ខេត្តកំពត ៖ សេចក្តីរាយការណ៍បឋមបានឲ្យដឹងថា រូងភ្នំមួយនៅខេត្តកំពតមានប្រចៀវច្រើនជាងគេបំផុតក្នុងប្រទេសកម្ពុជា ។ ជារៀងរាល់ថ្ងៃអោយតែដល់ម៉ោង៥ល្ងាចហ្វូងប្រចៀវហើរចេញពីរូងភ្នំមួយឈ្មោះ វិហារលួង នៅជួរភ្នំទូកមាស ស្ថិតក្នុងភូមិច្រកឃ្លៃ ឃុំទូកមាស ខាងលិចស្រុកបន្ទាយមាស ខេត្តកំពត ។
ហ្វូងប្រចៀវដែលបានហើរចេញពីរូងភ្នំហើរជាជួរសន្ធឹកស្នូរដូចទឹកបាក់ទំនប់ ហើយវាហើរក្រឡឹង៣ជុំភ្នំ ទើបវាហើរចាក់ចេញទៅទិសខាងកើតលុះដល់ម៉ោង៤ទៀបភ្លីហ្វូងប្រចៀវទាំងនោះត្រូវបានហើរត្រឡប់មកពីកើតចូលក្នុងរូងភ្នំវិញ ។
លោកលៀង ប៊ុល អាយុ៦៣ឆ្នាំ នៅភូមិច្រកឃ្លៃ បានប្រាប់អោយដឹងថា អាជ្ញាធរស្រុកអោយរូបគាត់ថែមើលប្រចៀវក្នុងរូងភ្នំវិហារលួងនេះ តាំងពីឆ្នាំ១៩៩៤ មកម្លេះ ។ លោកលៀងប៊ុល និយាយប្រាប់ថា ផ្លូវទៅកាន់រូងប្រចៀវមានកម្ពស់ជាប់៣រយម៉ែត្របតបែនច្រើន ពិបាកឆ្លងកាត់ លោកលៀង ប៊ុល និយាយថា បើតាមការអះអាងពីមន្ត្រីអភិរក្សសត្វស្លាបនៅប្រទេសកម្ពុជាបាននិយាយថា មានតែខេត្តកំពតទេ ដែលមានសត្វប្រចៀវច្រើនជាងគេបំផុតក្នុងប្រទេសកម្ពុជា ។
លោកលៀង ប៊ុល បាននិយាយថា អង្គការអភិរក្សសត្វស្លាបបាននិយាយថា ប្រចៀវនេះហើររកចំណីស៊ីក្នុងមួយយប់មានចម្ងាយ៣ពាន់គីឡូម៉ែត្រ នេះបើយោងតាមឧបករណ៍បំពាក់ជាប់ប្រចៀវ ។ លោកលៀង ប៊ុល និយាយប្រាប់ថា ក្នុងមួយយប់ប្រមូលបានអាច់ប្រជៀវបាន១៥តៅ ។ លោកនិយាយបន្តថា នៅពេលរដូវប្រាំងខាងមុខនេះ លោកមានគម្រោងកសាងផ្លូវស្អាតគួរសមមួយទៅកាន់រូងភ្នំដែលមានប្រចៀវរស់នៅច្រើនងាយស្រួលជនបទេសឡើងទៅថតយករូបភាពនៅទីនោះ ៕ កែសម្រួលដោយ ៖ សុឃាក់
ចែករំលែកព័តមាននេះ