ទីភ្នាក់ងារព័ត៌មានបរទេសនៅលើពិភពលោក បានតាមដានយ៉ាងប្រកិតពីស្ថានការណ៍ក្នុងប្រទេសថៃ ក្រោយពេលតុលាការធម្មនុញ្ញសម្រេចថា ការបោះឆ្នោតកាលពីថ្ងៃ២ កុម្ភៈ កន្លងមកត្រូវចាត់ទុកជាមោឃៈ ។ តាមប្រភពពី«ឆេនណែលញូវអាស៊ី» របស់សិង្ហបុរីថា ការវិនិច្ឆ័យខាងលើ គឺជាសញ្ញាដែលអាចធ្វើឱ្យការចរចារវាងគណបក្យនយោបាយស្តីពីការបោះឆ្នោតជាថ្មី ដើម្បីបញ្ឈប់វិបត្តិដែលបានអូសបន្លាយពេលជាច្រើនខែកន្លងមកជួបនឹងស្ថានភាពវឹកវរ ។
ប្រភពខាងលើបានបរិយាយពីទំនាស់នយោបាយនាពេលកន្លងមកថា គឺជាការតស៊ូដណ្តើមអំណាចដ៏យូរអង្វែងរវាងពួកអាមាត្យ ដែលគាំទ្រស្តេច ដោយមានក្រុមតុលាការ និងយោធាជាមួយនឹងក្រុមគ្រួសាររបស់លោកស្រីយីងទ្បាក់ ស៊ីណាវ៉ាត្រា ដែលគាំទ្រដោយប្រជាពលរដ្ឋភាគខាងជើង ។ ឆេនណែលញូវអាស៊ី បានបរិយាយបន្តទៀតថា ចាប់តាំងពីតុលាការធម្មនុញ្ញបង្កើតទ្បើងក្រោយពីមានរដ្ឋប្រហារទម្លាក់លោកថាក់ស៊ីនក្នុងឆ្នាំ២០០៦ មកមានប្រវត្តិទំនាស់រវាងក្រុមគ្រួសារលោកស្រីយីងទ្បាក់ និងក្រុមអ្នកនយោបាយជំនិតពួកអាមាត្រ ពិសេសការសម្រេចកាលពីថ្ងៃទី២១ មីនា កន្លងទៅ បានបង្កើតភាពភ្ញាក់ផ្អើលដល់ក្រុមអ្នកសង្កេតការណ៍មួយចំនួន ដែលតាមដានពីវិបត្តិនយោបាយថៃ ។ លោក ដេវីដ ស្ត្រេកហ្វាស់ អ្នកជំនាញនិងជាអ្នកនិពន្ធអាមេរិកពីប្រទេសថៃ បានផ្តល់បទសម្ភាសន៍ថា តុលាការហាក់ដូចជា មានការលំអៀងទៅរកក្រុមប្រឆាំងនឹងរដ្ឋាភិបាល ដែលទង្វើបែបនេះ អាចបង្កឱ្យកេរ្តិ៍ឈ្មោះរបស់តុលាការ ស្ថិតក្នុងស្ថានភាពប្រឈមមុខនឹងអនាគតមិនល្អមួយ ។
ដោយទ្បែកសម្រាប់ទូរទស្សន៍អាល់ហ្សាស៊ីរ៉ា វិភាគថា ការសម្រេចរបស់តុលាការអាចធ្វើឱ្យថៃឈានទៅក្នុងវិបត្តិកាន់តែជ្រៅ និងមានក្តីបារម្ភថា នឹងកើតអំពើហិង្សាធ្ងន់ធ្ងរមួយលើកទៀត ក្រោយពីការតវ៉ារបស់ក្រុមប្រឆាំងនឹងរដ្ឋាភិបាល ដែលអូសបន្លាយរយៈពេល៥ខែ បង្កឱ្យមានអ្នកស្លាប់២៣នាក់ និងជាច្រើននាក់ទៀតរងរបួស ។
រីឯទីភ្នាក់ងារព័ត៌មានរ៉យទ័រ ក៏ឆ្លុះបញ្ចាំងពីការយល់ឃើញរបស់ក្រុមអ្នកនយោបាយទាំង២ក្នុងប្រទេសថៃ ដោយយោងតាមការថ្លែងនៅយប់ថ្ងៃទី២០ មីនា គឺមួយថ្ងៃមុនពេលមានការវិនិច័្ឆយរបស់តុលាការ របស់លោកស៊ូថេប ធឿកស៊ូបាន មេដឹកនាំក្រុមអ្នកតវ៉ាដើម្បីកែទម្រង់ប្រទេស ។ ពេលដែលតុលាការសម្រេចចាត់ទុកការបោះឆ្នោតថ្ងៃទី២ កុម្ភៈ ជាមោឃៈ និងឱ្យកំណត់ថ្ងៃបោះឆ្នោតជាថ្មីក្រុមអ្នកតវ៉ានឹងរិះរកវិធីសាស្ត្រ ដើម្បីរារាំងការបោះឆ្នោតនោះទៀត ។ ជាក់ស្តែងលោកស៊ូថេបធឿកស៊ូបាន ប្រកាសថា នឹងមានគម្រោងដើរកេណ្ឌប្រជាជននៅទូទាំងប្រទេសនៅថ្ងៃទី២៩ មីនា ខាងមុខ ដើម្បីបង្ហាញកម្លាំងមហាជនទាមទារធ្វើកំណែទម្រង់ប្រទេសមុនពេលមានការបោះឆ្នោតជាថ្មីនាពេលខាងមុខ ៕
ចែករំលែកព័តមាននេះ