ខេត្តបាត់ដំបង ៖ សមាគមអតីតយុទ្ធជនខេត្តបាត់ដំបងបានធ្វើពិធីប្រគល់ផ្ទះចំនួន១២ខ្នងដល់អតីតយុទ្ធជន ដែលពិធីប្រគល់រួមនេះធ្វើនៅចំណុចផ្ទះអតីតយុទ្ធជនឈ្មោះ ហ៊ឹម សេរី ស្ថិតក្នុងភូមិបេង ឃុំអន្លង់វិល ស្រុកសង្កែ ខេត្តបាត់ដំបង…
ខេត្តបាត់ដំបង ៖ សមាគមអតីតយុទ្ធជនខេត្តបាត់ដំបងបានធ្វើពិធីប្រគល់ផ្ទះចំនួន១២ខ្នងដល់អតីតយុទ្ធជន ដែលពិធីប្រគល់រួមនេះធ្វើនៅចំណុចផ្ទះអតីតយុទ្ធជនឈ្មោះ ហ៊ឹម សេរី ស្ថិតក្នុងភូមិបេង ឃុំអន្លង់វិល ស្រុកសង្កែ ខេត្តបាត់ដំបង កាលពីវេលាម៉ោង១២និង៣០នាទីថ្ងៃត្រង់ថ្ងៃទី១៤ ខែកញ្ញា ឆ្នាំ២០១៩ ក្រោមអធិបតីភាពរបស់លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងទ័ពជើងគោក អគ្គលេខាធិការរង គណៈអចិន្ត្រៃយ៍ នៃគណៈកម្មាធិការកណ្តាលសមាគមអតីតយុទ្ធជនកម្ពុជា ។
ក្នុងពិធីខាងលើនេះក៏មានការអញ្ជើញចូលរួមពីគណៈប្រតិភូអមដំណើរ រួមមានលោកឧត្តមសេនីយ៍ទោ សេង ធារិន មេបញ្ជាការរង នាយសេនាធិការ យោធភូមិភាគទី៥, លោកឧត្តមសេនីយ៍ទោ អ៊ុក ឃ្នួច មេបញ្ជាការ តំបន់ប្រតិបត្តិការសឹករងបាត់ដំបង ជាប្រធាន ស.អ.ក ខេត្ត, លោក ហឿង សុគន្ធ អភិបាលរងខេត្ត, លោក កែវ ហន ក្រុមការងារចលនាមន្ត្រីរាជការចូលនិវត្ត និងអតីតយុទ្ធជន និងអស់លោកអនុប្រធាន ស.អ.ក ខេត្ត ព្រមទាំងអស់លោក សមាជិក គណៈកម្មាធិការ ស.អ.ក ខេត្ត, លោកអភិបាល នៃគណៈអភិបាលស្រុក ប្រធានកិត្តិយស ស.អ.ក ស្រុក, លោកប្រធាន អនុប្រធាន ស.អ.ក ក្រុង-ស្រុក, ក្រុមការងារ ស.អ.ក ខេត្ត-ស្រុក, លោកប្រធានកិត្តិយសសាខាឃុំ, លោកប្រធានសាខាឃុំ និងអាជ្ញាធរដែនដី សរុបចំនួន៧៦នាក់ ។
ផ្ទះចំនួន១២ខ្នងខាងលើនេះ គឺខ្នងផ្ទះទី១៣៧, ទី១៣៨, ទី១៣៩, ទី១៤០, ទី១៤១, ទី១៤២, ទី១៤៣, ទី១៤៤, ទី១៤៥, ទី១៤៦, ទី១៤៧ និងទី១៤៨ ក្នុងចំណោមផ្ទះទាំង១៥០ខ្នង របស់សមាគម អតីតយុទ្ធកម្ពុជា ខេត្តបាត់ដំបង ដែលធ្វើអំពីឈើប្រក់ស័ង្កសី រៀបការ៉ូបាត និងរៀបជញ្ជាំងឥដ្ឋកំពស់១ម៉ែត្រ ជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានសមាគម អតីតយុទ្ធកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដើម្បីប្រគល់ជូនអតីតយុទ្ធចំនួន១២គ្រួសារ ដែលមានជីវភាពទីទ័លក្រ គ្មានទីជំរកសមរម្យ ។
ក្នុងកម្មវិធីខាងលើនេះដែរ ម្ចាស់ផ្ទះនីមួយៗទទួលបានគ្រឿងឧបភោគ ជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រធានសមាគមអតីតយុទ្ធជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្នុងមួយគ្រួសារទទួលបានថវិកា ៤០០.០០០រៀល, អង្ករចំនួន ១០០គីឡូក្រោម, គ្រែ ១, ទឹកត្រី១យួរ, ទឹកស៊ីអីវ ១យួរ, ត្រីខ១យួរ, ឆ្នាំង ចាន, មុង១, ភួយ១, កន្ទេល១ ។
អតីតយុទ្ធជនដែលបានចូលរួមចំនួន៣០នាក់ ក្នុងម្នាក់ៗទទួលបានថវិកាចំនួន ៥០.០០០រៀល និងសារុង១, លោកប្រធាន ស.អ.ក ស្រុកសង្កែ, ស្រុកបវេល, ស្រុកគាស់ក្រឡ, ស្រុករុក្ខគិរី និងស្រុកបាណន់ ក្នុងម្នាក់ៗទទួលបានថវិកាចំនួន ២០០.០០០រៀល សម្រាប់ធ្វើមធ្យោបាយនាំអតីតយុទ្ធជនមកចូលរួម និងសមាគមអតីតយុទ្ធជនកម្ពុជាខេត្តបាត់ដំបង ទទួលបានថវិកាចំនួន ១០.០០០.០០០រៀល ផងដែរ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព៕ (កែសម្រួលដោយ ៖ ធីតា)
ចែករំលែកព័តមាននេះ