លែងគិតធ្លាប់មានឈ្មោះជាតារា! ដួង ម៉ានិច ដើរពីក្រោយព្រះសង្ឃបិណ្ឌបាតពេញផ្សារ
- ភ្នំពេញ
រាជធានីភ្នំពេញ ៖ មហាជន ជាពិសេស បណ្តាអ្នកលេងបណ្តាញសង្គមបានសម្តែងការភ្ញាក់ផ្អើលយ៉ាងខ្លាំង បន្ទាប់ពីបានឃើញវីដេអូរបស់អតីតតារាសម្តែងដែលចូលចិត្តសម្ញែងភាពសិចស៊ី អ្នកនាង ដួង ម៉ានិច ដើរបិណ្ឌបាតជាមួយព្រះសង្ឃនៅក្នុងផ្សារមួយកន្លែង លែងគិតខ្លួនធ្លាប់មានឈ្មោះជាតារាល្បីមួយរូប ។
កាលពីព្រឹកថ្ងៃទី១ ខែមិថុនា ឆ្នាំ២០២៦ អតីតតារាសម្តែងនាង ដួង ម៉ានិច បានបញ្ចេញវីដេអូបង្ហោះលើបណ្តាញសង្គម ដោយក្នុងសកម្មភាពនោះ គេឃើញរូបនាងបានស្លៀកបំពាក់ពណ៌.ស កោរសក់ និងដោះស្បែកជើង ដើរតាមពីក្រោយព្រះសង្ឃចំនួន៤អង្គ ដើរបិណ្ឌបាតនៅក្នុងបរិវេណផ្សារមួយកន្លែង ។
តាមរយៈវីដេអូនោះ គេក៏ឃើញ ដួង ម៉ានិច បានទទួលបច្ច័យជាថវិកាពីសំណាក់មនុស្សម្នានានានៅក្នុងផ្សារក្នុងពេលដែលនាងក៏បានស្នើសុំឲ្យលោកយាយ លោកតាទៅធ្វើបុណ្យនៅវត្តផងដែរ ។
យ៉ាងណា រូបភាពរបស់អ្នកនាង ដួង ម៉ានិច នាពេលនេះ បានក្លាយជាទៅចំណាប់អារម្មណ៍សម្រាប់មហាជន ក្នុងពេលដែលរូបនាងដែលធ្លាប់តែជាតារាមួយដួងដែលតែងខ្លួនយ៉ាងសិចស៊ី ស្រស់ស្អាត បែរជាមកដើរបិណ្ឌបាតជាមួយព្រះសង្ឃ លះបង់ក្នុងផ្លូវព្រះធម៌ទៅវិញ ។
ជាការកត់សម្គាល់ អតីតារាសម្តែងដែលចូលចិត្តសម្ញែងភាពសិចស៊ី អ្នកនាង ដួង ម៉ានិច ត្រូវបានគេមើលឃើញថា រហូតមកទល់នាពេលនេះ នាងនៅតែបន្តស្ថិតក្នុងការបួសជាដូនជី និងប្រតិបត្តិស្តាប់ធម៌យ៉ាងខ្ជាប់ខ្ជួន ដោយមិននឹកនាមកដល់អាជីពសិល្បៈជាថ្មីឡើងវិញនោះឡើយ ។
ចាប់តាំងពីសម្រេចចិត្តមានគ្រួសារមក ដួង ម៉ានិច បានក្លាយជាមនុស្សមួយថ្មី ស្ទើរទាំងស្រុង ដោយនាងបានងាកមករស់នៅតាមបែបស្រែចម្ការជាមួយស្វាមី ចាកឆ្ងាយពីទីក្រុង និងអាជីពសិល្បៈរបស់ខ្លួនដែលធ្លាប់តែស្រស់បំណងចោលទាំងស្រុង ។
អ្វីដែលជាការចាប់អារម្មណ៍ទៀតនោះ អតីតតារាស្រីរូបនេះក៏បានលះបង់នូវរូបសម្រស់របស់ខ្លួន ដោយបានកោរសក់បួសជាដូនជី និងការប្រតិបត្តិធម៌យ៉ាងជាប់លាប់ ខណៈពេលដែលស្វាមីរបស់នាងក៏បានបួសជាព្រះសង្ឃផងដែរ ។
ជារឿយៗ នៅលើបណ្តាញសង្គម គេតែងបានឃើញ ដួង ម៉ានិច បានបង្ហោះរូបភាពដោយគ្រងសម្លៀកបំពាក់ជាដូនជី កោរសក់ ហើយចូលរួមស្តាប់ធម៌ជាបន្តបន្ទាប់ ក្នុងនោះ រាល់ពាក្យសម្តីដែលនាងតែងតែសសេរបង្ហោះនោះ ភាគច្រើនគឺជាធម៌អប់រំចិត្ត ។
នៅរាល់ពេលដែល ដួង ម៉ានិច បង្ហោះរូបភាពបួសជាដូនជីម្តងៗនោះ គេក៏នៅឃើញមានមហាជន ជាពិសេស បណ្តាអ្នកគាំទ្ររូបនាងមួយចំនួន នៅតែសម្តែងក្តីសោកស្តាយនូវរូបសម្រស់របស់នាងពីមុន និងនឹកវត្តមានកាលនៅសម្តែងរបស់នាងផងដែរ ។
យ៉ាងណា ធ្លាប់ជាតារាសិចស៊ី និងមានទេពកោសល្យសម្តែងដ៏ល្អ តែបែរជាងាកមកកោរសក់បួសជាដូនជី បោះបង់អាជីពសិល្បៈចោលទាំងស្រុង នាពេលនេះ គឺមិនមានជាអ្វីដែលអ្នកគាំទ្រភាគច្រើនរបស់ ដួង ម៉ានិច ចង់ឃើញនោះឡើយ ៕
ចែករំលែកព័តមាននេះ