ច្បាប់ធម្មជាតិដែលអាជីវកម្មជោគជ័យត្រូវគោរពតាម

ថ្ងៃទី ០៩ ខែ កញ្ញា ឆ្នាំ ២០១៩

ម៉ោង ១៤:៤៨

សហគ្រិនជាច្រើនជួបឧបសគ្គក្នុងការស្ថាបនាអាជីវកម្មរបស់ខ្លួន ។ ប៉ុន្តែសហគ្រិនដែលជោគជ័យជាច្រើនក្នុងផ្នែកអាជីវកម្មមិនមានថាមពលពិសេស ឬសំណាងអ្វីទេ ។ ផ្ទុយមកវិញពួកគេគ្រាន់តែគោរពតាមច្បាប់ធម្មជាតិសំខាន់ៗមួយចំនួនប៉ុណ្ណោះ ដែលមានដូចខាងក្រោមនេះ ៖

១. ច្បាប់សមិទ្ធិកម្ម ៖ រាល់ការសម្រេចចិត្តដែលបុគ្គលម្នាក់ៗឆ្លងកាត់រាល់អ្វីៗដែលពួកគេបង្កើត និងអ្វីៗដែលពួកគេបានធ្វើឡើងតែងតែជះឥទ្ធិពល ។ ជាមួយគ្នានេះផងដែររាល់បញ្ហាដែលជួបប្រទះ និងរាល់ភាពជោគជ័យដែលទទួលបានសុទ្ធតែជាលទ្ធផលដែលបង្កពីកត្តាជាច្រើន ។ ដោយហេតុដូចនេះ ម្ចាស់អាជីវកម្មគួរតែមានសមត្ថភាពក្នុងការស្វែងរកមូលហេតុ ឬប្រភពនៃលទ្ធផលណាមួយ ព្រមទាំងគិត និងសាកល្បងកត្តាផ្សេងៗគ្នា ដើម្បីសម្រេចបានលទ្ធផលដែលខ្លួនចង់បាន ។

២. ច្បាប់នៃការជួយសហគមន៍ ៖ សហគ្រិនជោគជ័យជឿជាក់លើទស្សនៈជួយច្រើនទទួលមកវិញច្រើន ។ ដើម្បីជោគជ័យអ្នកត្រូវតែសួរសំណួរដូចជា តើខ្ញុំអាចចូលរួមក្នុងសហគមន៍ច្រើនជាងម្សិលមិញបានដោយវិធីណា ? មិនមែនសួរ តែតើខ្ញុំគួរធ្វើដូចម្តេច ដើម្បីបង្កើនការលក់តែមួយទេ ។

៣. ច្បាប់នៃការទទួល ៖ ពេលដែលមនុស្សមិនទទួលយកការពិតទាំងក្នុងជីវិត និងក្នុងអាជីវកម្ម ពួកគេនឹងជួបនឹងបញ្ហាជាច្រើនទាំងផ្នែករាងកាយ និងផ្លូវចិត្ត ។ ពេលខ្លះអាជីវកម្មត្រូវតែទទួលយកអ្វីដែលកើតឡើងថា វាកើតឡើងដោយធម្មជាតិ និងសម្របខ្លួនទៅតាមការផ្លាស់ប្តូរវិញ ។ ឧទាហរណ៍ដូចជា ការឈប់ប្រើហ្វ៊ីលសម្រាប់កាមេរ៉ាបានធ្វើឲ្យក្រុមហ៊ុនផលិតហ្វ៊ីលជាច្រើនដួលរលំ ព្រោះពួកគេមិនសម្របខ្លួននឹងការផ្លាស់ប្តូរនេះជាដើម ។

៤. ច្បាប់នៃការបង្កើត ៖ មនុស្សគ្រប់រូបមានសមត្ថភាពក្នុងការបង្កើតទាំងគំនិតថ្មីៗទំនាក់ទំនងថ្មីៗ អាជីវកម្មថ្មីៗ ឬសិល្បៈថ្មីៗជាដើម ។ ប៉ុន្តែមនុស្សជាច្រើនធ្លាក់ខ្លួនក្នុងទម្លាប់អាក្រក់មួយដែលតែងតែធ្វើតាមអ្វីដែលមនុស្សជុំវិញខ្លួនប្រាប់ពួកគេឲ្យធ្វើ ។ អាជីវកម្ម ឬក្រុមហ៊ុនដែលជោគជ័យ គឺជាកន្លែងដែលអនុញ្ញាតឲ្យមនុស្សបង្កើតគំនិតថ្មីៗសាកល្បងរួចបង្កើតផលិតផល និងសេវាថ្មីៗសម្រាប់ទីផ្សារ ៕ កែសម្រួលដោយ ៖ សុឃាក់