ជប៉ុនផ្តល់ប្រាក់ក្នុងពិធីស្វែងរកគូ ដើម្បីបង្កើនចំនួនពលរដ្ឋ
លោកនាយករដ្ឋមន្ត្រី ស៊ីនសូ អាបេ បានប្រកាសផ្តល់ប្រាក់ប្រហែល៣.០០០លានយ៉េន នៅក្នុងឆ្នាំសារពើពន្ធ ២០១៤ ដើម្បីទ្រទ្រង់គម្រោងការផ្សេងៗដែលអាចឈានទៅរកការបង្កើនចំនួនប្រជាជននៅក្នុងប្រទេស ដោយផ្នែកមួយក្នុងគម្រោងនេះ នឹងបានទទួលប្រាក់មួយផ្នែក គឺមានរៀបពិធីស្វែងរកគូ និងណាត់ដើរកម្សាន្តដោយរដ្ឋាភិបាលជាអ្នកឧបត្ថម្ភដល់អ្នកនៅលីវ ។
ការព្យាយាមរបស់លោកនាយករដ្ឋមន្ត្រី អាបេ កើតឡើងក្រោយពីជប៉ុន ក្លាយជាប្រទេសដែលឈានទៅរក «ពិភពមនុស្សចាស់» ឆាប់បំផុតនៅលើពិភពលោក និងកាលពីឆ្នាំ២០១៣ ចំនួនពលរដ្ឋជប៉ុន ធ្លាក់ចុះដល់ទៅ២៤៤.០០០នាក់ បើប្រៀបធៀបនឹងឆ្នាំ២០១២ ខណៈពេលមនុស្សជំនាន់ក្រោយរៀបការបង្កើតក្រុមគ្រួសារមានចំនួនតិចដោយសារតែវិបត្តិសេដ្ឋកិច្ច និងភាពតានតឹងពីការងារ ។
តាមការប៉ាន់ប្រមាណរបស់រដ្ឋាភិបាលជប៉ុន បានបញ្ជាក់ថា ជប៉ុនអាចបាត់បង់ចំនួនប្រជាជនច្រើនជាង១ភាគ៣ ពីកម្រិតបច្ចុប្បន្ន នៅក្នុងរយៈពេល៥០ឆ្នាំខាងមុខ ប្រសិនបើកំលោះ-ក្រមុំមិនលុបចោលការពេញនិយមនៅលីវ និងឃ្លាតឆ្ងាយពីការបង្កើតក្រុមគ្រួសារនាពេលបច្ចុប្បន្ន ។
ចែករំលែកព័តមាននេះ