ទីក្រុងវ៉ាស៊ីនតោន៖ អាមេរិកកំពុងពិគ្រោះគ្នាទៅលើបញ្ហាថាតើត្រូវដាក់ពង្រាយអាវុធនុយក្លេអ៊ែរបន្ថែមទៀតនៅក្នុងរដ្ឋជាសមាជិកអង្គការណាតូដែរឬទេ។ នេះបើយោងតាមការចុះផ្សាយរបស់សារព័ត៌មានហ្វាយណាន់សលថាមស៍ (Financial Times)។ មន្ត្រីរដ្ឋាភិបាលអាមេរិកបានឱ្យតម្រុយថាខ្លួនបើកទូលាយសម្រាប់គម្រោងដាក់ពង្រាយអាវុធនេះនៅលើរដ្ឋជាសមាជិកលើសពី៦ប្រទេសដែលបានដាក់ពង្រាយអាវុធនេះរួចហើយ និងដែលមានមូលដ្ឋានសម្រាប់ចុះចតនៃយន្តហោះទម្លាក់គ្រាប់បែកខ្នាតយក្សដែលមានសមត្ថភាពដឹកជញ្ជូនគ្រាប់បែកនុយក្លេអ៊ែរ។ នេះបើយោងតាមហ្វាយណាន់សលថាមស៍ដែលដកស្រង់ប្រភពចំនួនបីនាក់។
តាមរយៈវិធានការនេះ ប្រទេសដទៃទៀតនឹងអនុញ្ញាតឱ្យអាមេរិកដាក់មូលដ្ឋានសម្រាប់យន្តហោះចុះចត និងដែលអាចពាំនាំទៅជាមួយនូវអាវុធនុយក្លេអ៊ែរ។ ប៉ុន្តែអាមេរិកក៏និយាយដោយប្រយ័ត្នប្រយែងផងដែរថាកិច្ចព្រមព្រៀងណាមួយដើម្បីពង្រីកការដាក់ពង្រាយអាវុធនុយក្លេអ៊ែរនៅប្រទេសដទៃទៀតនោះមិនទាន់ចាំបាច់ខ្លាំងពេកទេ។ បណ្ដារដ្ឋជាសមាជិកអង្គការណាតូនៅតំបន់ស្លាបខាងកើតដូចជាប៉ូឡូញ និងរដ្ឋនៅតំបន់បាល់ទិចជាដើមកំពុងចាប់អារម្មណ៍ចង់ឱ្យអាមេរិកដាក់ពង្រាយមូលដ្ឋាននៅលើទឹកដីរបស់ខ្លួន។
ហ្វាយណាន់សលថាម៍ផ្សាយថាពួកគេកំពុងពិភាក្សាគ្នានៅក្នុងចំណោមអង្គការណាតូ។ ប្រធានរៀបចំគោលនយោបាយរបស់មន្ទីរបញ្ចកោណ លោកអែលប្រ៊ីច ខូលប៊ី (Elbridge Colby) ធ្លាប់និយាយកាលពីមុននេះថាអាមេរិកនឹងបន្តប្រើប្រាស់អាវុធនុយក្លេអ៊ែរដើម្បីការពាររដ្ឋជាសមាជិកអង្គការណាតូ។ លោកដូណាល់ត្រាំ និងជំនួយការរបស់លោករិះគន់ក្រុមសម្ព័ន្ធមិត្តនៅទ្វីបអឺរ៉ុបថាពួកគេមិនសូវហ៊ានចំណាយថវិកាឱ្យបានច្រើនគ្រប់គ្រាន់នៅក្នុងវិស័យការពារជាតិទេ ហើយពួកគេផ្ទុកផ្ដាក់តែលើអាមេរិកម្នាក់ឯងជាអ្នករ៉ាប់រងថ្លៃចំណាយ៕ ប្រភព៖ Arab News
ចែករំលែកព័តមាននេះ