(រាជធានីភ្នំពេញ)៖ ប្រធានសសហព័ន្ធស្រូវអង្ករកម្ពុជាបានជំរុញលើកទឹកចិត្តដល់ប្រជាកសិករខ្មែរឱ្យធ្វើការដាំដុះស្រូវអង្ករបាយទន់ឱ្យបានកាន់តែច្រើនជំនួសឱ្យការដាំដុះប្រភេទស្រូវ IR504 ដើម្បីងាយស្រួលក្នុងការស្វែងរកទីផ្សារនាំចេញ ខណៈតួលេខនៃការនាំចេញក្នុងខែសីហាកន្លងមកមានការធ្លាក់ចុះរហូតដល់ប្រមាណជាង ២៣% ដោយសារតែការប្រមូលផលអង្ករសែនក្រអូបនៅក្នុងខែសីហាកន្លងទៅ មានការយឺតយ៉ាវជាង១ខែ ដោយសារតែមានភ្លៀងធ្លាក់តិចពេក ។
លោកឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជាបានឱ្យដឹងថា សហពន្ធ័ស្រូវអង្កររវល់រកទីផ្សារថ្មីៗបន្ថែមជូនសមាជិកកសិករ រោងម៉ាស៊ីនកិនស្រូវ ជាពិសេសទីផ្សារប្រទេសចិន ។ ដូច្នេះលោកស្នើដល់កសិករដាំដុះស្រូវអង្ករបាយទន់ ជំនួសអោយ IR504 និង ដាំដុះស្រូវអង្ករក្រអូបដើម្បីងាយស្រួលរកទីផ្សារនាំចេញ។ លោកបានលើកឡើងថា «យើងមានការរអាក់រអួលបន្តិចនៅខែសីហា ដែលការនាំចេញអង្ករធ្លាក់ចុះជាង២៣% ដោយសារអង្ករសែនក្រអូបទើបបានច្រូតកាត់ច្រើនក្នុងអាទិត្យនេះទេ យឺតជាង១ ខែ ដោយសារភ្លៀងតិចពេក តែបើនិយាយពីតម្លៃវិញគឺថា តម្លៃស្រូវសែនក្រអូប ប្រសើរជាង ឆ្នាំមុនៗ ។ សមាជិកររោងម៉ាស៊ីនកិន ស្រូវ កសិករ សហគមន៍កសិកម្មកំពុងមមាញឹកច្រូតកាត់ កិន កែឆ្នៃនាំចេញ ខែកញ្ញា តទៅនេះ »។
យោងតាមរបាយការណ៍លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករបង្ហាញថា គិតត្រឹមរយៈពេល៨ខែដើមឆ្នាំ២០១៩នេះ កម្ពុជាបានធ្វើការនាំចេញអង្ករទៅបរទេសមានចំនួនសរុបជាង៣៤,២ម៉ឺនតោន បើប្រៀបធៀបទៅនឹងរយៈពេលដូចគ្នាឆ្នាំ២០១៨មាន៣៤,១ម៉ឺនតោន ពោលគឺមានការកើនឡើងត្រឹមតែ០,១០%ប៉ុណ្ណោះ។ ប្រភពដដែលបានឲ្យដឹងថានៅខែសីហាឆ្នាំ២០១៩ ការនាំចេញអង្កររបស់កម្ពុជា សម្រេចបានតែប្រមាណ ៣៤ពាន់តោនប៉ុណ្ណោះ ខណៈដែលកាលពីខែសីហាឆ្នាំ២០១៨កន្លងទៅនេះ សម្រេចបានជាង ៤៤ពាន់តោន ពោលគឺ ធ្លាក់ចុះ ជាង១០ ពាន់តោន គិតជាភាគរយគឺធ្លាក់ចុះប្រមាណ២៣,៦%។
របាយការណ៍ដដែលបានបង្ហាញលម្អិតថា ក្នុងរយៈពេល៨ខែកន្លងទៅនេះ កម្ពុជានាំចេញអង្ករ ក្រអូបចម្រុះបានជាង១២,៧ម៉ឺនតោន, អង្ករនាងម្លិសជាង១.០០០តោន,អង្ករសូមាលី បានជិត២.០០០តោន, អង្ករផ្ការំដួលបានជាង១៤,៧ម៉ឺនតោន, អង្ករសិរីរាង្គបានជាង៨.០០០តោន, អង្ករភ្លឺ បានជាង៤៨តោន, អង្ករសរគ្រាប់វែងចម្រុះបានជាង៤,៧ម៉ឺនតោន, អង្ករប្រណិតគ្រាប់វែងបានជាង២.៧០០តោន និងអង្ករចំហុយគ្រាប់វែងបានជាង៥.០០០តោន ។
យ៉ាងណាមិញលោកឧកញ៉ា លើកឡើងថា ការនាំចេញទៅសហគមន៍អឺរុបមានការធ្លាក់ចុះជាបរិមាណ ដោយសារការដាក់វិធានការដាក់ពន្ធរយៈពេល៣ឆ្នាំនេះ តែប្រាក់ចូលសេដ្ឋកិច្ចកម្ពជាពីការនាំចេញអង្ករទៅសហគមន៍ថយចុះបន្តិចបន្តួច ដោយសារសហព័ន្ធស្រូវអង្ករជំរុញនាំចេញតែអង្ករល្អពិសេសនៃអត្តសញ្ញាណជាតិ អង្ករល្អដាច់គេលើពិភពលោក ។ ហើយរាជរដ្ឋាភិបាលបាននិងកំពុងកាត់បន្ថយចំណាយថ្លៃដើម ប្រាកដណាស់ទីផ្សារនៅអង្ករកម្ពុជានៅសហគមន៍អឺរុបរឹតតែមានលក្ខណះប្រកួតប្រជែងខ្លាំង នៅពេលវិធានការយកពន្ធអស់សុពលភាពនៅចុងឆ្នាំ ២០២២ ៕ កែសម្រួលដោយ ៖ សុឃាក់
ចែករំលែកព័តមាននេះ