សហរដ្ឋអាមេរិក ៖ ការនាំចូលប្រេងឆៅរបស់អាស៊ីពីសហរដ្ឋអាមេរិកបានកើនឡើងយ៉ាងគំហុក ប៉ុន្តែបរិមាណនេះ នៅតែមិនគ្រប់គ្រាន់ ដើម្បីទូទាត់ចំពោះការខាតបង់លើវិបត្តិនៃការផ្គត់ផ្គង់ដែលបណ្តាលមកពីការបិទច្រកសមុទ្រហ័រមូស (Hormuz) នោះឡើយ។ នេះបើតាមប្រភពពី Reuters ចេញផ្សាយនៅថ្ងៃទី២ ខែមិថុនា ឆ្នាំ២០២៦។
យោងតាមទិន្នន័យដែលចងក្រងដោយ Kpler ដែលជាក្រុមហ៊ុនវិភាគ និងតាមដានទីផ្សារថាមពលសកលបានបង្ហាញថា ប្រេងឆៅរបស់សហរដ្ឋអាមេរិកនាំចេញទៅកាន់ទ្វីបអាស៊ីបានកើនឡើងដល់ ៦៣,៥៦ លានបារ៉ែល (ធុង) ក្នុងខែឧសភាកន្លងទៅថ្មីៗនេះ ដែលជាបរិមាណខ្ពស់បំផុតប្រចាំខែ។ ប៉ុន្តែបើគិតជាមធ្យមត្រឹមតែ ២,០៥ លានបារ៉ែលក្នុង១ថ្ងៃនោះ បរិមាណនេះ នៅតិចជាងកម្រិត ២,០៧ លានបារ៉ែលក្នុង១ថ្ងៃក្នុងខែមិថុនា កាលពីឆ្នាំ ២០២៣។
ទោះយ៉ាងនេះក្តី ប្រេងឆៅសហរដ្ឋអាមេរិកកាន់តែច្រើនកំពុងដឹកជញ្ជូនទៅកាន់ទ្វីបអាស៊ី ដោយទិន្នន័យពី Kpler បានតាមដានឃើញថា ការនាំចេញនឹងកើនដល់ ២,៣២ លានបារ៉ែលក្នុង១ថ្ងៃក្នុងខែមិថុនា និង ៣,០៧ លានបារ៉ែលក្នុង១ថ្ងៃក្នុងខែកក្កដា។ បរិមាណនេះ គឺច្រើនជាង២ដងនៃបរិមាណប្រេងឆៅអាមេរិកជាមធ្យមចំនួន ១,៣៧ លានបារ៉ែលក្នុង១ថ្ងៃ ដែលទ្វីបអាស៊ីបាននាំចូលក្នុងរយៈពេល ៣ ខែរហូតដល់ដំណាច់ខែកុម្ភៈកន្លងទៅ។
សហរដ្ឋអាមេរិក និងអ៊ីស្រាអែល បានវាយប្រហារលើប្រទេសអ៊ីរ៉ង់ កាលពីថ្ងៃទី២៨ ខែកុម្ភៈ ឆ្នាំ២០២៦ ជាការសងសឹកអ៊ីរ៉ង់បានបិទច្រកសមុទ្រហរមូស (Hormuz) ដែលជាច្រកឆ្លងកាត់ប្រេងឆៅ និងផលិតផលប្រេងចម្រាញ់សកលប្រហែល ២០% មុនពេលជម្លោះចាប់ផ្តើម។ បើទោះជាប្រទេសនាំចេញប្រេងមួយចំនួននៅមជ្ឈិមបូព៌ា ដូចជា អារ៉ាប៊ីសាអូឌីត និងអេមីរ៉ាតអារ៉ាប់រួម បានព្យាយាមបង្វែរផ្លូវនាំចេញប្រេងមួយចំនួនទៅកាន់កំពង់ផែនៅក្រៅច្រកសមុទ្រហ័រមូសក៏ដោយ ក៏ការផ្គត់ផ្គង់ប្រេងយ៉ាងហោចណាស់ ១០ លានបារ៉ែលក្នុង១ថ្ងៃ បានបាត់បង់ពីទីផ្សារ ដោយសារជម្លោះអ៊ីរ៉ង់នៅតែបន្តអូសបន្លាយពេល។
ប្រេងឆៅប្រហែល ១,២ លានបារ៉ែលក្នុង១ថ្ងៃ បានដឹកជញ្ជូនមកដល់តំបន់អាស៊ីក្នុងខែឧសភា តាមរយៈច្រកហ័រមូស ដោយសារកប៉ាល់ខ្លះទទួលបានការអនុញ្ញាតពីអ៊ីរ៉ង់ក្នុងការឆ្លងកាត់ ប៉ុន្តែចំនួននេះបានធ្លាក់ចុះខ្លាំង បើធៀបនឹងជាមធ្យម ១៣,៥៤ លានបារ៉ែលក្នុង១ថ្ងៃ ក្នុងរយៈពេល៣ខែ គិតត្រឹមចុងខែកុម្ភៈកន្លងទៅ។ ទំហំនៃការបាត់បង់ការដឹកជញ្ជូនតាមច្រកសមុទ្រនេះ មានចំនួនច្រើនលើសលប់ជាងបរិមាណបន្ថែមដែលអាស៊ីទទួលបានពីសហរដ្ឋអាមេរិក ក៏ដូចជាពីប្រទេសនាំចេញផ្សេងទៀតនៅទ្វីបអាមេរិក និងអាហ្វ្រិក។
យោងតាមទិន្នន័យពី Kpler ការដឹកជញ្ជូនប្រេងឆៅតាមសមុទ្រមកដល់អាស៊ី នៅក្នុងខែឧសភា ចំនួន ១៩,៤៧ លានបារ៉ែលក្នុង១ថ្ងៃ ពោលកើនឡើងពី ១៨,៧ លានបារ៉ែលក្នុង១ថ្ងៃក្នុងខែមេសា ដែលជាកម្រិតទាបបំផុតក្នុងរយៈពេលជាង១០ឆ្នាំ។ សូម្បីតែការមកដល់ក្នុងកម្រិតខ្ពស់ជាងមុនក្នុងខែឧសភាកន្លងទៅថ្មីៗនេះ ក៏នៅតែធ្លាក់ចុះ ២២% ដែរ បើធៀបនឹងជាមធ្យម ២៤,៨២ លានបារ៉ែលក្នុង១ថ្ងៃ សម្រាប់រយៈពេល៣ខែ គិតត្រឹមចុងខែកុម្ភៈកន្លងទៅ។ ការបាត់បង់ការផ្គត់ផ្គង់អស់ជាង ៥ លានបារ៉ែលក្នុង១ថ្ងៃនេះហើយ ដែលនៅទីបំផុតនឹងនាំទៅរកការសម្រេចចិត្តដ៏លំបាកសម្រាប់បណ្តារោងចក្រចម្រាញ់ប្រេងនៅអាស៊ី៕
ចែករំលែកព័តមាននេះ