ស្ងាត់ៗ! «រាជិនីក្រមា» មាន សូនីតា ក្លាយជាបេក្ខភាពបវរកញ្ញា Universal Woman Cambodia 2026
- ភ្នំពេញ
រាជធានីភ្នំពេញ ៖ មហាជន ជាពិសេសបណ្តាអ្នកគាំទ្របានសម្តែងការភ្ញាក់ផ្អើលយ៉ាងខ្លាំង នៅពេលដែលស្ងាត់ៗតារាសម្តែង មាន សូនីតា បានក្លាយជាបេក្ខភាពបវរកញ្ញា Universal Woman Cambodia 2026 ដើម្បីចូលរួមប្រកួតបវរកញ្ញា Universal Woman 2026 ដែលប្រទេសកម្ពុជាគឺជាម្ចាស់ផ្ទះ ខណៈពេលកម្មវិធីប្រកួតនឹងធ្វើឡើងនៅបំណាច់ឆ្នាំនេះ ។
ដំណឹងដ៏ភ្ញាក់ផ្អើលនេះត្រូវបានផ្សព្វផ្សាយពេញបណ្តាញសង្គម ក្នុងពេលដែលសាម៉ីខ្លួន មាន សូនីតា ក៏បានទទួលស្គាល់អំពីរឿងនេះផងដែរថា នាងបានត្រៀមខ្លួនរួចរាល់ហើយសម្រាប់ការប្រកួតប្រជែងក្នុងវិស័យបវរកញ្ញានាឆ្នាំនេះ ។
ទោះបីជាយ៉ាងណា មហាជន ជាពិសេសបណ្តាអ្នកគាំទ្ររូបនាងជាច្រើនបានសម្តែងការអបអរ និងស្វាគមន៍ចំពោះវត្តមានរបស់ មាន សូនីតា នៅក្នុងការចូលរួមប្រកួតបវរកញ្ញានាពេលនេះ ក្នុងពេលកន្លងមកក៏មានការជម្រុញឲ្យនាងចូលរួមប្រកួតផងដែរ ។
មហាជនបានដាក់ក្តីរំពឹងថា ការប្រកួត Universal Woman 2026 នាបំណាច់ឆ្នាំនេះ ដែលកម្ពុជាធ្វើជាម្ចាស់ផ្ទះ តារាសម្តែង មាន សូនីតា នឹងមិនធ្វើឲ្យអ្នកគាំទ្រអស់សង្ឃឹមឡើយ ពោលគឺនាងអាចនឹងទទួលបានជោគជ័យ ដោយសារតែនាងមានទាំងទេពកោសល្យសិល្បៈ និងរូបសម្រស់ផងដែរ ។
គួរបញ្ជាក់ថា មាន សូនីតា បានចាប់ផ្តើមបើកទំព័រសិល្បៈដំបូងរបស់ខ្លួនតាមរយៈការដាក់ពាក្យចូលប្រឡងក្នុងកម្មវិធី Freshie Boys & Girls ជំនាន់ទី៨ ឆ្នាំ២០០៩ ដែលជាលទ្ធតារាស្រីរូបនេះបានជាប់ចំណាត់ថ្នាក់លេខ៤ ក្នុងចំណោមបេក្ខភាពរាប់ពាន់អ្នក។
ចាប់តាំងពីនោះមក មាន សូនីតា ក៏ចាប់ផ្តើមមានការងារសិល្បៈជាបន្តបន្ទាប់មិនថា ការសម្តែងក្នុងបទចម្រៀង និងភាពយន្ត ខណៈពេលដែលភាពយន្តរឿង «បេះដូងអ្នកការពារ» គឺជារឿងដំបូងដែលនាងបានសម្ដែង ហើយក៏បានក្លាយជាទីចាប់អារម្មណ៍ពីសំណាក់ទស្សនិកជន ។
បើទោះបីជាមួយរយៈចុងក្រោយនេះ មាន សូនីតា ហាក់ស្ងប់ស្ងាត់ក្នុងវិស័យសិល្បៈបន្តិចមែន ប៉ុន្តែតារាស្រីរូបនេះក៏នៅតែមានសកម្មភាពនៅលើបណ្តាញសង្គម ដោយនាងតែងតែបង្ហាញរូបភាពផ្សព្វផ្សាយពីសម្លៀកបំពាក់ប្រពៃណីខ្មែរ និងតំបន់ទេសចរណ៍នានានៅក្នុងប្រទេសកម្ពុជា ។
តារាស្រីរូបនេះក៏មានភាពសកម្មផងដែរនៅក្នុងផ្សព្វផ្សាយពីក្រមាខ្មែរ រហូតនាងជាប់ឈ្មោះជារាជិនីក្រមា ហើយជាពិសេសថែមទៀតនោះ មាន សូនីតា ក៏ធ្លាប់ច្នៃម៉ូតសម្លៀកបំពាក់ក្រមាខ្មែរអមដោយអក្សរយ័ន្ត រំលេចឌិន តាមរចនាប័ទ្មបុរាណ ទំនើប ដើរលើកម្រាលព្រំក្រហមទីក្រុងកាន កាលពីអំឡុងឆ្នាំ២០២៤ ផងដែរ ៕
ចែករំលែកព័តមាននេះ