រាជធានីភ្នំពេញ ៖ កំប៉ុងពណ៌ត្រេអ៊ីដែលគេសង្ស័យថាជាគ្រាប់បែក ត្រូវបានប្រទះឃើញ ហើយក៏មានសេចក្តីរាយការណ៍ទៅសមត្ថកិច្ច និងមន្ត្រីស៊ីម៉ាក់ចុះទៅយកកំទេចចោល។ ទោះបីជាយ៉ាងណាគេពុំដឹងថា កំប៉ុងនេះជាគ្រាប់បែក មែន ឬក៏យ៉ាងណានោះទេ តែបើតាមមន្ត្រីស៊ីម៉ាក់ដែលទៅធ្វើការពិនិត្យជាក់ស្តែងបានបង្ហើបឱ្យដឹងថា កំប៉ុងនោះអាចជាគ្រាប់បែកផ្សែង។ នេះបើតាមភិនភាគនៃកំប៉ុងដែលធ្លាប់បានប្រទះឃើញកន្លងមក។ ថ្វីបើមានការអះអាងបែបនេះក្តីក៏មន្ត្រីស៊ីម៉ាក់មិនទាន់ច្បាស់ជាគ្រាប់បែកផ្សែង ឬជាអ្វីនៅឡើយទេ ដោយរង់ចាំយកទៅពិនិត្យសិនមុនពេលបំផ្លាញរូបរាងរបស់វា។
ការភ្ញាក់ផ្អើលពីការប្រទះឃើញកំប៉ុងគួរឱ្យសង្ស័យនេះបានកើតឡើងកាលពីវេលាម៉ោង៦ និង៣០នាទីល្ងាច ថ្ងៃទី១៤ ខែធ្នូ នៅតាមផ្លូវជាតិលេខ៦A មុខអតីតចំណតរថយន្តជ្រោយចង្វា ស្ថិតក្នុងភូមិកៀនឃ្លាំង សង្កាត់ជ្រោយចង្វា ខណ្ឌឫស្សីកែវ។ បន្ទាប់ពីមានការភ្ញាក់ផ្អើល គេឃើញលោកឧត្តមសេនីយ៍ហ៊ុន ម៉ាណែត និងលោកឃ្លាំង ហួត អភិបាលខណ្ឌឫស្សីកែវចុះទៅដល់កន្លែងកើតហេតុផងដែរ។ កំប៉ុងដែលគេសង្ស័យថា ជាគ្រាប់បែកនេះមានទំហំប៉ុនកជើង និងប្រវែងប្រមាណ២តឹក ហើយត្រូវបានគេយកទៅទុកក្បែរចិញ្ចើមផ្លូវរង់ចាំមន្ត្រីជំនាញចុះទៅយកចេញ។ សូមបញ្ជាក់ថា កំប៉ុងនេះដំបូងត្រូវបានគេកាន់ក្រឡុកលេង តែក្រោយមកដោយមានការសង្ស័យក៏រាយការណ៍ប្រាប់សមត្ថកិច្ច។
តាមបុរសឈ្មោះឃុត សារិន អាយុ៣០ឆ្នាំ មានទីលំនៅក្នុងភូមិកើតហេតុដែលជាអ្នកប្រទះឃើញកំប៉ុងនោះបានឱ្យដឹងថា កាលពីវេលាម៉ោង៤ទៀបភ្លឺ ថ្ងៃទី១៣ ខែធ្នូ ពេលគាត់បើករថយន្តចេញពីផ្ទះបានប្រមាណ៧០ម៉ែត្រក៏ប្រទះឃើញកំប៉ុងសង្ស័យនេះនៅតាមដងផ្លូវជាតិលេខ៦ ដែលគេកិនបង្ហាប់ចាក់ដីពង្រីកផ្លូវ។ ពេលប្រទះឃើញគាត់បានឈប់រថយន្តរើសយកដោយនៅក្បែរនោះមានធ្យូង៣ទៅ៤ដុំ និងមានដែក២កំណាត់ រួចគាត់បានយកកំប៉ុង ធ្យូង និងដែកដាក់ចូលក្នុងថង់ក្រហមដែលនៅក្បែរនោះ ហើយដាក់ក្នុងរថយន្តយកទៅកប់ក្នុងដីខ្សាច់ ព្រោះស្មានថាកំណប់។ បុរសរូបនេះបន្តទៀតថា លុះនៅវេលាម៉ោង៦ និង៣០នាទី ព្រឹក ថ្ងៃទី១៤ ធ្នូ គាត់បានទៅកាយយកកំប៉ុងនោះទៅផ្ទះ ហើយក្រឡុកលេង និងបង្ហាញអ្នកមកផឹកកាហ្វេដែលជាទាហាន។ ក្រោយមកក៏រាយការណ៍ប្រាប់សមត្ថកិច្ចចុះទៅពិនិត្យ ហើយណែនាំឱ្យយកកំប៉ុងនោះទៅទុកក្បែរចិញ្ចើមផ្លូវដើម្បីរាយការណ៍ដល់មន្ត្រីសីុម៉ាក់ចុះទៅពិនិត្យ។ តាមព័ត៌មានបន្តទៀតថា នៅយប់នោះបង្កឱ្យមានការភ្ញាក់ផ្អើលយ៉ាងខ្លាំង ដោយមន្ត្រីជំនាញស៊ីម៉ាក់បានធ្វើការពិនិត្យកំប៉ុងនោះយ៉ាងល្អិតល្អន់ និងយកដាក់ក្នុងរថយន្តដែលមានបាវខ្សាច់យ៉ាងប្រុងប្រយ័ត្នដើម្បីយកទៅស្រាវជ្រាវបន្ត ៕
ចែករំលែកព័តមាននេះ