លោកជំទាវ ញ៉ែម មរកត ចាត់ទុកការតស៊ូរបស់ អ៊ិន លក្ខិណា ជាគំរូដល់យុវជន និងយុវតី ក្រោយបង្កើតកំណត់ត្រាចូល Top 40 Miss World
- ភ្នំពេញ
រាជធានីភ្នំពេញ ៖ រដ្ឋលេខាធិការក្រសួងកិច្ចការនារី លោកជំទាវ ញ៉ែម មរកត បានចាត់ទុកការខិតខំប្រឹងប្រឹង និងតស៊ូរបស់ អ៊ិន លក្ខិណា គឺជាគំរូមួយសម្រាប់យុវវ័យជំនាន់ក្រោយ នៃការមិនចុះចាញ់ចំពោះពាក្យរិះគ.ន់ ដោយសារជីវភាព មុខមាត់ រូបរាង ពណ៌សម្បុរ និងភាសា ក្នុងដំណើរលើវិស័យបវរកញ្ញា ។ គួររំលឹកថា អ៊ិន លក្ខិណា បង្កើតកំណត់ត្រាថ្មីជូនកម្ពុជា ដោយបានចូលដល់វគ្គ Top 40 នៃកម្មវិធី Miss World
លោកជំទាវបានគូសបញ្ជាក់បន្ថែមថា ដំណើររបស់ អ៊ិន លក្ខិណា មិនមែនជាផ្លូវដែលមានតែភាពងាយស្រួលនោះទេ ប៉ុន្តែជាផ្លូវដែលពោរពេញទៅដោយការខិតខំប្រឹងប្រែង ការប្រឈម និងការរិះគន់ពីមជ្ឈដ្ឋានមួយចំនួន ។
តាមរយៈសំណេរបង្ហោះលើបណ្តាញសង្គម លោកជំទាវ ញ៉ែម មរកត បានលើកឡើងថា កញ្ញា អ៊ិន លក្ខិណា គឺជាយុវតីម្នាក់ដែលមានការខិតខំប្រឹងប្រែង និងការតស៊ូយ៉ាងខ្លាំង ក្នុងការអភិវឌ្ឍខ្លួនឯងទាំងផ្នែកសម្រស់ បុគ្គលិកលក្ខណៈ ការសិក្សា កីឡា និងជាពិសេសក្នុងវិស័យបវរកញ្ញា។ ដំណើររបស់កញ្ញាមិនមែនជាផ្លូវដែលមានតែភាពងាយស្រួលនោះទេ ប៉ុន្តែជាផ្លូវដែលពោរពេញទៅដោយការខិតខំ ការប្រឈម និងការរិះគន់ពីមជ្ឈដ្ឋានមួយចំនួន។
លោកជំទាវបន្តថា កាលពីដើម កញ្ញា អ៊ិន លក្ខិណា ធ្លាប់ប្រឈមមុខនឹងពាក្យរិះគន់ដែលប៉ះពាល់ដល់ទំនុកចិត្តរបស់នាង ដោយមានអ្នកខ្លះលើកឡើងថា «ក្មេងខ្មៅ មិនស្អាត មិនចេះភាសាបរទេសនិងមិនអាចក្លាយជាបវរកញ្ញាបាន»។
លោកជំទាវបញ្ជាក់ថា ពាក្យទាំងនោះមិនបានធ្វើឱ្យកញ្ញាបោះបង់ក្តីស្រមៃឡើយ ផ្ទុយទៅវិញ វាបានក្លាយជាកម្លាំងចិត្តជំរុញឱ្យនាងខិតខំកែលម្អខ្លួនឯង និងបង្រៀន ព្រមទាំងបង្ហាញថា « មនុស្សម្នាក់មិនគួរត្រូវបានវាស់ត្រឹមពណ៌សម្បុរ ឬរូបរាងខាងក្រៅតែប៉ុណ្ណោះទេ» ។
បើតាមលោកជំទាវ ញ៉ែម មរកត អ្វីដែលពិសេសនោះគឺ លក្ខិណា ក៏ជាកីឡាការិនីដែលមានទេពកោសល្យ និងបទពិសោធន៍ក្នុងវិស័យ កីឡាហែលទឹក។ លក្ខណៈទាំងនេះក៏បានក្លាយជាមូលដ្ឋានសំខាន់សម្រាប់នាងក្នុងការបន្តដំណើរនៅក្នុងវិស័យបវរកញ្ញារហូតដល់កញ្ញាក្លាយជា Top 40 Miss World ហើយជាលើកទីមួយហើយដែលកម្ពុជាយើងទទួលបាន top 40 ក្នុងរយៈពេល១០ឆ្នាំចុងក្រោយនេះ ជាឯតទគ្គកម្មរបស់កម្ពុជាក្នុងកំណត់ត្រានៃស្ថាប័នបវរកញ្ញាពិភពលោកផងដែរ ។
លោកជំទាវបានគូសបញ្ជាក់ថា កញ្ញា អ៊ិន លក្ខិណា អាចចាត់ទុកជាគំរូមួយសម្រាប់យុវ័យនិងជំនាន់ក្រោយនៃ «ការមិនចុះចាញ់ចំពោះពាក្យរិះគន់ មើលងាយ» ពីមនុស្សខ្លះដែលធ្លាប់ត្រូវគេមើលងាយដោយសារជីវភាព មុខមាត់ រូបរាង ពណ៌សម្បុរ ភាសា ចុងក្រោយនាងយកការខិតខំប្រឹងប្រែងនេះដោយបានបង្ហាញមនុស្សជាច្រើនក្នុងពិភពលោកថា « ក្តីស្រមៃអាចសម្រេចបាន ប្រសិនបើមនុស្សម្នាក់មានឆន្ទៈ វិន័យ និងការតស៊ូ » និងមានការជួយជ្រោមជ្រែងលើកទឹកចិត្តពីយើងគ្រប់គ្នា ។ ជាពិសេសរូបខ្ញុំជាថ្នាក់ដឹកនាំក្នុងក្រសួងកិច្ចការនារី សូមអរគុណយ៉ាងជ្រាលជ្រៅបំផុត ចំពោះលោកឧកញ៉ា ជិន សំណាង ក្នុងនាមចាស់ទុំដែលគាំទ្រលក្ខិណា រួមជាមួយក្រុមការងាររបស់នាង ប្រជាពលរដ្ឋខ្មែរយើងជាច្រើនដែលចូលរួមឧបត្ថម្ភគាំទ្ររហូត លក្ខិណា ទទួលបានជោគជ័យនិងកិត្តិយសដ៍ឧត្តុង្គឧត្តមមកជូនជាតិ និងយើងគ្រប់គ្នា ។
គួរបញ្ជាក់ថា អ៊ិន លក្ខិណា ទើបបានបញ្ចប់នូវបេសកកម្មរបស់ខ្លួននៅក្នុងនាមជាបវរកញ្ញាតំណាងប្រទេសកម្ពុជាចូលរួមក្នុងកម្មវិធី Miss world 2026 ដែលបានរៀបចំនៅប្រទេសវៀតណាម ដែលមានបេក្ខភាពចូលរួមប្រមាណជា១០០ប្រទេសមកពីជុំវិញពិភពលោក ។
បើទោះបីជាមិនបានគ្រងម្កុដ ប៉ុន្តែ អ៊ិន លក្ខិណា អាចទម្លុះរនាំងជាលើកដំបូងនៅក្នុងការឈានដល់វគ្គ Top ៤០ នៅក្នុងកម្មវិធីប្រកួតបវរកញ្ញាដ៏ធំនេះ ខណៈពេលដែលនាងក៏បានសម្តែងនូវមោទនភាពរបស់ខ្លួនដែលឈានដល់វគ្គនេះ និងអាចកាន់ទង់ជាតិកម្ពុជាបង្ហាញនៅលើឆាកអន្តរជាតិដ៏ធំមួយនេះផងដែរ ៕
ចែករំលែកព័តមាននេះ