ធម៌បរាភវសូត្រនឹងធ្វើឲ្យអ្នកស្ដាប់បានដឹងច្បាស់ពីមូលហេតុដែលនាំឲ្យវិនាស ហើយគួរចៀសវាងដើម្បីគេចឲ្យផុតពីសេចក្ដីវិនាស តែបើសិនជាគេមិនបានស្ដាប់ធម៌បទនេះទេ គេអាចនឹងមិនដឹងពីហេតុដែលនាំឲ្យវិនាសឡើយ នឹងអាចនាំឱ្យគេប្រព្រឹត្តខុសដែលជាហេតុនាំឲ្យដល់នូវសេចក្តីវិនាសសម្រាប់ទង្វើរបស់ខ្លួន .
បរាភវសូត្រនេះកើតត្រឹមគ្រាដែលព្រះបរមគ្រូនៃយើងកាលទ្រង់គង់នៅវត្តជេតពន នាវេលាកណ្តាលអធ្រាត្រ មានទេវតាមួយអង្គបានចូលទៅថ្វាយបង្គំព្រះអង្គហើយសួរអំពីសេចក្តីវិនាសរបស់មនុស្ស ក៏ទ្រង់សម្តែងអំពីសេចក្តីវានាសទាំង១២កងដូចតទៅ៖
វិនាសទី១- បុគ្គលទ្រុស្តធម៌ ចិត្តចោរ មិនស្គាល់បាប បុណ្យ គុណ និងទោសប្រាកដជានឹងជួបនូវសេចក្តីវិនាស ។
វិនាសទី២- អ្នកសេពគប់ជនជាអសប្បុរស បុគ្គលពាល និងអ្នកដែលមិនស្រឡាញ់ខ្លួនប្រាកដជានឹងជួបនូវសេចក្តីវិនាស ។
វិនាសទី៣- អ្នកដេកច្រើន និយាយច្រើន អ្នកឥតព្រួយគិតប្រឹងប្រែងធ្វើការ អ្នកខ្ជិលច្រអូស ខឹងច្រើន ឥតខ្នះខ្នែងក្នុងការងារប្រាកដជានឹងជួបនូវសេចក្តីវិនាស ។
វិនាសទី៤- បុគ្គលណាមានទ្រព្យធនតែមិនបានចិញ្ចឹមឪពុកម្តាយដែលចាស់ជរា នឹងដល់នូវសេចក្តីវិនាសអន្តរាយ ។
វិនាសទី៥- ជនបញ្ឆោតគេ កេងប្រវ័ញ្ចគេ រកស៊ីបោកបន្លំអ្នកដទៃ នឹងជួបនូវសេចក្តីវិនាស ។
វិនាសទី៦- អ្នកមានអាហារច្រើនពោរពាសបរិភោគតែឯង និងអ្នកមានទ្រព្យធនច្រើន មាសប្រាក់ច្រើនចាយវាយ តែមិនចេះចែករម្លែកដល់អ្នកក្រខ្សត់ជាងខ្លួនប្រាកដជានឹងជួបនូវសេចក្តីវិនាស ។
វិនាសទី៧- ការមើលងាយផៅញាតិ អាងខ្លួនមានទ្រព្យច្រើន មិនរាប់រកញាតិសន្តានប្រាកដជានឹងជួបនូវសេចក្តីវិនាស ។
វិនាសទី៨- ពួកជនដែលប្រព្រឹត្តអបាយមុខទាំងបី មានស្រី ស្រាគ្រឿងញៀន និងល្បែងស៊ីសងប្រាកដជានឹងជួបនូវសេចក្តីវិនាស ។
វិនាសទី៩- គឺបុរសដែលមានភរិយាហើយ មិនរីករាយនឹងប្រពន្ធខ្លួន បែរជាទៅជាប់ជំពាក់នឹងស្រីពេស្យា ស្រីកំណាន់ក្រៅផ្ទះ មានចិត្តក្បត់នឹងកូនប្រពន្ធប្រាកដជានឹងជួបនូវសេចក្តីវិនាស ។
វិនាសទី១០- បុរសមានវ័យចាស់ពេក ហើយមានតម្រេកដោយក្តីតណ្ហា នាំយកស្រីក្មេងមកធ្វើជាភរិយា ចិត្តគិតពាលា ឃ្លាតចាកសុខុម ប្រាកដជានឹងជួបនូវសេចក្តីវិនាស ។
វិនាសទី១១- បុគ្គលដែលចាយវាយខ្ជះខ្ជាយមិនចេះគិត ទាំងបុរស និងស្ត្រីប្រាកដជាដល់នូវសេចក្តីវិនាស ។
វិនាសទី១២- បុគ្គលដែលក្សត់ទ្រព្យសម្បត្តិ ហើយចង់ទៅធ្វើជាអ្នកដឹកនាំ ឬជាប្រធានប្រាកដជានឹងជួបនូវសេចក្តីវិនាស ។
ជារួមមកគ្មានផលឯណាដែលកើតឡើងដោយប្រាសចាកហេតុនោះទេ។ ខ្លឹមសារនៃសេចក្តីវានាសទាំង១២កង នេះពិតជាមានន័យយ៉ាងជ្រាលជ្រៅណាស់សម្រាប់មនុស្សទូទៅគួរយកជាគតិ ហើយត្រូវប្រព្រឹត្តចាកឆ្ងាយពីហេតុដែលនាំមកនូវសេចក្តីវិនាសទាំងនោះ ទើបនាំមកនូវសុខចម្រើនតរៀងទៅ ៕ (ដោយសាន សារិន)
ចែករំលែកព័តមាននេះ