មហាសេដ្ឋី Ray Dalio ៖ អ្នកគួរតែស្រលាញ់ការរិះគន់ !
លើលោកនេះប្រហែលជាមិនមានមនុស្សច្រើនទេ ដែលចូលចិត្តស្តាប់ការរិះគន់ ។ ប៉ុន្តែយោងតាមលោកមហាសេដ្ឋី Ray Dalio ដែលជាស្ថាបនិក Bridgewater Associates បានឲ្យដឹងថា…
លើលោកនេះប្រហែលជាមិនមានមនុស្សច្រើនទេ ដែលចូលចិត្តស្តាប់ការរិះគន់ ។ ប៉ុន្តែយោងតាមលោកមហាសេដ្ឋី Ray Dalio ដែលជាស្ថាបនិក Bridgewater Associates បានឲ្យដឹងថា មនុស្សមិនគួរគេចវេះវាឡើយ ។ ផ្ទុយមកវិញលោកគិតថាមនុស្សគួរតែស្វាគមន៍ទទួលវាក្នុងជីវិត ។ មូលហេតុអ្វី? លោកបានប្រាប់ថាវាផ្តល់ជាឱកាសក្នុងការឲ្យអ្នកសាកល្បងគំនិតរបស់អ្នក និងធ្វើឲ្យអ្នកធ្វើការសម្រេចចិត្តបានប្រសើរជាងមុនក្នុងស្ថានការដែលស្ត្រេស ។
លោកបានចែករំលែកមកថា កាលពីឆ្នាំ ១៩៨២ លោកបានព្យាករណ៍ដោយមិនមានភស្តុតាងថាទីផ្សារភាគហ៊ុននឹងជួបវិបត្តិ ប៉ុន្តែលោកបានបោះបង់វាចោលវេញបន្ទាប់ពីទទួលបានការរិះគន់ពីអ្នកដទៃ។ លោកបានបន្តថាក្រៅពីភរិយា និងកូនៗហើយ បទពិសោធន៍នេះជារឿងល្អបំផុតដែលបានកើតឡើងក្នុងជីវិតរបស់លោក ។ វាបានធ្វើឲ្យលោកគិតថា ធ្វើដូចម្តេចទើបលោកដឹងថាលោកត្រូវ?
ជាមួយគ្នានេះផងដែរ ទស្សនៈនេះបានផ្លាស់ប្តូរជីវិតរបស់លោក ។ លោក Dalio ចាប់ផ្តើមស្វែងរកមនុស្សដែលវៃឆ្លាតមកបដិសេធនឹងគំនិតរបស់លោក ហើយលោកតែងតែព្យាយាមឈ្វេងយល់ពីការបកស្រាយរបស់ពួកគេ រួចស្វែងរកដំណោះស្រាយ ។ លោកបានអនុវត្តយុទ្ធសាស្ត្រនេះរហូតដល់វាក្លាយទៅជាវប្បធម៌មួយសម្រាប់ Bridgewater Associates ។ វប្បធម៌នេះជំរុញដល់បុគ្គលិកឲ្យផ្តល់មតិយោបល់ដោយបើកទូលាយ មិនថាវាវិជ្ជមានឬអវិជ្ជមាន និងមិនថាពួកគេមកពីផ្នែកណាឬមានតំណែងអ្វីឡើយសូម្បីតែលោកផងដែរ ។ លោកបានបន្ថែមថា មនុស្សគ្រប់រូបដែលធ្វើការជាមួយលោកមានសិទ្ធិក្នុងការប្រឆាំងគំនិតរបស់លោក ។
សម្រាប់មនុស្សដែលមិនចូលចិត្តស្តាប់ការរិះគន់ លោក Dalio គិតថាវាមិនផ្តល់ផលប្រយោជន៍អ្វីដល់ពួកគេទេ ព្រោះពេលដែលមនុស្សដទៃរក្សាគំនិតប្រឆាំងក្នុងខួរក្បាលហើយមិននិយាយចេញមក វាប៉ះពាល់ដល់ប្រសិទ្ធិភាពការងារ ៕ កែសម្រួលដោយ ៖ សុឃាក់
ចែករំលែកព័តមាននេះ