ទីក្រុងកៀវ៖ រុស្ស៊ីវាយប្រហារអ៊ុយក្រែនដោយប្រើប្រាស់មីស៊ីល និងដ្រូនកាលពីយប់មិញបណ្ដាលឱ្យស្លាប់មនុស្សយ៉ាងតិច១១នាក់ និងរបួសរាប់សិបនាក់។ នៅរដ្ឋធានីកៀវ មនុស្ស៤នាក់បានស្លាប់ និង៥៨នាក់រងរបួស។ នៅក្នុងចំណោមនោះក៏មានកុមារ៣នាក់ផងដែរ។ នេះបើយោងទីភ្នាក់ងារសង្គ្រោះរបស់អ៊ុយក្រែន។ អគារស្នាក់នៅរបស់ប្រជាជន និងហេដ្ឋារចនាសម្ព័ន្ធស៊ីវិលដទៃទៀតរងការខូចខាតនៅក្នុងសង្កាត់ចំនួន៨នៃទីក្រុងកៀវ។ មានសេចក្ដីរាយការណ៍ថានៅទីកន្លែងដទៃទៀតនៃប្រទេសអ៊ុយក្រែនក៏រងការវាយប្រហារផងដែរ។
នៅតំបន់ឌីនីប្រូប៉េត្រូសភាគកណ្ដាល មនុស្សយ៉ាងតិច៦នាក់ស្លាប់ និង៣៦នាក់រងរបួសបន្ទាប់ពីរុស្ស៊ីវាយប្រហារទីក្រុងឌីនីប្រូ។ នេះបើយោងតាមភ្នាក់ងារជួយសង្គ្រោះ។ នៅពេលក្រុមអ្នកសង្គ្រោះទៅដល់កន្លែងវាយប្រហារនោះ រុស្ស៊ីវាយប្រហារបន្ថែមទៀតបណ្ដាលឱ្យស្លាប់អ្នកសង្គ្រោះម្នាក់។ អគារកម្ពស់២ជាន់មួយខ្នង និងផ្នែកខ្លះនៃអគារអាផាតមឹនកម្ពស់៤ជាន់ក៏ត្រូវរងការខូចខាតផងដែរ។ អ្នកខ្លះជាប់ផុងនៅក្នុងអគារទាំងនោះដែលមានសុទ្ធតែគំនរបាក់បែកនៃបេតុង។
ការផ្ទុះនោះបញ្ចេញសំឡេងខ្ទរខ្ទាសឹងតែពេញមួយរាត្រី និងឈានចូលដល់ព្រឹកថ្ងៃអង្គារនេះទៀត។ រដ្ឋធានីកៀវទំនងជារងការវាយប្រហារជាច្រើនថ្ងៃទៀតបន្ទាប់ពីប្រធានាធិបតីអ៊ុយក្រែន លោកហ្សេឡិនស្គី ព្រមានថារុស្ស៊ីត្រៀមបើកយុទ្ធនាការវាយប្រហារជាថ្មី។ ដូច្នេះ លោកជំរុញឱ្យប្រជាជនរក្សាការប្រុងប្រយ័ត្នខ្ពស់ និងស្វះស្វែងរកទីជម្រកឱ្យហើយនៅអំឡុងពេលឮសំឡេងស៊ីរ៉ែនប្រកាសអាសន្ន។
នៅសង្កាត់ប៉ូលឌីលស្គីយី (Podilskyi) អគារកម្ពស់៩ជាន់មួយកន្លែងរងការខូចខាតនៅជាន់ខាងលើ និងធ្វើឱ្យមនុស្សមួយចំនួនជាប់ផុងនៅក្នុងគំនរបាក់បែក។ នៅសង្កាត់សូឡូមានស្គី (Solomianskyi) អគារកម្ពស់២០ជាន់ និងកម្ពស់២៤ជាន់រងការខូចខាត។ មន្ត្រីរដ្ឋាភិបាលអ៊ុយក្រែនកំពុងជំរុញឱ្យក្រុមសម្ព័ន្ធមិត្តផ្ដល់មីស៊ីលការពារខ្លួនបន្ថែមទៀតដើម្បីទប់ទល់នឹងការវាយលុករបស់រុស្ស៊ី។ អ៊ុយក្រែនអាចបាញ់ទម្លាក់ដ្រូនរបស់រុស្ស៊ីភាគច្រើនពិតមែនហើយ ប៉ុន្តែមីស៊ីលផ្លោងរបស់រុស្ស៊ីនៅតែជាគ្រោះថ្នាក់សម្រាប់ប្រព័ន្ធដែនអាកាសអ៊ុយក្រែនដែលអ៊ុយក្រែនមិនទាន់មានសមត្ថភាពបាញ់ទម្លាក់នៅឡើយទេ៕ ប្រភព៖ AP
ចែករំលែកព័តមាននេះ