រាជធានីភ្នំពេញ ៖ នគរបាលមន្ទីរប្រឆាំងគ្រឿងញៀន ១ក្រុម បានចាប់បុរសម្នាក់ វាយខ្នោះកាលពីថ្ងៃទី០១ ខែមិថុនា ឆ្នាំ២០២៦ នៅតាមផ្លូវបេតុង ត្រង់ចំណុចជិតផ្សារអង្គ ស្ថិតនៅក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ដោយសារតែនៅក្នុងពេលធ្វើប្រតិបត្តិការនោះ សមត្ថកិច្ចខាងលើសុទ្ធតែស្លៀកពាក់ស៊ីវិលស្ទើរ តែទាំងអស់ មានតែម្នាក់ប៉ុណ្ណោះ ដែលស្លៀកពាក់ឯកសណ្ឋានជានគរបាល និងជិះម៉ូតូច្រើនគ្រឿងផងនោះ។ បានធ្វើឲ្យមហាជនជាច្រើន បានសម្ដែងការងឿងឆ្ងល់ និងភាន់ច្រឡំថា ជាជនស៊ីវិលធម្មតា មិនមែនជាសមត្ថកិច្ច ហើយក៏មានអ្នកថតរូបភាពវីដេអូ ពីសកម្មភាពនោះថែមទៀតផង ព្រោះតែពួកគាត់មិនបានដឹងថា ជានគរបាលទេ និងមានការភ័យខ្លាចមានឧក្រិដ្ឋជនបន្លំខ្លួនជាសមត្ថកិច្ចចាប់មនុស្សផ្ដេសផ្ដាស់ ។
ខណៈនោះ មហាជនក៏បានសំណូមពរដល់លោកស្នងការនគរបាលរាជធានីភ្នំពេញ ក៏ដូចជាលោកអធិការខណ្ឌពោធិ៍សែនជ័យ ជួយធ្វើការស្រាវជ្រាវលើករណីនេះ។ ពួកគាត់ចង់ដឹងពីសមាសភាពជនស៊ីវិល ចាប់មនុស្សទាំងថ្ងៃបែបនេះថា តើជានរណា ? ហើយបុរស ដែលត្រូវគេចាប់ខ្លួននោះជានរណាដែរ និងមានកំហុសអ្វី ទើបត្រូវគេចាប់ខ្លួនបែបនេះ ?
ដោយឡែកបុរស ដែលត្រូវចាប់ខ្លួននោះទៀតសោត បានខំប្រឹងរើបម្រាស់ ក្រាញននៀល និងស្រែកឲ្យគេជួយ ព្រមទាំងស្រែកថា «ខ្ញុំអត់ទៅទេៗ » ជាប់មិនដាច់ពីមាត់ថែមទៀតផង ប៉ុន្តែខណៈនោះ គ្មាននរណាហ៊ានចូលទៅជួយទេ ហើយទីបំផុត នគរបាលក៏ចាប់យកទៅបាត់ បន្ទាប់មក ក៏មានការបង្ហោះនូវរូបភាពវីដេអូ សកម្មភាពប្រតិបត្តិការនោះ នៅលើទំព័រសារព័ត៌មាន និងបណ្ដាញសង្គមហ្វេសប៊ុកមួយចំនួន ។
ក្រោយពីមានការភាន់ច្រឡំពីមហាជនបែបនេះ នៅថ្ងៃទី២ ខែមិថុនា ឆ្នាំ២០២៦ ក្រុមការងារប្រតិកម្មរហ័ស នៃមន្ទីរប្រឆាំងបទល្មើសគ្រឿងញៀនក្រសួងមហាផ្ទៃ បានចេញសេចក្ដីបំភ្លឺ ពាក់ព័ន្ធប្រតិបត្តិការចាប់ខ្លួនជនសង្ស័យ កាលពីវេលាល្ងាចថ្ងៃទី១ ខែមិថុនា ឆ្នាំ២០២៦ នៅតាមផ្លូវបេតុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ជូនមហាជន និងអ្នកសារព័ត៌មានព្រមទាំងអ្នកហ្វេសប៊ុកនានា បានជ្រាប និងឈប់ឲ្យមានការភាន់ច្រឡំ តទៅទៀត ។
នៅក្នុងសេចក្ដីបំភ្លឺនោះ បានបញ្ជាក់ដូច្នេះថា ៖ កាលពីថ្ងៃទី១ ខែមិថុនា ឆ្នាំ២០២៦ វេលាម៉ោង១៧៖០៥នាទី ល្ងាចមន្ត្រីជំនាញមន្ទីរប្រឆាំងបទល្មើសគ្រឿងញៀន ដោយមានការរាយការណ៍ពីប្រជាពលរដ្ឋល្អ ដែលរស់នៅទីតាំងកើតហេតុមកថា មានករណីប្រើប្រាស់គ្រឿងញៀនដោយខុសច្បាប់ ពេលនោះកម្លាំងសមត្ថកិច្ចយើង ក៏បានទៅដល់ទីតាំង និងឃ្លាំមើល ក៏បានឃើញសកម្មភាពដូច ដែលប្រជាពលរដ្ឋរាយការណ៍ពិតមែន ហើយសមត្ថកិច្ចបានបើកប្រតិបត្តិការបង្ក្រាបជាក់ស្តែង ឃាត់ខ្លួនជនសង្ស័យម្នាក់ឈ្មោះ ស្រេន បញ្ញា ភេទប្រុស និងម្នាក់ទៀតបានរត់គេចខ្លួន ។
ពេលនោះ កម្លាំងសមត្ថកិច្ចដេញប្រផាប់ចាប់ប្រភីង ក៏ធ្វើឱ្យកម្លាំងយើងម្នាក់រងរបួសដៃ ដេរប្រាំមួយថ្នេរ និងរបួសចុងចិញ្ចើមស្តាំ ដោយសារជនសង្ស័យមានកាំបិតតដៃ ជាមួយកម្លាំងសមត្ថកិច្ច ។ ក្រោយមកជនសង្ស័យក៏រត់គេចខ្លួនបាត់បន្ទាប់មក កម្លាំងសមត្ថកិច្ច ក៏បាននាំខ្លួនជនសង្ស័យម្នាក់ឈ្មោះ ស្រេន បញ្ញា មកមន្ទីរប្រឆាំងបទល្មើសគ្រឿងញៀន ដើម្បីបន្តនីតិវិធី ៕
ចែករំលែកព័តមាននេះ