រាជធានីភ្នំពេញ ៖ យោងតាមរបាយការណ៍របស់រដ្ឋបាលខណ្ឌពោធិ៍សែនជ័យ បានឱ្យដឹងថា ក្រោមការដឹកនាំបញ្ជាផ្ទាល់របស់លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ នាថ្ងៃទី២ ខែមិថុនា ឆ្នាំ២០២៦ គណៈបញ្ជាការឯកភាពរដ្ឋបាលខណ្ឌពោធិ៍សែនជ័យ ដឹកនាំដោយលោក សក់ ច័ន្ទកញ្ញារិទ្ធ អភិបាល នៃគណៈអភិបាលខណ្ឌ និងជាប្រធានគណៈបញ្ជាការឯកភាពខណ្ឌ បានចុះត្រួតពិនិត្យទីតាំងសណ្ឋាគារ នាមករណ៍ ហ្សុង ឌីង រេដ ហូថេល (អគារ CITY IDEAL) ផ្លូវបេតុង (បុរី KC) ក្រុមទី១១ ភូមិចំការឪឡឹក២ សង្កាត់កាកាបទី២ ។
របាយការណ៍ បានឱ្យដឹងទៀតថា ក្រុមការងារចុះដល់ទីតាំងជាក់ស្តែង ពិនិត្យឃើញថា សណ្ឋាគារមានចំនួន ១អគារ មានកម្ពស់ ១៧ជាន់ស្មើនឹង ៣៧៨បន្ទប់ បានបើកទ្វារបន្ទប់ចំនួន ៣៦២បន្ទប់ (បន្ទប់ទំនេរ ៣៤៧បន្ទប់) និងមិនបើកទ្វារបន្ទប់ចំនួន ១៦បន្ទប់ (មិនមានសោរចូល) មានអ្នកស្នាក់នៅចំនួន ១៥បន្ទប់ មនុស្ស ២៥នាក់ ស្រី ១២នាក់ មាន ០៣សញ្ជាតិ រួមមាន ៖
-ជនជាតិ ខ្មែរ ចំនួន ៨នាក់ ស្រី ៨នាក់
-ជនជាតិ ចិន ចំនួន ១៦នាក់ ស្រី ៣នាក់
-ជនជាតិ វៀតណាម ចំនួន ១នាក់ ស្រី ១នាក់ ។
របាយការណ៍ បានបញ្ជាក់ថា ក្រោយបញ្ចប់ការត្រួតពិនិត្យគណៈបញ្ជាការឯកភាពខណ្ឌ រកឃើញជនបរទេសចំនួន ០៣នាក់ ភេទប្រុស ជនជាតិចិន (ស្នាក់នៅបន្ទប់លេខ B៥០៩ ចំនួន ០៣នាក់) ករណីស្នាក់នៅខុសច្បាប់ (ពុំមានលិខិតឆ្លងដែន)។ គណៈបញ្ជាការឯកភាពខណ្ឌ បានសម្រេចប្រគល់ជនសង្ស័យចំនួន ០៣នាក់ ខាងលើទៅឱ្យអធិការដ្ឋាននគរបាលខណ្ឌពោធិ៍សែនជ័យ ដើម្បីអនុវត្តនីតិវិធី ៕
ចែករំលែកព័តមាននេះ