រាជធានីភ្នំពេញ ៖ ក្នុងវិស័យមីក្រូហិរញ្ញវត្ថុកម្ពុជា នាពេលបច្ចុប្បន្ន ត្រូវបានមើលឃើញថានៅតែមានកំណើន បើទោះបីជាបញ្ហាប្រឈមមួយចំនួនក្ដី ជាក់ស្ដែងក្នុងដំណាច់ឆមាសទី១ឆ្នាំ ២០១៩នេះ បើតាមរបាយការណ៍របស់សមាគមមីក្រូហិរញ្ញវត្ថុកម្ពុជា បានបង្ហាញឥណទានបានកើនឡើងប្រមាណ…
រាជធានីភ្នំពេញ ៖ ក្នុងវិស័យមីក្រូហិរញ្ញវត្ថុកម្ពុជា នាពេលបច្ចុប្បន្ន ត្រូវបានមើលឃើញថានៅតែមានកំណើន បើទោះបីជាបញ្ហាប្រឈមមួយចំនួនក្ដី ជាក់ស្ដែងក្នុងដំណាច់ឆមាសទី១ឆ្នាំ ២០១៩នេះ បើតាមរបាយការណ៍របស់សមាគមមីក្រូហិរញ្ញវត្ថុកម្ពុជា បានបង្ហាញឥណទានបានកើនឡើងប្រមាណ ១៧ភាគរយ ខណៈប្រាក់បញ្ញើក៏បានកើនឡើងប្រមាណ២១ភាគរយផងដែរ ធៀបនឹងរយៈពេលដូចគ្នាកាលពីឆ្នាំ ២០១៨កន្លងទៅនេះ ។
លោក គា បូរាណ ប្រធានសមាគមមីក្រូហិរញ្ញវត្ថុកម្ពុជា បានមានប្រសាសន៍ថា វិស័យមីក្រូហិរញ្ញវត្ថុកម្ពុជា ត្រូវបានមើលឃើញថា ចាប់ផ្ដើមកំណើនឡើងវិញ ក្រោយពេលកម្ពុជាជួបវិបត្តិសេដ្ឋកិច្ច ដែលធ្វើឱ្យវិស័យជាច្រើនសំខាន់ៗជាប់គាំង តែយ៉ាងណាក៏ដោយក៏មិនមានបញ្ហាអ្វីធ្ងន់ធ្ងរដែរ ។
បច្ចុប្បន្នបើទោះបីជាវិស័យនេះមានបញ្ហាប្រឈមមួយចំនួនក្ដី តែវានៅតែមានកំណើនគួរឱ្យកត់សម្គាល់ដែរទាំងប្រាក់បញ្ញើ និងឥណទាន ។ លោកបន្តថា៖ «សម្រាប់ឥណទានរបស់មីក្រូហិរញ្ញវត្ថុ នៅតែផ្ដោតលើសហគ្រាសខ្នាតតូច និងមធ្យម និងវិស័យកសិកម្ម ដែលជួយដល់កសិករនៅបណ្ដាខេត្តនានាផងដែរ» ។ លោកបន្តទៀតថា គិតត្រឹមដំណាច់ឆមាសទី១ឆ្នាំ ២០១៩នេះ ក្នុងវិស័យមីក្រូហិរញ្ញវត្ថុកម្ពុជាទាំងមូល ឥណទានមានកំណើនប្រមាណ ១៧ភាគរយ រីឯបញ្ញើសន្សំវិញមានកំណើនរហូតដល់ ២១ភាគរយឯណោះបើធៀបនឹងឆមាសទី ១ឆ្នាំ ២០១៨កន្លងទៅ ។ ក្នុងដំណាច់ឆមាសទី ១ឆ្នាំ២០១៩នេះដែរ ផលបត្រឥណទានក្នុងវិស័យមីក្រូហិរញ្ញវត្ថុមានជាង ៦,៤ពាន់លានដុល្លារ រីឯប្រាក់បញ្ញើសន្សំពីអតិថិជនក៏មានជាង ៣,៤ពាន់លានដុល្លារអាមេរិក ក្នុងនោះអតិថិជនដែលប្រើប្រាស់ឥណទានរបស់មីក្រូហិរញ្ញវត្ថុកម្ពុជាទាំងមូលមានជាង២,១លាននាក់ ក្នុងនោះជាង ១លាននាក់ខ្ចីប្រាក់តិចជាង ៤លានរៀល ចំណែកអ្នកដាក់ប្រាក់បញ្ញើក្នុងប្រព័ន្ធមីក្រូហិរញ្ញវត្ថុមានប្រមាណ ២,៥លាននាក់ផងដែរ ។
លោកបានបន្ថែមថា វិស័យមីក្រូហិរញ្ញវត្ថុកម្ពុជា គឺមានសារសំខាន់ណាស់ ក្នុងការជួយដល់វិស័យសហគ្រាសខ្នាតតូច និងមធ្យម ហើយមិនមានមីក្រូហិរញ្ញវត្ថុនោះទេ វិស័យសហគ្រាសខ្នាតតូច និងមធ្យមអាចនឹងជួយបញ្ហាទុនក្នុងការបង្កើតអាជីវកម្មក៏ដូចជាពង្រីកអាជីវកកម្មផងដែរ ។ លោកថា៖ «ដោយសារតែយើងបានមើលឃើញថាវិស័យសហគ្រាសខ្នាតតូច និងមធ្យមកម្ពុជា មានសារសំខាន់សម្រាប់កំណើនសេដ្ឋកិច្ច ទើបយើងបានយកចិត្តទុកដាក់លើវិស័យនេះ ។ ក្នុងវិស័យសហគ្រាសខ្នាតតូច និងមធ្យមកម្ពុជាបច្ចុប្បន្ននេះ បានរួមចំណែកដល់កំណើនផលិតផលក្នុងស្រុកសរុបប្រមាណ ៥៨ភាគរយ នេះបើតាមរបាយការណ៍របស់ក្រសួងសេដ្ឋកិច្ចនិងហិរញ្ញវត្ថុក្នុងឆ្នាំ ២០១៨ »។
លោក រ័ត្ន សុវណ្ណនរៈ អគ្គនាយកត្រួតពិនិត្យធនាគារជាតិនៃកម្ពុជា បានមានប្រសាសន៍ថា ទោះបីជាយ៉ាងណា គ្រឹះស្ថានមីក្រូហិរញ្ញវត្ថុកម្ពុជា នៅតែជួបបញ្ហាប្រឈមដដែល បើទោះជាវិស័យនេះមានការរីកចម្រើនក៏ដោយ ។ លោកបន្តថា៖ «មានការផ្សព្វផ្សាយអាក្រក់មកលើវិស័យមីក្រូហិរញ្ញវត្ថុកម្ពុជា ដែលមិនឆ្លុះបញ្ចាំងពីស្ថានភាពពិតរបស់កម្ពុជា ជាក់ស្ដែងអង្គការសង្គមស៊ីវិលនានា បាននិយាយលើសពីអ្វីដែលពិត ឱ្យគេយល់ច្រលំលើវិស័យមីក្រូហិរញ្ញវត្ថុកម្ពុជា» ។
លោកបន្ថែមថា បណ្ដាអង្គការទាំងនោះ គួរតែសិក្សាឱ្យបានច្បាស់ពីស្ថានភាពពិត មុននឹងចេញរបាយការណ៍របស់ខ្លួន ដើម្បីកុំឱ្យមានការយល់ច្រលំ និងធ្វើឱ្យអ្នកខាងក្រៅមើលមកកម្ពុជា អាក្រក់ ។
គួរបញ្ជាក់ថា តាមរបាយការណ៍របស់ធនាគារជាតិនៃកម្ពុជា បានបង្ហាញថា គិតមកដល់ពេលនេះក្នុងវិស័យហិរញ្ញវត្ថុមានធនាគារពាណិជ្ជចំនួន ៤៣, ធនាគារឯកទេសមានចំនួន ១៤, គ្រឹះស្ថានមីក្រូហិរញ្ញវត្ថុមានអាជ្ញាបណ្ណទទួលប្រាក់បញ្ញើមានចំនួន ៧, គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើមានរហូតដល់ ៧៤, គ្រឹះស្ថានឥណទានជនបទមាន ២៧៣ និងក្រុមហ៊ុនភតិសន្យាមានចំនួន ១៥ ៕ កែសម្រួលដោយ ៖ សុឃាក់
ចែករំលែកព័តមាននេះ