អាសូរ​! ឈឺពោះ​សម្រាលកូន​លើ​ទូកដរ​កណ្តាល​បឹង​ដោយសារ​ផ្លូវគោក​ត្រូវ​បាន​ជន់​លិច


ខេត្តក្រចេះ ៖ សេចក្តីរាយការណ៍​បឋម​បាន​ឲ្យ​ដឹង​ថា ក្រុម​គ្រូពេទ្យ​នៅ​មណ្ឌល​សុខភាព​តា​ម៉ៅ​ស្រុក​ព្រែក​ប្រសព្វ​បាន​និយាយ​ថា ក្រុម​គ្រូពេទ្យ​ជំនាញ និង​ផ្នែក​ឆ្មប​របស់​មណ្ឌល​បាន​ជួយ​សម្រាលកូន​ដល់​ស្ត្រី​មាន​ផ្ទៃពោះ​គ្រប់​ខែ​ម្នាក់ នៅ​លើ​ទូកដរ កណ្តាល​បឹង​ខាងក្រោយ​ភូមិ ខណៈ​ដែល​ក្រុម​គ្រួសារ​កំពុង​បញ្ជូន​ដឹក​តាម​ទូកដរ ស​ម្តៅ​មក​មណ្ឌល​សុខភាព​តែ​បាន​ត្រឹម​ពាក់​កណ្តាលផ្លូវ ។

លោក​ឈា្ន​ង សុ​វត្ថា ប្រធាន​មន្ទីរ​សុខាភិបាល​ខេត្ត​បាន​ប្រាប់​ឲ្យ​ដឹង​ថា ស្ត្រី​ឈ្មោះ ឈឹ​ន ជូរ អាយុ​២៥​ឆ្នាំ រស់នៅ​ភូមិ​ខ្សា​ត់ ឃុំ​តា​ម៉ៅ ស្រុក​ព្រែក​ប្រសព្វ ដែល​បាន​ឈឺពោះ​សម្រាលកូន​កាល ពី​ថ្ងៃ​ទី​១៤ ខែកញ្ញា​នោះ​ត្រូវ​បាន​ក្រុម​គ្រូពេទ្យ​ជួយ​សម្រាល​នៅ​លើ​ទូកដរ រហូត​បាន ជោគជ័យ ហើយ​សុខភាព​ទាំង​ម្តាយ​ទាំង​កូន​មាន​ភាពល្អ​ប្រសើរ ។ ហើយ​នេះ​ជា​កូន​ទី​៣ ។ លោក​ថា​នេះ​ជា​ស្ត្រី​ទី​១ ដែល​បាន​សម្រាលកូន​នៅ​ពាក់​កណ្តាលផ្លូវ​ពេល​កំពុង​បញ្ជូន​មក​មណ្ឌល​សុខភាព ឬ​មន្ទីរពេទ្យ​ក្នុង​រដូវ​ទឹកជំនន់​ជន់​ឡើង​ខ្លាំង​នេះ ។

ប្រធាន​មណ្ឌល​សុខភាព​តា​ម៉ៅ លោក សេង គឹ​ម​លេង បាន​ប្រាប់​ឲ្យ​ដឹង​ដែរ​ថា​មុន និង​ចាត់​បញ្ជូន​មក​មណ្ឌល​ក្រុម​គ្រួសារ​របស់​គាត់​បាន​ទាក់ទង​មក​មណ្ឌល ។ តែ​ដោយសារ​ការ​បារម្ភ​ពី​សុវត្ថិភាព​របស់​ស្ត្រី​មាន​ផ្ទៃពោះ​គ្រប់​ខែ​នេះ​លោក​ក៏​បាន​នាំ​ពេទ្យឆ្មប​របស់​មណ្ឌល​ចំនួន​រូប​រួម​ទាំង​សម្ភារ​សម្រាប់​សម្រាល​ចេញ​ទូក​ទៅ​ជាមួយ ដើម្បី​ទទួលយក​គាត់​ដែល​ក្រុម​គ្រួសារ​កំពុង​បញ្ជូន​គាត់​មក​មណ្ឌល​តាម​ទូកដរ ។

លោក​បញ្ជាក់​ថា ពេល​ទៅ​ដល់​ស្ត្រី​រូប​នេះ​ត្រូវ​ដល់​ពេល​សម្រាលកូន ហើយ​ក្រុម​គ្រូពេទ្យ របស់​លោក​ក៏​ជួយ​សម្រាល​នៅ​លើ​ទូកដរ​កណ្តាល​បឹង​តែ​ម្តង ។ ដោយសារ​តែ​លំនៅ​ឋាន​របស់​ស្ត្រី​មាន​ផ្ទៃពោះ​រូប​នេះ​នៅ​ឆ្ងាយ​ពី​ភូមិ​ប្រមាណ​ជិត​១០​គីឡូ​មែ​ត្រ ។ ម្យ៉ាង​តាម​តំបន់​ដែល​គាត់​រស់នៅ​នោះ គឺ​ត្រូវ​បាន​ជន់​លិច​ដោយ​ទឹកជំនន់​ធ្វើ​ឲ្យ​ការ​ដឹក​បញ្ជូន​គាត់​មក​កាន់​មណ្ឌល​សុខភាព​តាម​ទូក​មិន​បាន​ឆាប់រហ័ស​ដូច​ផ្លូវគោក​នោះ​ទេ ។

លោក​ប្រធាន​មណ្ឌល​បាន​បញ្ជាក់​ថា ក្រោយ​ការ​ជួយ​សម្រាល​នៅ​លើ​ទូកដរ​រួច​ទាំង​ម្តាយ និង​ទារក ត្រូវ​បាន​ក្រុម​គ្រូពេទ្យ​នាំ​មក​សម្រាក​នៅ​មណ្ឌល ហើយ​សុខភាព​របស់​ពួក​គេ​ទាំង​ពីរ​មាន​ភាពល្អ​ប្រសើរ​ធម្មតា ៕ កែសម្រួល​ដោយ ៖​សុ​ឃា​ក់

Facebook Google Twitter Email

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

ការស្ទង់មតិគេហទំព័រថ្មី




សូម​អរគុណ