រាជធានីភ្នំពេញ ៖ តាមការផ្តល់បទសម្ភាសន៍ដោយឡែកជាមួយកោះសន្តិភាពនាពេលថ្មីៗនេះ លោក សំ ឃឹម ប្រធានមន្ទីរទេសចរណ៍ខេត្តពោធិ៍សាត់បានបង្ហាញនូវមោទនភាពថា ខេត្តរបស់លោកនឹងមានផលិតផលទេសចរណ៍ថ្មីមួយទៀតដែលគួរឲ្យទាក់ទាញបំផុតនោះ គឺទឹកធ្លាក់សន្ទរតំបន់រាំង ខ្វាវ ស្ថិតនៅក្នុងភមិក្សេត្របូរី ឃុំសន្ទ្រែ ស្រុកភ្នំក្រវ៉ាញ ខេត្តពោធិ៍សាត់ ។
លោក សំ ឃឹម បានឲ្យដឹងថា អាជ្ញាធរខេត្តរួមទាំងស្ថាប័នជំនាញទេសចរណ៍បាន និងកំពុងស្រាវជ្រាវ ដើម្បីរៀបចំហេដ្ឋារចនាសម្ពន្ធ័សំខាន់ផ្លូវទៅកាន់តំបន់រមណីយដ្ឋានទឹកធ្លាក់ ឆាយសន្ទរព្រោះថា រមណីយដ្ឋានថ្មីមួយនេះបានរំលិចទៅដោយទេសភាពដ៏ស្រស់ត្រកាល ដែលកម្រជួបប្រទះក្នុងពេលដែលដើមឈើច្រើនប្រភេទដុះតម្រៀបគ្នាតាមរបៀបរៀបរយ ហើយមានទឹកហូរជ្រែកតាមចន្លោះគល់ឈើ ពណ៌ខៀវស្រងាត់ថ្លាឆ្លុះស្រមោលចោលកាំរស្មី ភ្លឺផ្លេកមើលទៅត្រជាក់ភ្នែកធូរអារម្មណ៍តែម្តង ។
លោកប្រធានមន្ទីរបានអះអាងថា ទឹកធ្លាក់ឆាយសន្ទរនៃតំបន់រាំងខ្វាវនោះស្អាតណាស់ ហើយអាចនិយាយឲ្យអស់ថា ស្អាតមែនទែនតែម្តង និងកម្រមាននៅក្នុងចំណោមរមណីយដ្ឋានសំខាន់ៗនៅកម្ពុជាយើង ។ លោកបន្តថា វាកាន់តែទាក់ទាញថែមទៀតសម្រាប់ភ្ញៀវទេសចរបែបផ្សងព្រេងព្រោះថា តំបន់នោះមិនគ្រាន់តែបង្ហាញនូវសម្រស់ធម្មជាតិដ៏ស្រស់ស្អាតប៉ុណ្ណោះទេ ប៉ុន្តែវាបានបង្កប់នូវរឿងរ៉ាវនៃប្រវត្តិសាស្ត្រថែមទៀត ។
លោក សំ ឃឹម បានឲ្យដឹងថា តាមដឹងតំបន់នោះត្រូវបានរកឃើញតាំងពីសម័យបារាំងមកម្លេះ ហើយក៏ជាកន្លែងសម្រាកកម្សាន្តលំហែកាយរបស់ពួកគេថែមទៀត ។ លោកថា នៅទីតាំងនោះយើងបានរកឃើញបង្គោលខ្ពស់ដ៏ចំណាស់មួយដែលសង្ស័យថា ជាបង្គោលទង់ជាតិតែកំពុងស្រាវជ្រាវនៅឡើយ ។ លោកបញ្ជាក់ថា ទឹកធ្លាក់ឆាយសន្ទរនៃតំបន់រាំងខ្វាវ ស្ថិតនៅចម្ងាយប្រមាណជាង៤០គីឡូវម៉ែត្រពីទីរួមស្រុកភ្នំក្រវ៉ាញ និងប្រមាណជា៦០គីឡូម៉ែត្រ ពីទីរួមស្រុកក្រគរនៃខេត្តពោធិ៍សាត់ ។ ប៉ុន្តែអ្វីដែលយើងមិនអាចធ្វើដំណើរដោយរលូនទៅកាន់តំបន់នោះបានដោយសារតែបញ្ហាផ្លូវដែលយើងកំពុងតែសិក្សា និងរៀបចំនៅឡើយ ។
លោកប្រធានមន្ទីរបានបង្ហាញនូវក្តីរំពឹងថា ក្នុងពេលដែលអាជ្ញាធរខេត្តរៀបចំហេដ្ឋារចនាសម្ពន្ធ័សំខាន់ផ្លូវទៅកាន់តំបន់នោះរួចរាល់ហើយនោះភ្ញៀវទេសចរទាំងជាតិ និងអន្តរជាតិយ៉ាងច្រើននឹងទៅកាន់ទឹកធ្លាក់ស្វាយសន្ទរ តំបន់រាំងខ្វាវមិនខាន ហើយពួកគេនឹងភ្ញាក់ផ្អើលប្លែកអារម្មណ៍នឹងសម្រស់ធម្មជាតិប្លែកៗស្រស់ស្អាតដែលពួកគេមិននឹកស្មានដល់មិន ។
យ៉ាងណាក៏ដោយលោកថា តំបន់នោះអាចនឹងទាក់ទាញបំផុតសម្រាប់ភ្ញៀវទេសចរណ៍បែបផ្សងព្រេង ហើយភាគច្រើនជាជនបរទេសព្រោះថា មុននឹងទៅដល់ទឹកធ្លាក់ឆាយសន្ទរតំបន់រាំងខ្វាវនោះពួកគេនឹងត្រូវចំណាយពេលវេលារហូតដល់៣យប់៣ថ្ងៃឯណោះ ខណៈដែលនៅទីនោះក៏មិនគ្រាន់តែជារមណីយដ្ឋានបម្រើឲ្យការលំហែសម្រាកកម្សាន្តនោះទេ តែក៏ជាតំបន់សម្រាប់ការស្រាវជ្រាវផងដែរ ។ ព័ត៌មានលំអិតនឹងមានផ្សាយជូននៅលើកាសែតកោះសន្តិភាព ៕ កែសម្រួលដោយ ៖ សុឃាក់
ចែករំលែកព័តមាននេះ