ខេត្តប៉ៃលិន ៖ បន្ទាប់ពីកាសែត និងគេហទំព័រកោះសន្តិភាពបានចេញផ្សាយកាលពីពេល ថ្មីៗកន្លងទៅនេះរហូតដល់រសៀលថ្ងៃទី១១ ខែកញ្ញា ឆ្នាំ២០១៩ មានសប្បុរសជនម្នាក់រស់នៅឯរាជធានីភ្នំពេញបានឧបត្ថម្ភជាថវិកាចំនួន១០០០០០រៀល ដល់បុរសឯកោកំសត់ម្នាក់ ខណ:យកដៃរុញរទេះរើសសំរាមដែលគេបោះចោលតាមដងផ្លូវដាក់ក្នុងការ៉ុង ដើម្បីផ្សំគ្នាទុកលក់អេតចាយយកប្រាក់ទិញអាហារចិញ្ចឹមជីវិត ។
សូមបញ្ជាក់ថា បុរសពិការជើងទាំងសងខាងទុគ៌តម្នាក់ឈ្មោះ ទូច វណ្ណា អាយុ៤៥ឆ្នាំ មានស្រុកកំណើត នៅភូមិអូរតាថុក ឃុំថ្មពូន ស្រុកព្រៃឈរ ខេត្តកំពង់ចាម មានប្រពន្ធឈ្មោះ ហុន ហៀង អាយុ៣៧ឆ្នាំ មានស្រុកកំណើតនៅភូមិដុំ ឃុំពាមរក៍ ស្រុកស្វាយអន្ទរ ខេត្តព្រៃវែង ដោយបានរៀបការជាប្តីប្រពន្ធ ផ្លាស់លំនៅទៅរស់នៅក្នុងខេត្តប៉ៃលិន បង្កើតបានកូនម្នាក់ឈ្មោះ ផង់ សុផានិត ភេទស្រី អាយុ៦ឆ្នាំ បច្ចុប្បន្នរស់នៅម្នាក់ឯង ក្នុងភូមិអូររអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
លោកទូច វណ្ណា បានត្រេកអរយ៉ាងខ្លាំងស្ទើរស្រក់ទឹកភ្នែក ខណ:ទទួលអំណោយថវិកាចំនួន១០០០០០រៀលពីសប្បុរសជនម្នាក់ឈ្មោះ សេង គី រស់នៅក្នុងរាជធានីភ្នំពេញ ដោយគាត់ក៏បានជូនពរឱ្យម្ចាស់ជំនួយទទួលបាននូវកុសលផលបុណ្យកាន់តែច្រើនហូរហៀបន្ថែមទៀត ហើយជាពិសេសឱ្យបានរស់នៅជួបជុំក្រុមគ្រួសារសុខសាន្តកុំឱ្យស្គាល់អត់ឃ្លានអ្វីឡើយ ។
លោកបន្តទៀតថា ថវិកានេះពិតជាច្រើនខ្លាំងណាស់សម្រាប់រូបគាត់ដែលជាជនពិការ បើទោះបីជាគាត់ខិតខំប្រឹងរក១ជីវិតក៏មិនបានដែរ ព្រោះរាល់ថ្ងៃរុញរទេះរកសម្បកដបលក់អេតចាយបានត្រឹមតែ៣០០០ទៅ៥០០០រៀលក្នុង១ថ្ងៃប៉ុណ្ណោះ ។
ចំណែកលោក ស្វាយ ហឿន អនុភូមិអូររអិលជំនួសឱ្យបុរសជនពិការក៏សូមត្រេកអរជំនួស និងសូមឱ្យម្ចាស់ជំនួយទទួលបាននូវបុណ្យ និងថ្លែងអំណរគុណយ៉ាងជ្រាលជ្រៅដល់ម្ចាស់ជំនួយដែលបានចែករំលែកនូវទ្រព្យសម្បត្តិរបស់ខ្លួនដល់ជនក្រីក្រ ជាពិសេស គឺបុរសខាងលើដែលធ្លាក់ខ្លួនពិការ ហើយត្រូវប្រពន្ធរត់ចោលដោយគ្មានក្តីអាឡោះអាល័យ ។
លោកបន្តទៀតថា នៅតែបន្តិចទៀតខាងម្ចាស់ផ្ទះ និងដីគេលក់ឱ្យឈ្មួញ ដូច្នេះគាត់ក៏គ្មានកន្លែងអ្វីស្នាក់នៅបន្តទៀតដែរ មិនដឹងជាទៅរកកន្លែងណាបានជ្រកកោននោះឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ