រាជធានីភ្នំពេញ ៖ ម្ចាស់រួមទាំងមិត្តភក្តិធ្វើដំណើរមកពីខេត្ត ឡើងមកភ្នំពេញ ទើបតែទិញរថយន្តមួយគ្រឿងប្រភេទមួយបាំងកន្លះដ៏ថ្មីសន្លាង ដោយសារតែមិនហ៊ានបើកបរក្នុងក្រុង ទើបម្ចាស់ជួលអ្នកបើកបរម្នាក់ឱ្យជួយបើកដើម្បីយករថយន្តនោះត្រឡប់ទៅខេត្តវិញ ហើយក៏បានបើកជែងរថយន្តមួយគ្រឿងផ្សេងទៀត ស្រាប់តែជ្រុលឡើងសួនច្បារបុកបង្គោលភ្លើងបាក់រាបដល់ដី ចំណែករថយន្តបានខ្ទាតឆ្លងទៅចិញ្ចើមផ្លូវម្ខាងរងការខូចខាតខ្ទេចមួយចំហៀងខាងស្តាំ និងបណ្តាលអោយមនុស្សម្នាក់រងរបួសធ្ងន់ ។
គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោងប្រមាណ៤និង៣០នាទីរសៀលថ្ងៃទី៧ខែកញ្ញា ឆ្នាំ ២០១៩ នៅតាមបណ្តោយផ្លូវជាតិលេខ៦ ក្នុងភូមិគៀនឃ្លាំង សង្កាត់ជ្រោយចង្វា ខណ្ឌជ្រោយចង្វារ។
រថយន្តប្រភេទ១បាំងកន្លះថ្មីសន្លាងមួយគ្រឿងខាងលើជិះគ្នា៤នាក់ ពណ៌ទឹកប្រាក់ មិនទាន់មានស្លាកលេខ ម្ចាស់រថយន្តមិនស្គាល់អត្តសញ្ញាណ ហើយក៏មិនដឹងថាធ្វើដំណើរមកពីខេត្តណាដែរ និងអ្នករួមដំណើរម្នាក់ដែលរងរបួសធ្ងន់ មិនស្គាល់អត្តសញ្ញាណនោះទេ រីឯអ្នកបើកបររថយន្តក៏មិនស្គាល់អត្តសញ្ញាណផងដែរ ។
តាមប្រភពពីសាក្សីនៅកន្លែងកើតហេតុបានអោយដឹងថា នៅមុនពេលកើតហេតុ គេឃើញមនុស្សចំនួន៤នាក់ជិះក្នុងរថយន្តប្រភេទ១បាំងកន្លះថ្មីសន្លាងមួយគ្រឿងខាងលើ បានធ្វើដំណើរតាមផ្លូវជាតិលេខ៦ ក្នុងទិសដៅពីត្បូងទៅជើងចេញពីរាជធានីភ្នំពេញ តែគេមិនដឹងថាទៅខេត្តណានោះទេ ។
តាមប្រភពដដែលបានបន្តថា នៅពេលរថយន្តខាងលើនោះធ្វើដំណើរមកដល់ចំណុចកើតហេតុក៏បានបើកជែងរថយន្តមួយគ្រឿង រួចក៏ជ្រុលឡើងសួនច្បារខណ្ឌចែកផ្លូវបុករះកូនឈើ និងបង្គោលភ្លើងបំភ្លឺផ្លូវមួយដើមបាក់រាបដល់ដី។
តាមប្រភពដដែលបានអោយដឹងទៀតថា នៅក្នុងគ្រោះថ្នាក់នោះ គឺអ្នកបើកបរបានជាន់ហ្វ្រាំងទាំងបង្ខំធ្វើអោយរថយន្តវិលបោកផ្ទប់នឹងបង្គោលភ្លើងចំហៀងខាងស្តាំបាក់រលើងទាំងគ្រឹះ ហើយរថយន្តខ្ទេចមួយចំហៀង បណ្តាលអោយអ្នកជិះរងរបួសបាក់ដៃម្នាក់ ហើយ រថយន្តក៏បានខ្ទាតទៅចិញ្ចើមផ្លូវខាងឆ្វេង ។ ភ្លាមៗនោះ អ្នកបើកបរ រួមទាំងអ្នកដំណើរក៏បានចុះពីលើរថយន្តហើយនាំគ្នាទៅមន្ទីរពេទ្យបាត់អស់។
តាមប្រភពពីនគរបាលមួលដ្ឋានបានអោយដឹងថា រថយន្តមួយគ្រឿងខាងលើនោះ ត្រូវបានម្ចាស់រួមទាំងមិត្តភក្តិធ្វើដំណើរមកពីខេត្តឡើងមកភ្នំពេញ ទើបតែទិញកាលពីព្រឹក ដោយសារមិនហ៊ានបើកក្នុងក្រុង ទើបម្ចាស់ក៏ជួលអ្នកបើកបរម្នាក់ឱ្យជួយបើកដើម្បីយករថយន្តត្រឡប់ទៅខេត្តវិញ ស្រាប់តែជួបគ្រោះថ្នាក់បុកបង្គោលភ្លើងខ្ទេចនិងមានអ្នករងរបួសតែម្តង ។
ក្រោយពេលកើតហេតុ រថយន្តខាងលើត្រូវបាននគរបាលចុះមកវាស់វែងនិងយកទៅកាន់ ការិយាល័យចរាចរណ៍ជើងគោកដើម្បីធ្វើការដោះស្រាយសងការខូចខាតទ្រព្យសម្បត្តិសាធារណៈ៕ (កែសម្រួលដោយ ៖ ធីតា)
ចែករំលែកព័តមាននេះ