ពៅ បញ្ញាពេជ្រ បង្ហោះសារ «លែងប្រាថ្នាអ្វីច្រើន ក្រៅពីរូបរាងបច្ចុប្បន្នគឺគ្រប់គ្រាន់»
- ភ្នំពេញ
រាជធានីភ្នំពេញ ៖ មហាជន ជាពិសេសបណ្តាអ្នកគាំទ្រអតីតតារាចម្រៀងសំនៀងរៃកណ្តឹង គឺកញ្ញា ពៅ បញ្ញាពេជ្រ បានសម្តែងក្តីអាណិតអាសូរ ជាពិសេសកាន់តែស្រណោះសម្តីនៅពេលដែលគេឃើញនាងបង្ហោះសារ និងបានពោលពាក្យថា នាងលែងប៉ងប្រាថ្នាអ្វីច្រើនហើយ ក្រៅពីបានរូបរាងដូចសព្វថ្ងៃនេះគឺគ្រប់គ្រាន់ហើយសម្រាប់រូបនាង ។
ពៅ បញ្ញាពេជ្រ បានបញ្ជាក់ថា ទំរាំនាងអាចវិវត្តន៍ខ្លួនបានដូចសព្វថ្ងៃនេះ គឺនាងត្រូវឆ្លងកាត់ភាពវេទនាជាច្រើន ហេតុនេះនាងលែងប្រាថ្នាអ្វីច្រើនជាងនេះទៀតទេ បើទោះបីជាបច្ចុប្បន្ននាងធ្លាក់ខ្លួនពិការជិះតែលើរទះរុញក៏ដោយ ។
ស្ថិតក្នុងរូបភាពពិការអង្គុយលើរទះរុញ ពៅ បញ្ញាពេជ្រ បានលើកឡើងតាមរយៈបណ្តាញសង្គមថា «នាងខ្ញុំបាននៅសល់ប៉ុណ្ណឹងក៏នាងខ្ញុំព្រមទទួលយក នាងខ្ញុំធ្លាប់ឆ្លងកាត់វេទនាអស់ហើយ ទំរាំបានវិវត្តន៍ខ្លួនមកបានប៉ុនសព្វថ្ងៃនេះ» ។
នាងបញ្ជាក់ថា ទោះបីអង្គុយលើរទេះរុញ មិនស្អាត មិនមានភាពទាក់ទាញ តែកម្លាំងចិត្ត និងការគិតរបស់នាងខ្ញុំមិនពិការដូចរាងកាយឡើយ សំខាន់នៅរស់ មានសុខភាពផ្លូវចិត្តល្អ ។
ទោះជាយ៉ាងណា ក្រោយឃើញការលើកឡើងរបស់ ពៅ បញ្ញាពេជ្រ នាពេលនេះ មហាជនជាច្រើនបានចូលទៅខំមិន ដោយម្នាក់ៗសម្តែងការនឹករលឹក និងស្រណោះសំដីរបស់នាង ខណៈពេលពួកគេក៏បានជូនពរឲ្យរូបនាងមានសុខភាពល្អផងដែរ ។
គួរបញ្ជាក់ថា បន្ទាប់ពីរងការបាញ់ប្រហារពីជនមិនស្គាល់មុខកាលពីអំឡុងឆ្នាំ២០០៧ អតីតតារាចម្រៀង កញ្ញា ពៅ បញ្ញាពេជ្រ បានធ្លាក់ខ្លួនពិការ អង្គុយតែលើរទះរុញ ដែលគិតមកទល់នាពេលនេះ មានរយៈពេលប្រមាណជិត២០ឆ្នាំហើយ ។
តារាស្រីរូបនេះបានប្រឹងប្រែងនៅក្នុងការព្យាបាលជំងឺរបស់ខ្លួនទាំងនៅក្នុងស្រុក និងក្រៅស្រុក អស់ជាច្រើនឆ្នាំ ទម្រាំនាងអាចវិវឌ្ឍន៍បានដល់សព្វថ្ងៃ បើទោះបីជាស្ថានភាពរបស់នាងអាចក្លាយជាជនពិការអស់មួយជីវិតក៏ដោយ ។
ទោះជាយ៉ាងណា អំឡុងពេលដែល ពៅ បញ្ញាពេជ្រ អាចមានឱកាសចេញមុខក្នុងសង្គមជាថ្មីឡើងមកទល់នាពេលបច្ចុប្បន្ន នាងក៏ធ្លាប់គូសបញ្ជាក់ថា ការវិលមកវិញរបស់នាងនាពេលនេះគឺនាងមិនមានក្តីប៉ងប្រាថ្នាអ្វី ក្រៅពីសុំរស់មានឈ្មោះជាជនពិការម្នាក់ប៉ុណ្ណោះ ។
ដោយសារតែបែបនេះ តាមរយៈបណ្តាញសង្គមនោះ ពៅ បញ្ញាពេជ្រ តែងតែបង្ហោះពីសកម្មភាពរបស់ខ្លួនជាបន្តបន្ទាប់ពាក់ព័ន្ធការដើរកម្សាន្តទៅតាមកន្លែងរមណីយដ្ឋានផ្សេងៗ ការធ្វើបុណ្យទានតាមទីវត្តអារាមនានា និងការច្រៀងលេងកម្សាន្តតាមការសំណូមពរពីបណ្តាអ្នកគាំទ្ររបស់នាងផងដែរ ។
បើទោះបីជាឃ្លាតឆ្ងាយពីអាជីពសិល្បៈអស់ជាច្រើនឆ្នាំក៏ដោយ ប៉ុន្តែអតីតតារាចម្រៀង ពៅ បញ្ញាពេជ្រ នៅតែទទួលបានការស្រឡាញ់គាំទ្រពីមជ្ឈដ្ឋានមហាជនដដែល ដោយគេសម្គាល់ឃើញថា នៅពេលនាងមានវត្តមាននៅទីសាធារណៈណាមួយនោះ គឺឃើញមានវត្តមានមហាជនទាំងចាស់ក្មេងជាច្រើននាក់បានចូលមកសុំនាងថតរូបជាមួយ នៅក្នុងនោះពួកគេក៏បានបង្ហាញពីការអាណិតស្រលាញ់ និងផ្ដល់ជាកម្លាំងចិត្តដល់នាងថែមទៀតផង ៕
ចែករំលែកព័តមាននេះ