បង្ក្រាបក្រុមអនឡាញស្គេមមួយសំបុកទៀតនៅក្នុងភូមិគ្រឹះកូនប្រុសលោកមេបញ្ជាការយោធភូមិភាគទី៥ ឃាត់ខ្លួនជនបរទេសនិងខ្មែរ៣៤នាក់
- បាត់ដំបង
ខេត្តបាត់ដំបង ៖ ជនបរទេសចម្រុះជាតិសាសន៏ស្រី-ប្រុស មានទាំងជនជាតិខ្មែរផងប្រមាណ៣៤នាក់ ត្រូវបានកម្លាំងសមត្ថកិច្ចចម្រុះ ធ្វើការឃាត់ខ្លួនយកទៅសួរនាំ ជាមួយនឹងវត្ថុតាងជាច្រើន ដែលគេសង្ស័យថា មានជាប់ពាក់ព័ន្ធនឹងល្បែង «អនឡាញស្គេម» កាលពីថ្ងៃទី០១ មិថុនា ដែលពួកគេសំងំលាក់ខ្លួនយ៉ាងសុខស្រូលនៅក្នុងភូមិគ្រឹះដ៏ធំរបស់មន្ត្រីយោធាផ្កាយ១ម្នាក់ ស្ថិតនៅភូមិរំចេក៥ សង្កាត់រតនៈ ក្រុងបាត់ដំបង ។
របាយការណ៍របស់សមត្ថកិច្ច ក៏ដូចជាមន្ត្រីដទៃៗទៀត ដែលបានចុះបង្ក្រាបក្រុម «អនឡាញស្គេម»នេះ មិនបានបង្ហាញអត្តសញ្ញាណម្ចាស់ភូមិគ្រឹះ ដែលបង្កប់ក្រុម «អនឡាញស្គេម»មួយសំបុកនោះទេ ។ ប៉ុន្តែប្រភពខាង ក្រៅរបងភូមិគ្រឹះបានបង្ហើបឲ្យដឹងថា ភូមិគ្រឹះដ៏ធំស្គឹមស្កៃនោះមានម្ចាស់ឈ្មោះ អូន សុខសិលា ភេទប្រុស ជាមន្ត្រីយោធាពាក់ផ្កាយ១ នៅក្នុងអង្គភាពយោធភូមិភាគទី៥ ហើយក៏ជាកូនប្រុសបង្កើតរបស់លោកមេបញ្ជាការភូមិភាគនេះដែរ ។
លោក ដាញ់ អេងប៊ុនចាន់ ស្នងការខេត្តបាត់ដំបង ដែលបានដឹកនាំកម្លាំងចុះអន្តរាគមន៍ផ្ទាល់បំពេញការងារពេញមួយថ្ងៃ នៅក្នុងភូមិគ្រឹះលោកផ្កាយ១ ដែលបង្កប់ក្រុម «អនឡាញស្គេម»នោះ ជាមួយលោកស្រី ព្រះរាជអាជ្ញារង រួមជាមួយអាជ្ញាធរដែនដីផង មិនបានលើកទូរស័ព្ទទេ នៅពេលកោះសន្តិភាពទំនាក់ទំនងដើម្បីសុំការបំភ្លឺបន្ថែម នៅព្រឹកថ្ងៃទី០២ មិថុនា ជុំវិញករណីខាងលើនេះ ។
ប៉ុន្តែប្រភពពីមន្ត្រីខាងក្រៅរបងទីតាំងបាននិយាយថា ជាមួយនឹងការឃាត់ខ្លួនជនបរទេសចម្រុះជាតិសាសន៏ចំនួន២៧នាក់ និងជនជាតិខ្មែរចំនួន០៧នាក់ ដែលជាសន្តិសុខនៅមានវត្ថុតាងជាច្រើនទៀតដែលគេសង្ស័យអាចជាប់ពាក់ព័ន្ធនឹងល្បែង «អនឡាញស្គេម» ។
ប្រភពដដែលបានបង្ហើបប្រាប់ដែរថា បើតាមការសាកសួរបឋមនៅកន្លែងកើតហេតុ ពួកក្រុម «ស្គេម» ទាំងនោះ ទំនងទើបមកជួលស្នាក់នៅបានប្រហែលពី០២ ទៅ០៣ថ្ងៃមុនពេលកម្លាំងចម្រុះចុះបង្ក្រាបតែប៉ុណ្ណោះ ។
បើពិនិត្យមើលសកម្មភាព និងឧបករណ៏ ឬសម្ភារដែលពួកគេដឹកយកទៅស្ដុកទុកនៅតាមបន្ទប់ក្នុងភូមិគ្រឹះនោះ ក្រុមនេះអាចត្រៀមផែនការណ៍បើកដំណើរការ «អនឡាញស្គេម» ខុសច្បាប់ មិនមែនគ្រាន់តែជាការស្នាក់នៅបណ្ដោះអាសន្ន ដើម្បីលាក់ខ្លួននោះទេ ប៉ុន្តែត្រូវបានសមត្ថកិច្ចចម្រុះចុះបង្ក្រាបបានមុនពេលបទល្មើស«ឆបោក»កើតឡើង ។
ពាក់ព័ន្ធនឹងការជួលវីឡាដ៏ធំស្កឹមស្កៃឲ្យជនបរទេសចម្រុះជាតិសាសន៍ស្នាក់នៅនេះ កោះសន្តិភាពមិនអាចទាន់អាចស្វែងរកការទំនាក់ទំនងសុំការបំភ្លឺពីម្ចាស់ផ្ទះ គឺលោកឧត្តមសេនីយ៍ត្រី អូន សុខសិលា បានទេ គិតត្រឹមម៉ោង១រសៀលថ្ងៃទី០២ មិថុនា នេះ ។ ប៉ុន្តែបើតាមប្រភពព័ត៌មានដែលកោះសន្តិភាពទទូលបាននៅថ្ងៃដដែលនេះដែរបានឲ្យដឹងថា លោក អូន សុខសិលា បានចាកចេញពីផ្ទះនាប៉ុន្មានថ្ងៃមុននេះ បន្ទាប់ពីលោកបានជួលផ្ទះឲ្យជនបរទេសស្នាក់នៅ ដោយលោកមានបេសកកម្មចេញទៅរៀននៅក្រៅប្រទេស ។
ដោយឡែក ពាក់ព័ន្ធនឹងក្រុមជនបរទេស និងសន្តិសុខជនជាតិខ្មែរ រួមជាមួយវត្ថុតាងនានា នៅក្នុងភូមិគ្រឹះវិញ បើយោងតាមរបាយការណ៍បឋមរបស់សមត្ថកិច្ចដែលកោះសន្តិភាពទទួលបាន៖ មានជនបរទេសចម្រុះជាតិសាសន៏ និងជនជាតិខ្មែរជាសន្តិសុខ ដែលស្នាក់នៅក្នុងផ្ទះនោះ សរុបចំនួន៣៤នាក់ ក្នុងនោះមាន៖ ១-ជនជាតិសេរ៉ាឡេអូនចំនួន០១នាក់ (ប្រុស) ២-ជនជាតិមីយ៉ាន់ម៉ាចំនួន០២នាក់ (ស្រី១ ប្រុស១) ៣-ជនជាតិនីស្សេរីយ៉ាចំនួន០១នាក់ (ប្រុស) ៤-ជនជាតិហ្វីលីពីនចំនួន២៣នាក់ (ស្រី០៨នាក់» និង ៥-ជនជាតិខ្មែរចំនួន០៧នាក់ (ប្រុស ជាសន្តិសុខ) ។
ចំណែកវត្ថុតាងមួយចំនួនដែលសង្ស័យពាក់ព័ន្ធនឹងការប្រើប្រាស់ក្នុងអំពើ «ឆបោកតាមប្រព័ន្ធបច្ចេកវិទ្យា» ហើយត្រូវបានដកហូតរួមមាន៖ ១-កុំព្យូទ័រចំនួន៣៩គ្រឿង ២-ធុង PC ចំនួន០២ ៣-អាយផេតចំនួន១៩គ្រឿង ៤-ទូរស័ព្ទដៃចំនួន៣៦គ្រឿង ។ រួមនៅមានសម្ភារប្រើប្រាស និងឧបករណ៍ដែលពាក់ព័ន្ធមួយចំនួនទៀត ។
ក្រុមជនបរទេស និងសន្តិសុខខ្មែរ រួមជាមួយនឹងវត្ថុតាងទាំងអស់ ដែលបានដកហូត ត្រូវបានសមត្ថកិច្ចបញ្ជូនទៅកាន់ស្នងការដ្ឋាននគរបាលខេត្ត ដើម្បីបន្តនីតិវិធី ។
ដោយឡែក ចំពោះម្ចាស់ភូមិគ្រឹះដែលផ្ដល់ទីតាំងឲ្យក្រុម «អនឡាញស្គេម» ជ្រកកោន គេមិនទាន់ដឹងថា ត្រូវសមត្ថកិច្ចអញ្ជើញឲ្យចូលខ្លួនបំភ្លឺ ឬបន្តនីតិវិធីបែបណានោះទេ ? ព្រោះត្រង់ចំណុចនេះ កោះសន្តិភាពមិនអាចសុំការបញ្ជាក់ពីលោកស្នងការបាននៅឡើយ មកទល់នឹងម៉ោងចេញផ្សាយនេះ ៕
ចែករំលែកព័តមាននេះ