ខេត្តកណ្តាល៖ ម៉ូតូ០២គ្រឿងបើកបញ្ច្រាសទិសគ្នា ប៉ះដៃចង្កូតបណ្តាលឱ្យម៉ូតូមួយគ្រឿងដួល ហើយមានរថយន្តមួយគ្រឿងទៀតបើកមកពីក្រោយជាន់ហ្វ្រាំងមិនទាន់ កិនអ្នកបើកម៉ូតូបែកក្បាលស្លាប់ ។ ហេតុការណ៍គ្រោះថ្នាក់ចរាចរណ៍នេះ កើតឡើងកាលពីវេលាម៉ោង៧និង៣០នាទីព្រឹកថ្ងៃទី២៤ មីនា នៅលើកំណាត់ផ្លូវជាតិលេខ២ ស្ថិតក្នុងភូមិព្រែកប្ញស្សី សង្កាត់ព្រែកប្ញស្សី ក្រុងតាខ្មៅ ។
ក្រោយពីកើតហេតុ នគរបាលចរាចរបានទៅដល់កន្លែងកើតហេតុ ធ្វើការឃាត់ខ្លួនអ្នកបើករថយន្តឈ្មោះ អឿន មករា ភេទប្រុស អាយុ២៥ឆ្នាំ មានទីលំនៅភូមិគោករមៀត ឃុំកណ្តាល ស្រុកកណ្តាលស្ទឹង ជាអ្នកបើករថយន្ត ម៉ាកហ៊ីយ៉ាន់ដាយ ពណ៌ស ពាក់ស្លាកលេខបន្ទាយមានជ័យ 3A-0284 ចំណែកជនរងគ្រោះដែលបានស្លាប់ឈ្មោះ ទេព ម៉ី ភេទប្រុស អាយុ៥០ឆ្នាំ មានទីលំនៅភូមិស្នោរ សង្កាត់រកាក្នុង ក្រុងដូនកែវ ខេត្តតាកែវ ។
សាក្សីបានឱ្យដឹងថា មុនពេលកើតហេតុ រថយន្តហ៊ីយ៉ាន់ដាយបើកតាមផ្លូវជាតិលេខ២ ទិសដៅពីជើងទៅត្បូង រីឯម៉ូតូជនរងគ្រោះបើកស្របទិសគ្នាជាមួយរថយន្តដែរ (បើកខាងមុខ) ។ ខណៈពេលនោះស្រាប់តែមានម៉ូតូមួយគ្រឿងបើកពីត្បូងទៅជើងបញ្ច្រាសទិសគ្នាជាមួយម៉ូតូជនរងគ្រោះ ក៏បណ្តាលឱ្យប៉ះដៃចង្កូតគ្នា ហើយម៉ូតូជនរងគ្រោះបានដួល ពេលនោះរថយន្តខាងលើបើកមកពីក្រោយជាន់ហ្វ្រាំងមិនទាន់ ក៏កិនចំក្បាលជនរងគ្រោះបណ្តាលឱ្យស្លាប់ភ្លាមៗនៅនឹងកន្លែងតែម្តង ៕
ចែករំលែកព័តមាននេះ