តពីវគ្គមុនៗ ព្រះចៅអធិការដំបូងគេបង្អស់ព្រះនាមបាឡាត់ ដែលបានកសាងវត្តនេះព្រះអង្គមានមហិទ្ធឫទ្ធិខ្លាំងពូកែណាស់ ព្រះអង្គចេះមន្តអាគមន៍ផ្សេងៗគួរឲ្យស្ងប់ស្ងែង ហើយក៏ជាមិត្តភក្ដិរបស់ព្រះអង្គម្ចាស់ថ្លៃដែលកសាងវត្តភូមិថ្មីក្នុងឃុំបែកចាន ស្រុកអង្គស្នួល ខត្តកណ្ដាល ។ បន្ទាប់មក គឺលោកតាឃួន ក៏មានមន្តអាគមន៍ខ្លាំងពូកែទៀតដូចជា ការការចង់ឆាន់ផ្លែឪឡឹក គឺយកគ្រាប់ឪឡឹកដាំពេលព្រឹកលុះដល់ពេលល្ងាចឪឡឹកដុះបានផ្លែទុំឆាន់ហើយ។
រីឯភាពអស្ចារ្យមួយទៀត គឺមានថ្ងៃមួយព្រះតេជគុណ ឃួន និមន្តទៅបិណ្ឌបាត្របាត់ ។ ស្រាប់តែមានសត្វខ្លែងស្រាក់ហើរទៅចាប់កូនមាន់សំឡី១ក្បាល ដែលព្រះអង្គចិញ្ចឹមនៅក្នងវត្តទៅបាត់ ។ លុះពេលត្រឡប់មកពីបិណ្ឌបាត្រវិញកូនសិស្សទូលប្រាប់តាមដំណើររឿង ព្រះគ្រូឃួន បានសួរថា «តើសត្វខ្លែងស្រាក់នោះវាហើរទៅទិសខាងណា? កូនសិស្សប្រាប់ថា ហើរទៅទិសខាងលិចបាត់ហើយ» ខណៈនោះព្រះអង្គបានប្រាប់ឲ្យកូនសិស្សយកចំពាមកៅស៊ូព្រមទាំងដុំដីប្រគេនព្រះអង្គ រួចព្រះអង្គបានសូត្រមន្តអាគមន៍ដាក់ដុំដីនោះរួចបាញ់សំដៅទៅទិសដែលកូនសិស្សប្រាប់ ។ ដែលពេលនោះមិនដឹងថា សត្វខ្លែងស្រាក់នោះហោះហើរទៅដល់ទីណាឡើយ ប៉ុន្តែក្រោយពីព្រះអង្គបាញ់ដុំដីនោះទៅមិនយូរប៉ុន្មាន ស្រាប់តែសត្វខ្លែងស្រាក់នោះបាក់ស្លាប ហើយបានធ្លាក់នៅចំពោះព្រះភ័ក្ត្រព្រះអង្គ ។
ពេលនោះព្រះគ្រូចៅអធិការបានចាប់យកសត្វនោះយកមកវាយ និងប្រដៅថា កុំឲ្យខូចទៀតរួចបានសូត្រមន្តអាគមន៍ផ្លុំឲ្យស្លាបបក្សីប្រភេទនេះជាដូចដើម ទើបលែងឲ្យទៅវិញ មិនតែប៉ុណ្ណោះសត្វផ្សេងៗបើហ៊ានហើររំលង ឬកាត់មុខព្រះវិហារមិនអាចហើររំលងផុតនោះទេច្បាស់ជាធ្លាក់មិនខានឡើយ ។
លោកផាន់ មឿក បានប្រាប់ឲ្យដឹងបន្តទៀតថា បន្ទាប់ពីព្រះចៅអធិការឃួន សុគត ទៅមិនដឹងថា មានចៅអធិការព្រះនាមអ្វីទៀតទេ ប៉ុន្តែតាមការដំណាលមកថា មានចៅអធិការ១អង្គទៀតនាមលោកតាព្រៃ ចេះមន្តអាគមន៍ និងវិជ្ជាគុនខ្លាំងពូកែដែរ ។ ប៉ុន្តែនៅសម័យបារាំងលោកតាព្រៃបានសឹកចាកសិក្ខបទហើយ លោកមានទីតាំងហាត់គុនមួយនាជំនាន់នោះ ដែលតាព្រៃហាត់រហូតខូងដីក្លាយជាត្រពាំងមួយ ហើយអ្នកស្រុកដាក់ឈ្មោះថា «ត្រពាំងហាត់គុន» លុះបច្ចុប្បន្នបានក្លាយមកជា «ត្រពាំងគុន»វិញ ។
ប៉ុន្តែត្រពាំងនេះមិនជ្រៅដូចជា ស្រះនោះទេ គ្រាន់តែជ្រៅជាងស្រែធម្មតាបន្តិចប៉ុណ្ណោះ ហើយក៏ជាត្រពាំងដែលលោកស្ទូងស្រូវរាល់ឆ្នាំថែមទៀតផង ។ ហើយលោកតាព្រៃត្រូវបានបារាំងដុតផ្ទះ និងចាប់ចងសម្លាប់តែមិនស្លាប់ឡើយ បន្ទាប់មកបារាំងបានចាប់យកទៅដាក់នៅកោះត្រឡាច និងបានយកដែកគោលខ្មែរវែងៗទៅវាយបោះលើប្រអប់ជើងជាប់ និងក្ដារឈើមើលទៅឃើញមានឈាមហូរកក្លាក់ថែមទៀត ប៉ុន្តែក្រោយវាយបោះរួចបាំរាំងដើរចេញស្រាប់តែជើងលោកតារបូតចេញពីដែកគោលហើយនៅជាប់តែក្ដារប៉ុណ្ណោះ ។
បារាំងមិនអាចធ្វើឲ្យលោកតាព្រៃស្លាប់ឡើយ គឺពិតជាកំពូលខ្លាំងណាស់ ហើយរឿងរ៉ាវរបស់លោកតាព្រៃនេះ គឺលោកឪពុករបស់លោកផ្ទាល់ជាអ្នកនិយាយប្រាប់ ៕ កែសម្រួលដោយ ៖ សុឃាក់
ចែករំលែកព័តមាននេះ