហនុ បានឲ្យដឹងថា វេលាម៉ោង១២និង១៥នាទីរំលងអធ្រាត្រឈានចូលថ្ងៃទី១៥ កញ្ញា អគ្គិសនីខេត្ត បានធើ្វការផ្អាកការផ្គត់ផ្គង់ចរន្តជាបណ្តោះអាសន្ន ពីអនុស្ថានីយក្រុងព្រះសីហនុ មូលហេតុដេីម្បីការពារសុវត្ថិភាពជូនប្រជាពលរដ្ឋ ចៀសវាងការឆ្លងចរន្តអគ្គិសនីដោយសារជំនន់ទឹកភ្លៀងបង្កជាគ្រោះថ្នាក់ជាយថាហេតុ ។ ការផ្តាច់ចរន្តនេះបណ្តាលឲ្យដាច់ចរន្តអគ្គិសនីនៅទីតាំងមួយចំនួនស្ថិតនៅផ្នែកខ្លះនៃ សង្កាត់លេខ១ សង្កាត់លេខ២ សង្កាត់លេខ៣ សង្កាត់លេខ៤ ដែលទឹកជន់លិច ។
លោកថា ក្រុមការងារបច្ចេកទេសនឹងធើ្វការភ្ជាប់ចរន្តជូនអតិថិជនឲ្យមានប្រើប្រាស់ឡើងវិញពេលដែលជំនន់ទឹកភ្លៀងស្រកចុះ ។ លោក ហេង សោភ័ណ្ឌរិទ្ធ ប្រធានធនធានទឹកនិងឧតុនិយមខេត្ត បានឲ្យដឹងតាមទូរស័ព្ទកាលពីព្រឹកថ្ងៃទី១៥ កញ្ញា ថាបន្ទាប់ពីភ្លៀងបានចាប់ផ្តើមធ្លាក់យ៉ាងខ្លាំងតាំងពីវេលារំលងអធ្រាត្រតាមពេលវេលាខាងលើ ធ្វើឲ្យលំនៅឋាន ទីប្រជុំជនវាលទំនាប ត្រូវបានជន់លិច បង្កឲ្យខូចខាតទ្រព្យសម្បត្តិរបស់ប្រជាពលរដ្ឋ ប៉ុន្តែមិនមានគ្រោះថ្នាក់ដល់អាយុជីវិតទេ ។
លោកបន្តឲ្យដឹងទៀតថាយោងតាមសេចក្តីប្រកាសបន្ថែមរបស់ក្រសួងធនធានទឹកនិងឧតុនិយមបានឲ្យដឹងថា ផ្អែកលើសភាពការណ៍ជាក់ស្តែង និងការវិវត្តអាកាសធាតុពាក់ព័ន្ធនិងឥទ្ធិពលនៃប្រព័ន្ធសម្ពាធទាប(ITCZ) ដែលអូសបន្លាយកាត់លើប្រទេសថៃ ឡាវ និងវៀតណាម ហើយដែលបច្ចុប្បន្នរំកិលចុះមកក្រោមកាត់លើប្រទេសកម្ពុជា ក្នុងរយៈពេល២ទៅ៣ថ្ងៃខាងមុខនេះ ស្ថានភាពបែបនេះធ្វើឲ្យចាប់ពីថ្ងៃទី១២ដល់ទី១៩ ខែកញ្ញា នឹងមានភ្លៀងធ្លាក់រាយប៉ាយក្នុងកម្រិត បរិមាណកើនឡើងជាលំដាប់ក្នុងក្របខណ្ឌទូទាំងប្រទេស ដែលអាចបណ្តាលឲ្យបណ្តាខេត្តមួយចំនួនប្រឈមនិងជំនន់ទឹកភ្លៀង ។
លោក គួច ចំរើន ដឹកនាំមន្ត្រីចុះពិនិត្យស្ថានភាពទឹកជន់លិចកណ្តាលក្រុង
លោក គួច ចំរើន អភិបាលនៃគណៈអភិបាលខេត្តនាព្រឹកថ្ងៃទី១៥ កញ្ញា បានដឹកនាំមន្ត្រីជំនាញមន្ទីរស្ថាប័នពាក់ព័ន្ធ ចុះពិនិត្យតាមទីតាំងដែលមានជំនន់ទឹកភ្លៀងជន់លិច ។ទឹកភ្លៀងធ្លាក់ខ្លាំងកាលពីពាក់កណ្តាលយប់ថ្ងៃទី១៤ ឆ្លងចូលថ្ងៃទី១៥ កញ្ញា បណ្តាលឲ្យតំបន់ទំនាបក្នុងក្រុងព្រះសីហនុមួយចំនួនត្រូវលិចលង់ ។ផ្តើមពីបញ្ហានេះលោក គួច ចំរេីន អភិបាលខេត្តព្រះសីហនុ បានដឹកនាំមន្ត្រីក្រោមឱវាទចុះពិនិត្យ និងដោះស្រាយបញ្ហាជាបន្ទាន់ ព្រមទាំងបានចុះទៅពិនិត្យនៅអាងប្រតិកម្មទឹកស្អាត ។
ជំនន់ទឹកភ្លៀងនេះ តាមសេចក្ដីរាយការណ៍ពីប្រជាពលរដ្ឋមានលំនៅឋានរស់នៅតំបន់ទំនាប និងតំបន់ក្បែរអូរ-ប្រឡាយ ស្ថិតនៅតាមសង្កាត់មួយចំនួនក្នុងក្រុងព្រះសីហនុបានឲ្យដឹងថា ផ្ទះ របស់ពួកគាត់ត្រូវបានជន់លិចដ៏អាក្រក់ជាថ្មីម្តងទៀត កាលពីយប់ពាក់កណ្តាលអធ្រាត្រថ្ងៃទី១៤ ឆ្លងចូលថ្ងៃទី១៥ កញ្ញា ក្រោយពេលមានភ្លៀងធ្លាក់មួយមេធំ ។
ភ្លៀងមួយមេធំនេះ បានបណ្តាលឲ្យផ្លូវថ្នល់សាធារណៈ លំនៅឋានរបស់ប្រជាពលរដ្ឋ និងផ្លូវធ្វើដំណើរមួយចំនួន ត្រូវទឹកជន់លិចហូរលើផ្លូវ និងហូរចូលដល់ក្នុងផ្ទះ ព្រមទាំងបំផ្លាញទ្រព្យសម្បត្តិថែមទៀតផង ។ ក្នុងនោះក៏មានទីតាំងខ្លះ ទឹកបានហូរច្រោះដីបាក់រលំរបងផ្ទះមួយចំនួនផង ប៉ុន្តែមិនមានមនុស្សរងគ្រោះថ្នាក់ដល់អាយុជីវិតទេ ។ សូមបញ្ជាក់ថា ការជន់លិចលើកទី១ គឺមានមនុស្ស៣នាក់ស្លាប់ ក្នុងនោះជនជាតិចិនម្នាក់និងខ្មែរ២នាក់ប្តី-ប្រពន្ធ ។
ជំនន់ទឹកភ្លៀងលើកទី២នេះ គេសង្កេតឃើញមានកម្លាំងសមត្ថកិច្ចចម្រុះ ជាពិសេសកម្លាំងកងរាជអាវុធហត្ថជាដើម បានបញ្ចេញកម្លាំងចុះជួយសម្រួលចរាចរណ៍ និងជួយសង្គ្រោះ ប្រជាពលរដ្ឋ និងដោះស្រាយការងារចាំបាច់មួយចំនួន ជូនប្រជាពលរដ្ឋ តាមទីកន្លែងដែលមានទឹកជន់លិចខ្លាំង ។
ជុំវិញការជន់លិច ក្រុងព្រះសីហនុ ដែលធ្វើឲ្យ ប្រជាពលរដ្ឋ រងផលប៉ះពាល់យ៉ាងធ្ងន់ធ្ងរនោះ ត្រូវបានប្រភពប្រជាពលរដ្ឋ អះអាងថា គឺបណ្ដាលមកពី ការចាក់លុបអូរ ការទន្ទ្រានចំណីអូរ ការចាក់លុបប្រភពផ្ទុកទឹកភ្លៀង និងបឹងមួយចំនួននៅក្នុងក្រុងព្រះសីហនុ ដែលជាហេតុធ្វើឲ្យចរន្តទឹក ហូរមិនទាន់បង្កជាការជន់លិចបែបនេះតែម្ដង។
ប្រភពដដែលបានកត់សម្គាល់ថា ពេលភ្លៀងជន់លិចកាលពីថ្ងៃទី៨ ខែសីហាកន្លងទៅ គេសង្កេតឃើញ លោកអភិបាលខេត្ត គួច ចំរើន បានចុះធ្វើការកាយសំរាមតាមប្រព័ន្ធលូមួយចំនួន ប៉ុន្តែគេពុំទាន់ឃើញវិធានការក្តៅទៅលើទីតាំងដី ដែលបានរំលោភចំណីអូរ របស់ក្រុមអ្នកមានអំណាច មានបុណ្យសក្តិនៅឡើយទេ ដូច្នេះក្រុមប្រជាពលរដ្ឋសូមអំពាវនាវដល់លោកអភិបាលខេត្តមេត្តាចាត់វិធានការចំពោះចំណុចនេះផង បើពុំដូចនេះទេ ការជន់លិចនឹងបន្តទៅថ្ងៃខាងមុខទៀតជាពុំខាន ។
សូមបញ្ជាក់ថា គិតមកត្រឹមម៉ោង១១ព្រឹកថ្ងៃទី១៥ កញ្ញានេះ ភ្លៀងនៅតែបន្តធ្លាក់មិនទាន់រាំងនោះទេ ប៉ុន្តែទឹកដែលជន់លិចកណ្តាលក្រុងក៏បានស្រកអស់ដែរដោយសារភ្លៀងរាំង ។ អាជ្ញាធរឃុំសាមគ្គីប្រកាសផ្អាកចរាចរណ៍លើផ្លូវភ្ជាប់ពីផ្លូវជាតិលេខ៣ ។
ដោយឡែកស្រុកព្រៃនប់ បើតាមអាជ្ញាធរឃុំសាមគ្គី បានឱ្យដឹងនៅព្រឹកថ្ងៃទី១៥ ខែកញ្ញាថា កំណាត់ផ្លូវលំក្រាលក្រួសក្រហមភ្ជាប់ពីផ្លូវជាតិលេខ៣(វាលរេញ-កំពត)ចូលទៅភូមិព្រែកក្រាញ់ឃុំសាមគ្គី ចំណុចកំពង់ផ្កា ស្ថិតក្នុងភូមិបឹងរាំង ត្រូវទឹកជន់លិចហូរលើផ្លូវ។ ជាមួយគ្នានេះ អាជ្ញាធរឃុំអំពាវនាវសុំឱ្យផ្អាករថយន្តធ្វើចរាចរណ៍ជាបណ្តោះអាសន្នសិន ហើយសម្រាប់អ្នកថ្មើរជើង មុនឆ្លងកាត់ត្រូវមានការប្រុងប្រយ័ត្នខ្ពស់ ព្រោះទឹកហូរកាត់ផ្លូវមានកម្ពស់ប្រមាណកន្លះម៉ែត្រ និងប្រវែងជា៧០ម៉ែត្រ ។
អាជ្ញាធរបញ្ជាក់ថា ការដែលទឹកជន់លិចហូរ លើផ្លូវនៅចំណុចនេះ ជាលើកទី៣ហើយសម្រាប់ឆ្នាំនេះ ទោះជាយ៉ាងណាមិនបះពាល់ដល់លំនៅឋានទេ តែបះពាល់ដល់ដំណាំស្រូវខ្លះដែរ ។ចំណែកអាកាសធាតុនៅតែបន្តមានភ្លៀងរលឹម ធ្វើឱ្យផ្លូវចូលព្រែកក្រាញ់បន្តមានទឹកលិចហូរកាត់ផ្លូវកើនឡើងប្រវែងជាង៣០០ម៉ែត្រ និងកម្ពស់ឡើងជាងកន្លះម៉ែត្រ ហើយអាជ្ញាធរឲ្យផ្អាកការធ្វើចរាចរណ៍ឆ្លងកាត់ទាំងស្រុង ។
លោក នេន ចំរើន ប្រធានក្រុមការងារចុះជួយឃុំសាមគ្គី បានឱ្យដឹងថា ជំនន់ទឹកភ្លៀងលើកនេះមានកម្រិតខ្លាំងជាងលើកមុន ដែលការលិចមានប្រវែងជិត៤០០ម៉ែត្រ កម្ពស់ជាងកន្លះម៉ែត្រ ហើយអាជ្ញាធរត្រូវបង្ខំចិត្តផ្អាកការធ្វើចរាចរណ៍ដោយខ្លួនឯង ។
លោកបន្តថា ជាតម្រូវការចាំបាច់របស់ពលរដ្ឋត្រូវតែឆ្លងកាត់ខាងអាជ្ញាធរ និងក្រុមការងារបានដាក់ទូកចម្លងទៅមកជូនពលរដ្ឋ តែមកដល់ល្ងាចថ្ងៃទី១៥ ខែកញ្ញាទឹកបានស្រកខ្លះ ចម្លងទូកលែងបាន តែត្រូវនៅបន្តជួយដឹកចម្លងឆ្លងកាត់រហូតទឹករីង និងបន្តប្រចាំការនៅចំណុចនោះទាល់តែមានភាពធូរស្បើយឡើង
វិញ ។
យោងតាមអាកាសធាតុនេះ សម្រាប់កំណាត់ផ្លូវជាតិលេខ៤ចំណុចងាយរងនូវការជន់លិចគឺចំណុចស្ពានស្ទឹងសំរោង និងស្ពានអូរគគីរក្នុងស្រុកកំពង់សិលា តែពេលនេះមិនមានរងការប៉ះពាល់ពីអាកាសធាតុនេះឡើយ ទោះបីជាមានភ្លៀងធ្លាក់ខ្លាំងក៏ដោយ ៕
អត្ថបទសរសេរ ដោយ
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ