លោក សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមប្រឹក្សាជាតិអភិវឌ្ឍដោយចីរភាពបានគូសបញ្ជាក់ថា វិទ្យាសាស្ត្រ និងបច្ចេកវិទ្យា គឺជាគ្រឹះនៃសន្តិភាពរបស់ប្រទេសជាតិនឹងនាំឱ្យមានការរីកចម្រើនយ៉ាងឆាប់រហ័ស ក្នុងនោះយើងចាំបាច់ត្រូវការអ្នកមានជំនាញច្បាស់លាស់ ។…
លោក សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមប្រឹក្សាជាតិអភិវឌ្ឍដោយចីរភាពបានគូសបញ្ជាក់ថា វិទ្យាសាស្ត្រ និងបច្ចេកវិទ្យា គឺជាគ្រឹះនៃសន្តិភាពរបស់ប្រទេសជាតិនឹងនាំឱ្យមានការរីកចម្រើនយ៉ាងឆាប់រហ័ស ក្នុងនោះយើងចាំបាច់ត្រូវការអ្នកមានជំនាញច្បាស់លាស់ ។
ការជំរុញរបស់លោក សាយ សំអាល់ ធ្វើឡើងនៅក្នុងពិធីជួបជុំពិភាក្សាអំពីវិទ្យាសាស្ត្រ និងបច្ចេកវិទ្យារៀបចំជាដំបូងដោយក្រុមប្រឹក្សាជាតិអភិវឌ្ឍន៍ដោយចីរភាពនៅទីស្តីការក្រសួងបរិស្ថាន នាថ្ងៃទី២៤ ខែសីហា ឆ្នាំ២០១៨ ។ លោក សាយ សំអាល់ បានវាយតម្លៃខ្ពស់នៃតួនាទី និងសារៈសំខាន់នៃការសិក្សាផ្នែកវិទ្យាសាស្ត្រ និងបច្ចេកវិទ្យា ដែលជាឧបករណ៍ដ៏អស្ចារ្យក្នុងការបង្ហាញនូវសេចក្តីពិត និងការអភិវឌ្ឍប្រទេសក្នុងអនាគត ។ លោករដ្ឋមន្ត្រីមានប្រសាសន៍ថា វិទ្យាសាស្ត្រ និងបច្ចេកវិទ្យា គឺជាគ្រឹះនៃសន្តិភាពរបស់ប្រទេសជាតិនឹងនាំឱ្យមានការរីកចម្រើនយ៉ាងឆាប់រហ័សក្នុងនោះយើងចាំបាច់ត្រូវការអ្នកមានជំនាញច្បាស់លាស់ ។
លោក សាយ សំអាល់ លើកទឹកចិត្តនិស្សិតកម្ពុជាចាប់យកជំនាញសិក្សាលើផ្នែកវិទ្យាសាស្ត្រ និងបច្ចេកវិទ្យាបានច្រើនថែមទៀតព្រោះការសិក្សាស្រាវជ្រាវលើជំនាញនេះមានតិចតួចនៅឡើយ ។ យើងត្រូវហ៊ានមើលឆ្ងាយនាពេលបច្ចុប្បន្នយើងរៀនវិទ្យាសាស្ត្រ និងបច្ចេកវិទ្យាដើម្បីរក្សានូវស្ថេរភាព និងដើម្បីធានាសន្តិសុខរបស់កម្ពុជាផងដែរនេះជាការលើកឡើងបន្ថែមរបស់លោករដ្ឋមន្ត្រីក្រសួងបរិស្ថាន ។
លោក ទិន ពន្លក អគ្គលេខាធិការនៃក្រុមប្រឹក្សាជាតិអភិវឌ្ឍដោយចីរភាពបានអោយដឹងថា វិទ្យាសាស្ត្រ និងបច្ចេកវិទ្យា គឺមានសារៈសំខាន់ណាស់ដែលជាធាតុចូលក្នុងការផ្តល់នូវការអភិវឌ្ឍរបស់ប្រទេសជាតិដែលបណ្តាប្រទេសនានានៅទូទាំងពិភពលោកបានវិវត្តន៍ខ្លួនបានយ៉ាងឆាប់រហ័សជាមួយការកែច្នៃអ្វីដែលថ្មីៗសម្រាប់ប្រើប្រាស់ និងផ្គត់ផ្គង់តម្រូវការប្រចាំថ្ងៃ ។ សូមបញ្ជាក់ថា គោលបំណងដែលថ្នាក់ដឹកនាំក្រសួងបរិស្ថានផ្តួចផ្តើម ប្រមូលផ្តុំគំនិតនៃអ្នកជំនាញវិទ្យាសាស្ត្រ និងបច្ចេកវិទ្យា ដោយផ្តោតទៅលើការពង្រឹងក្រមសីលធម៌នៃការស្រាវជ្រាវ ស្រលាញ់សច្ចភាព និងការចង់ដឹង ដើម្បីឈានឆ្ពោះទៅកាន់ភាពជោគជ័យនៃការអភិវឌ្ឍន៍ប្រទេសថែមទៀត ៕
ចែករំលែកព័តមាននេះ